Isaiah 10 - Zanniat Bible

¹ Ning bo i! I minungte cawh nuam in a dikcang lo dante bawn i si!

² Mifarah le miharsate in amahte covo co ṭen lo ai anite thu ling sah lo i si. Ciatihin hmaitong le nu pa nai lo farahte ai thilrite sut tlang i si.

³ Pathian in ning cawh fangin ziang bawn tuh i si? Ning vumah lamhlapui in harsahnak a hleng fangin zaitin um tuh i si? Bawmhnak si in aisu hnenah tlan tuh i si? Ning thilri le ning lianhnakte akonah thup thil tuh i si?

⁴ Raltawnghnak ah ning thi tuh i; ihlahle ning pom tuhai ning fehpui tuh i. Cia hnua ahkhai Bawipa ai thinrawhnak tu dap tuhlai lo i; cawh tuhin a kut tu tung cia in um lai i.

Pathian Ai Tumbel Assyria Kumpimangbawi

⁵ Bawipa in, “Thin i rawruaitute vithnak ai i hmanghnak tumbel ciah Assyria i.

⁶ Thin i rawruaitu, Pathian kihzah lotute tawng tuhin Assyria hlat ing. Amahte thilri sut tuhin le a minungte lampui hnawmborh bangin fon tuhin hlat ing,” ti i.

⁷ Ikhalselai Assyria Kumpimangbawi in mi thisan luanghnak tuhin tumhnak nai ve i. Ram tampui siatsuah tum i.

⁸ Tluangkhawng ai, “I ralkap hotute tu kumpibawi ciang i!

⁹ Kalno le Carchemish khuate neh ing. Hamath le Arpad khuate khai neh fawn ing. Samaria le Damascus khuapuite khai lang zo ing.

¹⁰ Milim a biatu ramte cawhtu tuhin i kut hoi zo ing; a milimte tu Jerusalem le Samaria ai milim tahin tam sawn i.

¹¹ Samaria le a milimte i siatsuah sek zo bangin Jerusalem khua le ciata ai a biahnak milimte tu siatsuah tuh sek ing,” ti i.

¹² Ikhalselai Bawipa in, “Zion Mual le Jerusalem vumah i bawnhnak tepawl i ben fangin Assyria Kumpimangbawi khai a tluangkhawng le a puarthau manin cawh tuh ing,” ti i.

¹³ Assyria kumpimangbawi in, “Kaimah ai bawn siohnak i! I hat, i fim ai lingthiamhnak nai ing. Ramkhat le ramkhat karlak ramrite tu hnawmcan sek ing ai amahte rong khawlhnak lang sah sek ing. Kawlpawcang bangin, ciata ai a umtute tu fon sek ing.

¹⁴ Lailung vumai ramte tu vaniu bu bang i ai amahte lianhnak le a sumsawte tu vaniu ti kin luak bangin bai niu in luak ing. Kaimah hnawh tuhin, ko zap ngamtu aisu khai um lo i. Ka ka ngamtu khai um tlang lo i,” tiin tluangkhawng dekdo i.

¹⁵ Ikhalselai Bawipa in, “Haihpui in i hmangtu tahin i lian sawn i, ti thil nitur im? Hluah in thing attu tahin i thupui sawn i, ti nitur im? Tumbel in minung awh lo i; minung in tumbel awh sawn i,” ti i.

¹⁶ Cungnungber Bawipa in tunai rongkham in a nungtute cawh tuhin urhnak hlengruai tuh i. Amahte taksa ruangpui songah urhnak tu maikang bangin kang tuh i.

¹⁷ Pathian amah, Israel ai tleuhnak tu mai ah cang tuh i. Israel ai Pathian thianghlim tu mailiau ah cang tuhai ni ni khat songah zaizongza, hling le so tianin, kang tuh sio i.

¹⁸ Tupui tu ngaingai le loram phapha pawl tu ursia in minung a siatsuah bangin siatsuah tuh sek i.

¹⁹ Thingkung a tanghnak khai tlawm tuh ze ai naupang tualleng inrin siar thil tuh i.

Mi Tlawmniu Let Tuh I

²⁰ Israel mite songin a tangmi tlawmniu in amah a siatsuahtu ram rinsan nawn loin Israel ai Pathian thianghlim Bawipa sawn a rinsan can hleng tuh i.

²¹ Israel mite songin mi tlawmniu tu a hatmi amahte Pathian hnenah let tuh i.

²² Tunai Israel mite tu Tipui kam runsiat zah in tam napui a lettute tu mi tlawmniu ian tuh i. Mi tamsawn ca ahcen pairalhnak heh dah sah cia i ai a tawk tuhhnak hrimhrim i.

²³ I, he ram pumpuhluk songah Cungnungber Bawipa in a rel cia bangin, siatsuahhnak hlengruai tuh i.

Bawipa In Assyria Cawh Tuh I

²⁴ Cungnungber Bawipa in Zion ai a umtu minungte hnenah, “Egypt mite in ning vumah a bawn awng bangin Assyria mite inkhai ning cawh ai tuar tlang napui i sikhaw lau mah ih.

²⁵ A rai hlanah ning vumah cawhkuan i hlengruaihnak heh lawmruai tuhai anite sawn siatsuah tuh ihang ing.

²⁶ Oreb Lungpui ai Midian mite i vit awng bangin Cungnungber Bawipa kaimah in i fungkek in vit tuh ing. Egypt mite i tuarruai zo bangin Assyria mite tuarruai tuh ve ing.

²⁷ Ciami can a hleng fangin a hat ngai Assyria kut songin ning suah tuhai anite ai hak khiah ning hawng ah thilrit i tuh nawn lo i,” tiin i ti i.

Ral In Nem I

²⁸ Ralte in Ai khua lang i. Migron kansuak zo i. Amahte rong heh Mikmash ah dah i.

²⁹ Ciami tlangkawn kan ai Geba ah cam i. Ramah khua mite tu a thinlau ngai i. Kumpibawi Saul ai khua Gibeah khua mite tu tlan sek i.

³⁰ Gallim mite au tucuk ih! Laishah mite ngai tu ih! Anathoth mite i sawn tucuk ih!

³¹ Medmenah le Gebim khua mite tu thih kih in tlan diamdo i.

³² Tunnia ah ralte tu Nob khua ah um ai Zion Mual le Jerusalem khuapui lamah amahte kuttum hmuh tlang dekdo i.

³³ Cungnungber Bawipa in thingkak bunghnak bangin bung tuh i. Amahte lakai a puar ber le a sang ber khai sathnak le nemhnak tuar tuh i.

³⁴ Tupui laiteng ai thingte khai haihpui in a vawng bangin le Lebanon ai thingpha ber khai a vawng bangin Bawipa in anite khai vawng tuh i.