Isaiah 13 - Zanniat Bible

Pathian In Babylon Cawh Tuh I

¹ Babylon ai thu ah Pathian hnenai ponkam a hlenghnak Amoz ai fapa Isaiah in a zahnak tu hetihin i.

² Tlang vum lenpal ah raltawnghnak thantar tar tu ih. A puarthautu khuapui kotkate tawng tuhin ning ralkapte hnenah a roh ngai in au tu ilai tawng tuhang ih tihnak ah ning banpui hmuh tu ih.

³ Bawipa ai hmaihngalhnak a cotute in amahte porhdunhnak a ralkapte tu tawngdunhnak cianghlim in raltawng tuhin le a thinrawruaitute cawh tuhin ko zo ihang.

⁴ Tlang vuman a thanghnak thawmvang tu ngai tu ih! Mizapui au awthawm, ram tampui le miphun tampui taikhawmhnak thawmvang khiah! Ralkap tampui ai Bawipa in a ralkapte tu raltawng tuhin ralringruai cialep i.

⁵ A ralkapte tu lamhlapui van hamtong in kawi tlang i. Amahte thinraw in he ram pumpuhluk heh Bawipa in siatsuah tuh i.

⁶ Kap tu ih! Bawipa ai nia tu nong zo ihang; Cungnungber in siatsuahhnak hlengruai tuh nia hleng dawn ihang.

⁷ Mi zongzong ai kut tu thabo in zong tuh hlelhlo ai thintha sia tlang tuh sio i.

⁸ Thinlauhnak le tihikhnak in dim tuhai nau nai dawn ai nupang urhnak bangin thinharhnak le urhnak in ciah dun tuh i. Kihhnak in pakhat le pakhat sik dun tuhai zakthihnak in a hmai tu san tuh sio i.

⁹ Bawipa ai nia tu hleng dawn ihang, Bawipa ai thinraw nia le thincom nia khiah! Laivum pumpuhluk tu ramkhing ah cang tuhai misual hmuahhmuah pairal tuh sek i.

¹⁰ Van arsi le arsi burpui khai tleu tuh lo i; ni a suak fangin thim tuhai hlapui khai var tuh lo i.

¹¹ Bawipa in laivum pumpuhluk ah thihhnak hlengruai tuhai hrokhrawl mite tu amahte sualhnak manin cawh tuh ing. Mihngalte tu vut sek in vit tuhai mipuarthau le ninghiohnak nai lotute tu cawh tuh ing.

¹² A nungsun heh sui tahin tlawm tuh sawn i.

¹³ Cungnungber Bawipa kaimah in i thinrawhnak i larruai nia ahcen van heh hlin tuh sio ai laipua khai a umhnak an thawn teu in hlin tuh i.

¹⁴ Babylon ai a umtu ramdang mite tu amahte khua le ram ṭen ah tlan tuhai khaltu nai lo tuu bangin le sazulte hmai in sakhi a tlan bangin tlan tuh sio i.

¹⁵ Aisu khai ituseh a pom ngah mite tu ralvang in dawt ai rekhnak tuar tuh i.

¹⁶ Amahte mithmuh rori ah a nauniute tu parh sek in vit tuh i, a innsang thilri lang sah tuhai a nupuite khiah khengkhebel in sualpui tuh i,” tiin ti i.

¹⁷ Cen Bawipa in, “Babylon tawng tuhin Medes mite forh ing. Anite tu sui a daih lotu le ngun zai nam lotute i.

¹⁸ Amahte li le thal thawn minote rek tuh i. Nauniu vumah ituseh, suakthuan vumah ituseh ninghiohnak zaikhai nai tuh lo i.

¹⁹ Babylon ram tu ram mawi ber ngelngo i; amahte ram minungte in a porhhnak ber i. Ikhalselai Bawipa Kaimah in Sodom le Gomorrah i siatsuah bangin siatsuah tuh sek ing.

²⁰ Babylon ah aisu khai um nuam tuh nawn lo i. Hmun khat in hmundang ah a thawn ṭiotu Arab mite khai amahte ponhlam sa nuam tuh lo ai tuukhalte inkhai amahte tuu khal nuam tuh lo i.

²¹ Nelrawn ramsa umhnak ah cang tuhai simbu bu sahnak hmunah cang tuh i. Ciata ah sam ar um tuhai satharte dawp tlang tuh murhmo i.

²² Ralvilhnak inn le kumpibawi innte mehleng le ram uite beo tlang tuh murhmo i. Babylon ai tikcucan a bo dawn ihang; rai awk tuh nawn lo i,” tiin ti i.