Hebru 2 - Zanniat Bible

Nunohnak Thawmlian

¹ Ciatih imanin lampeng hlun in pial tuh loin kin lingciahnak thutak heh kho amam in pom kul ising.

² Vancungmi in kin pupate hnenah a pehnak thu heh a dikmi i tiin larruai ai ciami thu a ngai lomi le a hlun lo mite tu cawh tlak i ai cawhhnak tuar tuh i.

³ Ciatih ilekhaw kin in hetluk in nunohnak thawmlian heh zaikhai siar hlah lesingkhaw akontih in cawhhnak in kin luat thil tuh i? Bawipa amah rori in he nunohnak thu heh a hmasaber ah than ai amah a lingtu hmuahhmuah in a dik zia heh kin hnenah larruai zo i.

⁴ Cen anite ai lingpuihnak dik i, ti linghnak ah Pathian in ngaihsunurkul le larhnak a phunphun bawn ai Amah ai daihhnak bangin Rauhla Thianghlim ai lehsawng zem tlang ṭen i.

Nunohnak Ai Kin Hoitu

⁵ Pathian in a hleng tuhhnak a thu kin relhnak lai thar uktu tuhin vancungmi dah awng lo i.

⁶ Ciahnak tahin, Lai Thianghlim in hmun khatkhat ah, “Aw Pathian, minung tu ziang i ai panhlah ṭiode isi? Mihing ta lamlam ziang i ai a zawnruat isi?

⁷ Vancungmi tahin niam deuh ah can comniu song bawn isi; songlawihnak le upathnak lukhuk khuruai ai,

⁸ Zaizongza uktu ah bawn isi,” ti i. Pathian in minung tu, “Zaizongza uktu ah bawn i,” ti i. Zaizongza tihnak songah zaihinkhim tel i. Ikhalselai tunah minung heh zaizongza uktu i, ti hmu lai lo ing.

⁹ Ikhalselai Jesuh tu, Pathian ai ninghiohnak manin mi zongzong ca a thihnak tuh hrangah, ani tu can comniu song vancungmi tahin niam deuh ah bawn i ti hmu ising, Cen ciatih ai thihhnak a tuar manin tun ahcen songlawihnak le upathnak lukhuk khu in hmu ising.

¹⁰ Minung tampui in Pathian songlawihnak co thil ve tuhin zaizongza a bawntu le a nungruaitu Pathian in harsa tuarhnak songin Jesuh tu misemkhim ah bawn heh a dik i. Zaimantifangin Jesuh tu nunohnak ah amahte a hoitu i.

¹¹ Amah in minungte tu amahte sualhnak in thiangruai ai Amah le a thiangruai mi hmuahhmuah in Pa pakhat nai tlang i. Ciatih imanin Jesuh in anite tu ‘I unau,’ tiin ko tuhin zakthi lo i.

¹² Amah in Pathian hnenah, “Na bawnhnak heh i unaute hnenah rel tuh ing; Amahte taikhawmhnak ah thang na phat tuh ing,” ti i.

¹³ Ciahlaiah, “Pathian tu rinsan tuh ising,” ti ai, “Heta ah Pathian ai i pehnak naupangte hnenah um ing,” tiin ti fawn i.

¹⁴ Ciatihin, “Naupangte,” ti ai a kohnak a minungte tu thi le sa naimi minung imanin Jesuh khai anite bangin thi le sa nai ah cang ai minung ihnak thawn nung ve i. Hetih ai a bawn fangin a tumtekhnak tu amah a thihhnak in thihhnak vumah thu a naitu Satan heh siatsuah ai,

¹⁵ ciatihin amahte nunsong hmuahhmuah thihhnak kih ai sal bangin a nung mite luatruai tuhin i.

¹⁶ Zaimantifangin a bawmhnak mite tu vancungmite ilo i, ti fiang i. Lai Thianghlim in a relhnak bangin, “Abraham ai tesinfate bawm i,” ti i.

¹⁷ Ciatih imanin zaihinkhim ah a unaute bang cang ve kul ai ciatihin a canghnak tu minungte ai sualngaithiamhnak co thil tuhin Pathian na ruaihhnak ah rinsantlak le ninghiohnak naitu Suangbawi Sang a cangthilhnak tuhin i.

¹⁸ Amah rori in sualforhhnak le harsahnak a tuar zo manin tunah sualforhhnak a tuartute bawm ben i.