Isaiah 11 - Zanniat Bible

Ral Daphnak Ram

¹ David le a tesinfate ai kumpibawi a ihnak tu vawnghnak thingkung bang i. Ikhalselai kunghmui in a kak dang a mem de bangin David ai tesinfa songin kumpibawi a thar suak tuh i.

² Bawipa ai rauhla in fimhnak pe tuh i; A mite uk thiamhnak le Lingthiamhnak pe tuh i. Bawipa ai daihhnak tu lingthiam tuhai kihzah tuh i;

³ Bawipa ai thuhlun khiah a anghnak i tuh i. Mitsih menma le mi relhnak menma in thukhan tuh lo i.

⁴ Mifarahte thu tu phatak niu in khan sah tuhai, Bawmtu nai lote ai covo tu hup sah tuh i. A thupehnak bangin minung tu cawh tuhai, Mihrokhrawl pawl tu rekhnak tuar tuh i.

⁵ Dikcanghnak le felhnak thawn a minungte uk tuh i,

⁶ Mehleng le tuu um kawm tuhai, Tlavang le me niu bok kawm tuh i. Kawlpaw faniu le chintit faniute rong ai tlang tuhai Naupang in kilkhawl tuh i.

⁷ Kawlpaw le vom rong ai kawm tuhai A fate tu bok tlang tuh i. Kawlpaw bangin chintit in fangcang kuangro ai tuh i.

⁸ Nausen niu khai tuahmawhhnak tawk tuh lo i, Rul ru nai hiangah a sal phetpho inkhai.

⁹ Pathian tlang thianghlim Zion ahcen, Tuahmawhhnak le phatlohnak zaikhai um tuh lo i. Zaimantifangin tifingriat ai ti a dim bangin Lailung tu Bawipa linghnak in dim tuh i.

Sal Tang Mite Let I

¹⁰ Ciami nia ah David ai tesinfa songin kumpibawi a thar suak tuhai miphun tampui caah hnikhniahhnak i tuh i. A khuapui songah taikhawm tuhai upathnak pe tuh i.

¹¹ Ciami nia a hleng fangin Bawipa in a huham larruai leh tuhai, Assyria ram, Egypt ram, Pathros ram, Sudan ram, Elam ram, Babylonia le Hamath ram le tipui kam ram le tikulh ramte an a tanglaihnak a mite tu khawm leh tuh i.

¹² Bawipa in a thantar khaisang tuhai Israel le Judah mite, a piak mite tu lailung vum ningli in khawm tlang leh tuh i, ti hmuhhnak ah miphun tampui hnenah hmuh tuh i.

¹³ Israel ram an Judah tu ralcai tuh nawn lo ai Judah tu Israel ai ral cang tuh nawn lo i.

¹⁴ Hmunkhat ah ṭang tlang tuhai nitlak lamah Filistin le nisuah lamai a umtute tawng tuh i. Edom mi le Moab mite in anite neh tuhai Ammon mite in a thu ngai tuh i.

¹⁵ Bawipa in Suez tikawn kangruai tuhai Euphrates Runpui kangruai tuhin hli sa zuangruai tuhai rawnti niute pasarih lek zuah tuh i; ciatihin aisu inkhai tan thil tuh i.

¹⁶ Egypt ram an amahte pupate suakhmun hrangah lampui a um awng bangin Assyria ram an ciata ai a nungsun a minung Israel mite caah suakhmun lampui um tuh i.