Hebru 13 - Zanniat Bible

Pathian Lungawiruaihnak

¹ Khristian unau ning imanin pakhat le pakhat it dun tu ngio ih.

² Ning inn ah mikhual tlungruai tu ilai ngaihhar tu ih. Ciatih bangin a bawntute in amahte lin loin a inn ah vancungmi tlungruai de i.

³ Thawngtote hai mah ih; anite thawn thawngto tlang bangin ruat dun tu ih. Harsahnak a tuartute hai mah ih; anite thawn a tuar tlang bangin ruat dun tu ih.

⁴ Hoidunhnak heh aisu inkhai upat hmaizah tuhhnak i. Nupui le pasal tu sangtlak in um tu veve seh. Nupa sualhnak a bawntu le kangkawm sualhnak a bawntute tu thukhanhnak tuar tlang tuh i.

⁵ Tangka daih ze mah ih; ning naihnak ah lungkhim tu ih. Zaimantifangin Pathian in, “Ning zam tuh lo ai ning hlum tuh lo ing,” kin ti i.

⁶ Ciatih imanin ralpha in um ngasing khaw, “Bawipa tu i bawmtu i, thin kin lau tuh lo i. Mi in kin vumah ziang bawn thil tuh i?” tiin ti ngasing.

⁷ Pathian thu ning reltu, hlanai ning konghoitute khiah hih tu ngio ih. Amahte nun songai nundan le amahte thihhnak thute khiah ruat leh tu ilai amahte sanghnak khai phatak ngai in cung tu ih.

⁸ Jesuh Khrih tu mizan, tunnia le kumzangza in kho ngio i.

⁹ Zirhhnak phun dangdang in lampui dik in ning pialruai maseh. Kin thin thahathnak heh, aihdin thula ah ai tuh, ai tuh lo tiin dan songin ngah loin, Pathian ninghiohnak songin ngah pha sawn i. Dan a hluntute tu ciami a hlunhnak dan in bawm cuanglo i.

¹⁰ Judah mite Pathian biahnak ai naruaihtu suangbawite in kin puleng vumai hibawlhnakte heh amahte daihdaih in ai thil lo i.

¹¹ Sumhnam thisan heh Judah mi Suangbawi Sang in sual hibawlhnak hrangah Hmun Thianghlim Ber songah lutpui i; ikhalselai ciami sumhnam ruangpum heh hnarpua ah tai tlang i.

¹² Ciatih imanin Jesuh a thi fangin mizapui sualhnak in a thisan thawn somciang tuhin Jesuh tu khuapui pualam ah thi i.

¹³ Ciamanin kin khai hnarpua ah feh in a tuarhnak zakthihnak tuar tlang ngasing.

¹⁴ Zaimantifangin he laivum ah kumzangza a khomi khuapui nai lo ising; a hleng tuhlai khuapui ian cuan tlang ising.

¹⁵ Ciamanin kin hibawlhnak tumrul ah thangphathnak heh Pathian hnenah pe tlang ṭio ngasing; ciatih ai kin pehnak heh kin ka in Jesuh kin Bawipa i tiin kin phuanghnak i.

¹⁶ Phathnak bawn heh hai mah ilai, ning naihnak midang thawn kawm tlang tuh khai hai mah ih; zaimantifangin ciami tu Pathian lungawiruaitu hibawlhnak i.

¹⁷ Ning konghoitute thu ngai tu ilai amahte thupehnak bangin hlun tu ih. Amahte naper dan heh Pathian hmaiah phuang tlang leh tuh sio manin cawlum loin ning kilkhawlhnak i. Amahte thu ngai le i sikhaw lungawi aipuang in amahte naper per tlang tuh i; amahte thu hlun hlah le i sikhaw lungsiahnak thawn per tlang tuhai ciami heh ning caah zaikhai hnempuihnak um tuh lo i.

¹⁸ Kin caah sawngen tu ṭio ih. A hmanmi heh bawn kin hiam ṭio imanin a hnawm a pha thiathiamhnak kin thinlung heh thiang i.

¹⁹ Ning hnenah Pathian in i hlengruai cing tuhin roh ngai in sawngen tu ih, tiin ning ngen ing.

A Tawphnak Sawngen

²⁰ Hibawlhnak ai a nun a pehnak manin Tuukhal Lian kin Bawipa Jesuh tu Pathian in thihhnak in thoruai zo i; Cen a thihhnak songin kumzangza thutiamhnak khiah khoruai zo i.

²¹ Daphnak Pathian in amah ai daihhnak ning bawn thil tuhin ning kulhnak thilpha hmuahhmuah ning pe tu hram seh; cen Jesuh Khrih hmangin a daihhnak heh kin songah bawn tu hram seh. Kumzangza in kumzangza tian Khrih tu songlawi in um tuseh! Amen.

A Tawphnak Ponkam

²² U le naute, lai i kuathnak heh a sau ze lo manin hetihin thapehnak thu i relhnak heh thinsau ngai in ngai tu ih, tiin ning ngen ing.

²³ Kin unau Timothy tu thawng songin suak zo i ti ning lingruai i hiam i. Hleng man lekhaw ningmah tawk tuhin i kawi fangin fehpui tuh ing.

²⁴ Ning konghoitute le Pathian minungte veksen hnenah kin hnuksathnak kin rel sah tu ih. Italy ramai a ummi unaute inkhai hnuk ning sat tlang i.

²⁵ Pathian ninghiohnak ning hnenah um tu hram seh.