Hebru 3 - Zanniat Bible

Moses Tahin Lian Sawn I

¹ Pathian ai ko ve mi Khristian u le naute, kin sanghnak hrang Suangbawi Sang tuhin Pathian ai hlatmi Jesuh thu heh ruat tu ih!

² Moses tu Pathian inn song naper ah rintlak a i bangin Jesuh khai napertu tuhin a riltu Pathian hnenah rinsantlak i.

³ Inn satu in a sahnak inn tahin upathnak tam sawn ngah i. Ciatih bangin Jesuh khai Moses tahin upathnak tam sawn ngah phu i.

⁴ Inn hmuahhmuah mi pakhatkhat in sahnak i; ikhalselai zaizongza a satu heh Pathian i.

⁵ Moses tu Pathian naruaihtu a i bangin Pathian innsang songah rintlak cengfa i ai Pathian in hmai lam can ah a rel leh tuhhnak khai rel thil i.

⁶ Ikhalselai Jesuh tu Pathian innsang ah hotu rinsantlak Pathian Fapa i. Kinmah ai umlamhnak tu thinlung kho ngai le ralpha ngai in pom lesingkhaw a innsang ising.

⁷ Ciamanin Rauhla Thianghlim in, “Tunnia Pathian aw za le i sikhaw,

⁸ Ning lung ruh mah ih, ning pupate Pathian engsan ai um awng bangin um mah ih; Hampalak ai Pathian cu tlang awng bangin um mah ih.

⁹ Pathian in, ‘Khiata ah ning pupate in i engsan ai i cu tlang awng i; kum sawmli song amahte caah i bawnhnak hmu tlang napui i,’ tiin ti i.

¹⁰ Ciamanin amahte vumah thin i raw ai, ‘Anite tu rintlak lo ngiode i,’ tiin ti i. I thupehnak hlun nuam tlang lo i,’ tiin ti i.

¹¹ Thin i raw ai, ‘Amahte cawlum tuhhnak hrangah i tihnak ram heh hleng tuh hrimhrim lo i, tiin thukham ing, tiin ti awng i,” tiin ti i.

¹² Sangtu u le naute, a nungmi Pathian hlum nuam khop tianin a pha lomi le sang lohnak thinlung ning nai tuh loin ralring tu ih.

¹³ Ciahnak tahin sualhnak in ning zawl tuh loin le ning lungruh tuh loin Lai Thianghlim in, “Tunnia,” a tihnak pongfang heh kin caah sullam a nai songah, nisiar in pakhat le pakhat bawm dun tu sawn ih.

¹⁴ Zaimantifangin a hampan in kin co awnghnak hlamuanghnak heh a tawp tian kho ngai in pom lesingkhaw kin veksen in Khrih ai rualpui kin cang tuh i.

¹⁵ Lai Thianghlim, “Tunnia ah, Pathian aw za le i sikhaw, ning pupate in Pathian engsan awng bangin ning lungruh mah ih,” ti i.

¹⁶ Aisu in Pathian aw za ai a tawngtu i? Egypt ram in Moses in a hoisuak mite i.

¹⁷ Aisu vumah Pathian heh kum sawmli song a thinraw i cang ta? Nelrawn ramkhing lakah sual ai a thi mite vumah i.

¹⁸ Pathian in thukham in, “Amahte cawlumhnak tuhin i tihnak ram heh hleng tlang tuh hrimhrim lo i,” a ti fangin a ti nuam sanmi tu aisute i cang ta? Amah Pathian tawngcaitute i.

¹⁹ Ciatih ilekhaw a thukhamhnak ram songah anite lut thil lohnak tu sang awng lo manin i, ti hmu thil ising.