Hosea 1 - Zanniat Bible

¹ Judah kumpibawite Uzziah, Jotham, Ahaz le Hezekiah in kumpibawi awng san le Israel kumpibawite, Joash fapa Jeroboam in kumpibawi awng laiah Bawipa ai thu tu Beeri ai fapa Hosea hnenah hleng i.

Hosea Ai Nupui Le A Fate

² Bawipa in Israel miphun hnenai a pong fangin hmasaber ah Hosea hnenah, “Feh tulai nupui hoi tu; na nupui tu hlotlau i tuhai na fate khai a nu bang i tuh i. I miphun in i hlum zo ai hlotlau phun ah cang zo i,” tiin ti i.

³ Ciamanin Hosea in Gomar hoi i. Gomar tu Diblaim ai fanu i. Naupai ai fapa in nai i.

⁴ Ciafangin Bawipa in Hosea hnenah, “A hming ah ‘Jezreel,’ bawn tu; zaimantifangin Israel kumpibawi ai pu Jehu in Jezreel khuami a rek awng manin a rai hlanah Israel kumpibawi cawh tuh ing. Jehu tesinfate ai ukhnak san boruai tuh ing.

⁵ Cen Jezreel phairawn ah Israel ralkapte ai hathnak tu siatsuah tuh sek ing,” tiin ti i.

⁶ Gomar in fa pahnihhnak nai ai fanu i. Cen Bawipa in Hosea hnenah, “A hming ah ‘Lo-ruhamah,’ bawn tu; ikhalselai Israel mite tu it tuh nawn lo ai ngaithiam tuh nawn lo ing.

⁷ Ikhalselai Judah mite tu it tuh ing. Bawipa a Pathian kaimah in o tuh ing; ikhalselai ciatihin i o fangin raltawnghnak ralvang, li le thal, siphuh le siphuh vumto ralkapte thawn o tuh lo ing,” tiin ti i.

⁸ Gomar in a fanu khiah hnawi fawh a comruai hnuaah fa nai lala ai fapa in nai i.

⁹ Ciafangin Bawipa in Hosea hnenah, “A hming ah ‘Lo-ammi,’ bawn tu; zaimantifangin ningmah Israel mite tu i minung ilo i si ai kai khai ning Pathian ilo ing,” tiin ti i.

Israel Khiah Dingruai Leh Tuh I

¹⁰ Israel miphun tu tifingriat ai siatnawi zah i leh tuh i; teh cawk lo le siar cawk lo i leh tuh i. Tunah Pathian in, “Israel tu i minung ilo i,” ti i. Ikhalselai “Ning tu a nungmi Pathian ai fate i si,” a ti nia hleng leh tuh i.

¹¹ Judah mi le Israel mite tu kom dun leh tuh i. Amahte caah konghoitu pakhat ril tuhai hlanlai ai bangin amahte ram songah pungzai tuhai khangso tuh i. I, Jezreel san tu san thawmlian i tuh i.