Hebru 4 - Zanniat Bible

¹ Ciami cawlumhnak ngah thil tuhin Pathian in thukhamhnak kin pe zo i, Ciatih ai a thukham cawlumhnak songah hleng thil loin kin um pang tuh loin ralring in um tlang ngasing.

² Zaimantifangin amahte in za awng bangin kin inkhai Thuthangpha za zo ising. Ikhalselai Thuthang zahnak heh amahte caah hnempuihnak zaikhai um lo i, zaimantifangin a za ian za tlang ai sanghnak thawn pom nuam tlang lo i.

³ Ikhalselai kinmah a sangtute tu Pathian ai a thukhamhnak cawlum hmun a cotu sawn ising. Pathian in, “Thin i raw ai, ‘Amahte cawlumhnak tuhin i tihnak ram tu hleng tlang tuh hrimhrim lo i,’ tiin thukham ing,” a tihnak khim i. Lailung a semsuah ai panin a naper ben zo sek napui hetihin rel i.

⁴ Zaimantifangin Lai Thianghlim in hmun khatkhat ah ni sarih thu ah, “Ni sarih nia ah Pathian tu a naperhnak in cawlum i,” tiin ti i.

⁵ Hemi thu ah a rel bethnak um i, “Amahte cawlumhnak tuhin i tihnak ramah anite hleng tuh hrimhrim lo i,” ti i.

⁶ Thuthangpha a za hmasatute in ciami cawlumhnak ngah tlang lo i. Zaimantifangin Bawipa ai thu hlun tlang lo i. Ikhalselai a co ngahtu tuh midangte um i.

⁷ Hemi tu Pathian in “Tunnia,” a tihnak ni dang pakhat a dahsahhnak in fiangruai i. Kum tampui hnuaah a vumai kin relciahnak Lai Thianghlim songah a um bangin Pathian in David songin, “Tunnia Pathian aw za le i sikhaw ning lung ruh mah ih,” tiin rel i.

⁸ Pathian ai khamciahnak cawlumhnak heh mizapui hnenah Joshua in pe ngah awng ta selai “Tunnia,” tihnak ni dang thu heh Pathian in rel tuh nawn lo i.

⁹ Tunai bang ilekhaw Pathian tu ni sarih nia ah a cawlum bangin Pathian minungte caah cawlum tuhhnak um lai i.

¹⁰ Zaimantifangin Pathian ai thukhamhnak cawlumhnak a ngahtu heh Pathian a naperhnak in a cawlum bangin, amahte naperhnak in cawlum tuh ve i.

¹¹ Ciamanin Pathian ai thukham cawlumhnak kin co thil ve tuhin kin zuam thil tawp in zuam ngasing. Anite tu Bawipa ai thu hlun lo manin co thil lo bangin kinte pakhat khai cang hram hlah sing ih.

¹² Pathian thu tu nung ai hat ngai fawn i. Ralvang nak hnih san tahin san sawn i. Nunhnak le rauhla a tawkdunhnak le hngeuhhngeuh le ruhhling pehdunhnak tian hlehpet thai i. Minung thinlung ai daihhnak le ruathnak khai ling sio i.

¹³ Pathian hmaiah zaikhai kin thupthilhnak um lo i. Pathian ai semsuahhnak thil hmuahhmuah heh a hmaiah pharh sio le hong sio bangin lar i. Ni khatkhat ah amah hnenah thula kin naihnak hmuahhmuah phuang tuh sio ising.

Jesuh Tu Suangbawi Sang I

¹⁴ Ciamanin kin sanghnak heh kho ngai in awh tlang ngasing. Zaimantifangin Pathian Fapa Jesuh tu kin Suangbawi Sang thawmlian i ai ani tu Pathian umhnak rori ah hleng zo i.

¹⁵ Kin Suangbawi Sang in kin ṭawnṭaihnak kin ling sah lotu ilo i. Kinmah bangin sualforhhnak a phuncang a tawk ve mi i; ikhalselai ani tu sual lo i.

¹⁶ Ciatih imanin Pathian bawi tohkham heh ralpha ngai in feh ngasing; ciata ah ninghiohnak um i. Ciata ah ninghio ngaithiamhnak co tuh ising, kin kul can poh ah ninghiohnak ngah tuh ising.