Hosea 4 - Zanniat Bible

Bawipa In Israel Mawhhluk I

¹ Bawipa in he ram songai a umtute vumah mawhhluk zo i. Aw Israel, a relhnak heh ngai tu: “He ram songah cenin ithnak um lo ai rintlakhnak khai um lo i. Minungte in a Pathian ah i ruat lo i.

² Mi cukcam, thudonrel tlang, mirek, ruko, nupui le pasalte in midang daih san i. Thisan luanghnak karhzai betbo ai mirekhnak pakhat hnua pakhat um i.

³ Ciamanin he ram tu car tuhai ram songah nunhnak a naimi zongzong hnang tlang tuh i. Ramsa le vaniu hmuahhmuah le ngate rin thi tuh sek i,” ti i.

Bawipa In Suangbawite Mawhhluk I

⁴ Bawipa in, “Aisu inkhai mi senpui mawhhluk maseh; a hau khai hau maseh. I mawhhlukhnak tu ningmah suangbawite i si.

⁵ A sun a zan in sualhnak poimawh bawn tlang i si; ningmah tahin prophette pha deuh cuang fawn lo i. Ning nu Israel heh siatsuah tuh ing.

⁶ I mihingte in kaimah i ling nuam lo manin bo tuh sek i. Ningmah suangbawite khai i ling ning nuam lo ai i thuzirhhnakte lon i si. Ciamanin ning tu kaimah in ning hnawl ai ning fapate khai i suangbawi cang thil tuh nawn lo i.

⁷ “Suangbawi ning tam amam ai i vumah ning sual amam i. Upat tlak ning ihnak khiah mualphohnak ah bawn tuh ing.

⁸ I minungte ai sualhnak thawmin milian ah ning cang i; ciamanin tam amam in sualruai ning nuam i.

⁹ Mipui bang thotho in cawhkuan tuar tuh ve i si. Thil siava ning bawnhnak manin ning cawh tuhai cawhkuan ning pe tuh ing.

¹⁰ Hibawl selhnak songin ning covo tu ai tuh napui ri ning kam tuh thotho i. Hlotlau per ai pungzaihnak khuavang bia tuh napui fate nai tuh cuang lo i si, zaimantifangin a dang khuavangte hlun nuam in kaimah hnenin pial i si,” tiin ti i.

Bawipa In Khuavang Biahnak Daih Lo I

¹¹ Bawipa in, “Zu thar in ituseh zu hlun in ituseh i minungte ai thinlung pairuai sek i.

¹² Thingtan hnenah tlahsan, fungkek in amahte daihhnak rel awng i. Ciamanin kai tu i hlum i si. Hlotlau ai a cangtu nupang bangin anite tu khuavang hnenah pe dun i.

¹³ Tlang phundir hmun cianghlim ah hibawlhnak bawn ai tlang phundir thingpui sang cianghlim thingkung hlimhnia ah rimhmui tai tlang i. “Ciamanin ning fanute tu hlotlau ah cang ai ning fapa ai nupuite tu pasal dang thawn sual i.

¹⁴ Ikhalselai hemi manin cawh tuh lo ing; zaimantifangin ningmah rin biakinn hlotlaute hnenah feh ai amahte thawn hmunkhat ah hibawlhnak sel i si. Thufim ah a um bangin, ‘Ruathnak nai lo miphun tu hnawm tuh i.’

¹⁵ “Ningmah Israel mite tu kaimah caah hlotlau ah ning cang zo napui Judah mite tu ciatihin cang hram maseh. Gilgal ihlahle Bethaven ah i bia tlang maseh. Cia hmunah a nungmi Bawipa hmingin thukhamhnak khai bawn maseh.

¹⁶ Israel mite tu laak lungruh bangin lungruh i. Akontih in tuu faniu bangin tlimdawn lakah cawm thil tuh ing?

¹⁷ Israel mite tu milim in hap sio i. Amahte nuamhnak ah feh tlang tuseh.

¹⁸ Zu tampui a ding hnuaah hlotlau a perhnak ah hiam tlang roh ai hmingphahnak tahin thangsiahnak daih sawn i.

¹⁹ Simpai ai hmut sekhnak bangin piak tuh sio ai a khuavang biahnak khai zakthipui tuh i.