Hebru 5 - Zanniat Bible

¹ Suangbawi Sang pohpoh tu mipui lakin rilmi i ai aiawhtu ah Pathian naruaihtu tuhin dahhnak i. A naper heh hibawlhnak bawn le sualhlat hibawlhnak sel i.

² Amah khai khim lohnak a phunphun nai manin zaikhai linghnak nai lo le a khelh mite hnenah lungnemhnak nai i.

³ Ciatihin tlasamhnak a nai ve manin midang sualhnak ca lek ilo in amah ai sualhnak ca ahkhai hibawlhnak sel kul i.

⁴ Aisu khai mah le mah Suangbawi Sang ah ril dun in Khaisang dun thil lo i. Aaron tu Pathian in ko ai Suangbawi Sang ah a cang bangin aisu khai Pathian kohnak ian in Suangbawi Sang cang thil i.

⁵ Ciatih bangin Khrih inkhai amah veve Suangbawi Sang ah khaisang dun lo i. Pathian sawn in, “Nang tu i Fapa isi, tunnia ah na Pa ah i cang zo i,” tiin a hnenah ti i.

⁶ Cen hmundang ah, “Nang tu kumzangza in Suangbawi tuh ihang si; Melkhizedek suangbawi i dah bangin i tuh isi,” tiin ti lala i.

⁷ Lailung vumah a um laiah Jesuh in thihhnak in amah a othaitu Pathian hnenah cawm ngai in au ai mithli far in sawngen i. Mi lungnem le pumpe dun mi imanin Pathian in ngai sah i.

⁸ Pathian ai Fapa rori inapui Pathian ai thu ngaitu i tuhin harsa tuarhnak in zir i.

⁹ Cen mi semkhim in bawnhnak a i fangin a thu ngaitu hmuahhmuah caah ani tu kumzangza nunohnak hampui ah cang i;

¹⁰ Cen Pathian in, “Melkhizedek ai suangbawi dan hlun in Suangbawi Sang tuh isi,” tiin ti i.

Lampeng Hlun Tuh Lo Ralringhnak

¹¹ Hemi thu ah rel pha tampui nai ing; ikhalselai thu ning ling har ze manin ning hnenah fiangruai har ngai i.

¹² Tun tu zirhtu tuhin rin ning cu zo i; ikhalselai Pathian thu a hampanhnak in zirh ning kul lai i. Rong hak ai ning cu napui hnawi ding lai i si;

¹³ Hnawi a dingtu heh naupang lai i; a pha le a hnawm thiathiamhnak nai lai lo i.

¹⁴ Ikhalselai rong hak tu upa caah i; anite tu thiathiamhnak thinlung hmang in a pha le a hnawm thiathiam i.