Hosea 9 - Zanniat Bible

Hosea In Israel Cawhhnak Thuthan I

¹ Aw Israel mite, lawki mite bangin puai ning bawnhnak com tuhang ih. Ning Pathian hnenin pial zo ai a hmaiah rinsantlak lo ning cang zo i. Hemi ram pumpuhluk songah hlotlau bangin Baal khuavang hnenah zuar dun zo ai, a man pehnak tiin ning ruathnak rong in ning angruai i.

² Ikhalselai a rai hlanah rong le olive thau le cabit khai khamkhop in ngah tuh lo i si. Cabitti thar khai ngah tuh nawn lo i si.

³ Israel mite tu Bawipa ai ram songah um tuh nawn lo i. Egypt ramah let kul leh tuhai Assyria ramai a cianghlimlo rong ai tuh i.

⁴ Ramdang ahcen Bawipa hnenah cabitti hibawlhnak pe thil tuh lo ai hibawlhnak dang khai sel thil tuh lo i. Amahte rong in rong aitu hmuahhmuah ningrimtiar tuhai pangvot rong ai thawn bang dun tuh i. Amahte rong tu rikam lawmruaitu ian i tuhai Bawipa biakinn ai pehnak ah sang sah tuh lo i.

⁵ Cen Bawipa caah puai bawn can a hleng fangin ziang bawn tuh ini?

⁶ Pairalhnak hleng ai misenpui a piak fangin Egypt mite in Memphis khuapui ah phum tuhin khawm tuh i. Amahte sui le ngun um awng hmun, le amahte inn le lote a din awnghnak hmunah hampa le hlingkungte po tuh bial i.

⁷ Cawhhnak a tuar can hleng zo i, amahte vumah phuzul can hleng zo i. Ciatihin a cang fangin Israel mite in i ling tuh i. “Hemi prophet tu a voi i; he rauhla lam hmutu heh a molhpui i,” ti i si. Ning sualhnak a tam ze manin kai tu a roh ngai in i hua i si.

⁸ A minung Israel mite hnenah ralringhnak thu rel tuhin Pathian in kaimah heh prophet in i hlat i. Ikhalselai i fehhnak hmuncang ah vaniu bangin thang in i tawi tum i. Pathian inn songah misenpui heh prophet ai ral ah cang i.

⁹ Amahte thil bawnhnak tu a pha lo ze ai Gibeah khua ai a bawn awnghnak bang thotho i. Pathian in amahte sualhnak tu hih ngiode ai cawh tuh i.

Israel Sualhnak Le Sualman

¹⁰ Bawipa in, “Hmasaber ah Israel i hmu awng fangin nelrawn ai cabit thai hmu bang i. Ning pupate i hmu pan awng fangin thai hmin cu ai a thai hmin hmasaber hmu bang i. Ikhalselai Baal-Peor mualtlang a hleng fangin Baal khuavang bia pan i. Cen a rai hlanah amahte daih zehnak khuavangte bangin ningdulkul ah cang i.

¹¹ Israel ai thawmlianhnak tu vaniu bangin zuang tuh teu i; fate cawi tuh nawn lo i, a nupangte naupai um tuh nawn lo ai amahte songin nau sem tuh nawn lo i.

¹² Fate a nai inkhai kaimah in lang sah tuh lio ai nung tuh lo i. Hemi minungte i hlum lio fangin thil poimawh ngaingai amahte vumah hleng tuh i,” ti i.

¹³ Israel tu i hmu sawng fangin mawi ngai ai a pomi tuumkung bang i, ikhalselai tun tu a fate khiah ramsa bangin hnawthnak le rekhnak a tuar khiah hmu ing.

¹⁴ Aw Bawipa he minungte vumah ziang bawn tuh na ngen tuh ing? Amah nupangte tu cingruai tusek lai amahte hnawi tu carruai tusek law.

Bawipa In Israel Thukhan I

¹⁵ Bawipa in, “Amahte thil sual bawnhnak hmuahhmuah heh Gilgal in pan i. Ciata in anite hua pan ing. Thil sual a bawn manin i ram songin hnawt tuh sek ing. Zaikom inkhai daih tuh nawn lo ing; a hotute veksen in tawng i cai i.

¹⁶ Israel mite tu a ham ro ai a thai thil lomi thingkungte bang i. Fate nai tuh lo i. A nai ta inkhai amahte daihhnak ngelngo fatlumte tu kaimah in rek tuh sek ing,” tiin ti i.

Israel Vumai Pathian Ponkam

¹⁷ A na i ruaihmi Pathian in a minungte tu hnawl tuh i. Zaimantifangin a thu ngai nuam lo i. Miphun dang lakah mi vakvai phun in cang tuh i.