Hosea 6 - Zanniat Bible

Bawipa Hnenah Let leh Tum I

¹ Mipui in, “Bawipa hnenah let ngasing ih. Kin hlikhlai dek zo napui amah thotho in kin cakruai leh tuh i. Kin tuahmawh zo napui amah thotho in kin hmaihma kin tuam sah leh tuh i.

² Ni hnih hnuaah kin thoruai leh tuhai ni thumhnak ah kin nungruai leh tuh i; cen a hmaiah a nung in um tuh ising.

³ Bawipa khiah ling tek ngasing ih. Amah tu kin hnenah zing lam khuavar bangin kawi tuh i, pelh tuh lo i. Ani tu kin hnenah laipua a burhtu khuapui tla bangin pelh loin hleng tuh i,” ti i.

⁴ Bawipa in, “Aw Israel le Judah, ningmah heh akontih in ning bawn tuh ini ing? Ningmah in i ithnak tu zing lam mawk kai bangin rang ngai in pai i; nai tla bangin hul leh zual i.

⁵ Ciamanin i prophette ning hnenah thukhanhnak le siatsuahhnak ponkam thawn hlat ing. Ning hnenai i daihhnak heh ning ling tuh lohnak um lo i; tleuhnak bangin var liang i.

⁶ Ning hnenin a kho ngai ithnak i daih i, ramsa thawn hibawlhnak ilo i. Kaimah i ling tuh i daih i, maitai hibawlhnak ilo i.

⁷ “Ikhalselai he minungte, he thukhamhnak ram a hleng sawng fangin anite thawn thutiam i bawnciahnak heh Adam bangin bal sek i.

⁸ Gelead tu mihrokhrawl le mirektute ai khua i.

⁹ Suangbawite tu damiahte bangin mi bawh i. Shechem hmun thianghlim fehhnak lampui ah rin mi rek i. Ciami thil pha lo pawl tu tumhrim in bawn i!

¹⁰ Israel ram songah thil poimawh ngai pakhat hmu ing: i minungte in milim biahnak in amahte veve ningrim dun zo i.

¹¹ “Ningmah Judah mite, ning thil bawnhnak manin cawh ning tuar tuh can thiah zo ing.