Hebru 8 - Zanniat Bible

Kin Suangbawi Sang Jesuh

¹ Kin relhnak ai a sawh hiamhnak ber tu: vancung Pathian tohkham songlawi kiahhan lam rori ah a to bentu Suangbawi Sang nai ising, tihnak i.

² Hmun Thianghlim Ber ah Suangbawi Sang naṭuan pe ai cia hmun heh minung ai sahnak ponhlam ilo in Bawipa ai sahnak ponhlam ngaingai i.

³ Suangbawi hmuahhmuah ai naṭuan heh Pathian hnenai pehnak lehsawng le hibawlhnak ai selhnak sumhnam ap tuh khiah i; ciatih bangin kin Suangbawi Sang inkhai zaital pe tuh nai kul ve i.

⁴ Lailung vumah um selai suangbawi ṭuan tuh lo i, zaimantifangin Judah dan in lehsawng pehnak aptu tuhin suangbawi dang um i.

⁵ Ciatih ai laivum ai suangbawite bawnhnak tepawl tu vancung ai suangbawi bawnhnak ai a hla lek i. Moses ai thula ahkhai ciatihin i. Moses in thukhamhnak ponhlam a sa dawn fangin Pathian in a hnenah, “Tlang vumah pianzia i hmuhhnak bang rori in sa tuh isi,” ti i.

⁶ Ikhalselai amahte perhnak tahin a pha deuhmi suangbawi naperhnak tu Jesuh hnenah pe zo i. Pathian le a minung lakai Jesuh in a thukham bawnhnak heh a pha deuhmi thukhamhnak a i bangin a suangbawi naperhnak khai a pha sawn i.

⁷ A hmasa thutiamhnak ah semkhim lohnak um hlah selai a hnuata ai thutiamhnak heh kul tuh lo i.

⁸ Ikhalselai Pathian in a minungte mawhhluk ai, “Bawipa in hetihin rel i: Israel mi le Judah mite thawn thukhamhnak a thar in bawn tuh can hleng cing tuh i.

⁹ Ikhalselai a pupate kut in fehpui ai Egypt ram in i suah laiah i bawn awnghnak thutiamhnak bang tu i tuh lo i; Amahte hnenah thutiamhnak i bawn awnghnak hlun nuam tlang lo manin kai in zaikhai siar ve lo ing,” ti i.

¹⁰ Cen Bawipa in: “A hleng tuhhnak tikcucan ah Israel mite thawn hebang in thutiamhnak bawn tuh ing; I dan heh a ruathnak vumah dah tuhai, amahte thinlung songah ngan tuh ing. Kai tu a Pathian cang tuhai anite tu i minung tuh i.

¹¹ Aisu inkhai a unau ituseh, a ram songai a phunpui ituseh, ‘Bawipa ling tu ih,’ ti dun kul tuh nawn lo i. Zaimantifangin upa ber in nauta ber tian a veksen in ling tuh sek i.

¹² Amahte sualhnak ngaithiam tuhai, amahte mawhhnak khai hih tuh nawn lo ing,” tiin ti i.

¹³ Hebang ai thutiamhnak thar thu Pathian in a rel manin a thutiamhnak hmasa heh a hlun ah cang zo i; cen a hlun zomi le a kau zo mite tu a rai hlanah pairal tuh i.