Hebru 6 - Zanniat Bible

¹ Ciatih imanin hmai lamah nor ngasing; Khristian thuthang a hampan in zirhdunhnak heh hlum in puitling zirhdunhnak ah feh ngasing. Phathnemhnak zaikhai a nai lomi naperhnak kin hlum zohnak heh a ham in pan nawn hlah hang sing ih; Pathian kin sanghnak khai a ham in not hlah hang sing ih;

² baptisma thu le kutsuanhnak thute, mithi thoruailehhnak thu le kumzangza ai thukhanhnak thute khai a ham in pan leh hnelhno hlah hang sing ih.

³ Hmai lam sawn nor ngasing. Pathian lungkhimhnak ilekhaw ciami sawn kin bawn tuhhnak i.

⁴ Sanghnak a hlumtute tu akontih in sualsirhnak ah let thil tuh nawn i? Anite tu Pathian tleuhnak songah a um awngtute i; vancung lehsawng a teptute i ai Rauhla Thianghlim co awngtute khai i.

⁵ Pathian ponkam a ur zia a ling ngahtute i ai a hleng tuhhnak san ah hathnak huham khai a teptu le a ling ngahtute i.

⁶ Ciacingin amahte sanghnak hlum tlang i! Ciamite tu sualsirhnak ah letruai leh tuh heh a cang thil hrimhrim lohnak i; zaimantifangin Pathian Fapa heh thinglamteh vumah khenbet leh ai mizapui hmaiah zakthi mualpho in bawn tlang leh i.

⁷ Ruahti a hawptu laipua le lovai mite ca ai a phathnem rongkungte a poruaitu laipua heh Pathian ai hmuifu pehnak laipua i.

⁸ Ikhalselai hling le hampa ian a poruaitu laipua heh hnempuihnak zaikhai nai lo i; Pathian cukcamhnak tawk thai ai mai in tai leh tuh sek i.

⁹ Ithnak u le naute, hebang in rel napui ning thula ahcen lungkhimhnak nai ing. Ning tu hmuifu pha deuhmi nunohnak nai i si, ti ling i ing.

¹⁰ Pathian in mi hlaihdan lo i. Ning naperhnak ituseh, Pathian ning ithnak larruai in Khristian rualpuite ning bawm awnghnak le tun ahkhai ning bawmhnak hnelhno tepawl ituseh, Pathian in hih tuh ṭiode i.

¹¹ Ning umlamhnak khim thil tuhin a tawp tianin taima ngai in zuam tlang tu ṭen ih, tiheh i daihhnak lian ber i.

¹² Mi thazawng ning cang tuh i daih lo i; ikhalselai Pathian ai a thukhamciahnak a cotu cang tuhin sanghnak naitu le thinsauhnak naitute bang cang tuhin ning daih i ing.

A Felmi Pathian Ai Thukhamhnak

¹³ Pathian in amah tahin a lian sawn hming sal tuh dang um lo manin amah veve hming sal dun in Abraham hnenah thukhamhnak bawn i.

¹⁴ “Na hnenah thu na kham ing: hmuifu na pe tuhai tefa tampui nai tuh isi,” tiin ti i.

¹⁵ Abraham tu a thinsau manin Pathian in a thukhamhnak co ngah i.

¹⁶ Mi pakhatkhat in cukti ding fangin amah tahin a lianmi ai hming sal in bawn lekhaw thu eldunhnak um thil nawn lo i.

¹⁷ Pathian tu a tumtekhnak ṭhin awng lo i; cia thu tu a thukhamhnak a cotu tuh pawl hnenah fiang ngai in larruai a nuam manin a thukhamhnak vumah amah ai hming sal in thukhamhnak cukcam in belh lai i.

¹⁸ Hemi thu pahnih heh thleng thil lo i ai Pathian inkhai he thu vumah thudonrel awng lo i. Ciatih imanin amah thawn huphimhnak a ngahtu kinte tu ralphahnak tampui le thathohnak nai tlang ai kin hmaiah dahciahnak umlamhnak heh kho ngai in awh tlang ising.

¹⁹ Hemi umlamhnak tu kin nunhnak ca lawng comruaihnak thirkawn bang i. Kin caah himhnak le muanghnak imanin vancung biakinn ponzar heh lan in a songai hmun cianghlim ber ah hleng i.

²⁰ Jesuh tu cia hmunah kinmah aiawh in hleng zo ai Melkhizedek suangbawi dan in kumzangza Suangbawi Sang cang zo i.