Hebru 11 - Zanniat Bible

Sanghnak

¹ Sanghnak nai tihnak tu kin umlamhnak ngah tuh tengteng ising, ti sang le kin mit ai kin hmu thil lohnak um rori i, ti sang khiah i.

² Ciabang sanghnak nai tlang manin khuahlan minungte in Pathian ai lungkhimhnak co ngah tlang i.

³ Sanghnak kin naihnak manin lailung le vancung heh Pathian ai ponkam in bawnhnak i, ti ling i ing; ciamanin Pathian in hmu thil a bawnhnak ah hmuh thil lo hmang i.

⁴ Abel in Pathian a sang manin Pathian hnenah hibawl a selhnak tu Cain ai hibawlhnak tahin pha deuh i. A sanghnak manin Bawipa lungkhimhnak co ai midikcang ah cosang i, zaimantifangin a lehsawngte tu Pathian in co sah i. Abel tu thi zo napui a sanghnak songin mi hnenah thurel lai betbo i.

⁵ Enoch heh thi loin Pathian hnenah honcawi teuhnak heh a sanghnak manin i. Aisu inkhai a ruangpui hmu lo i, zaimantifangin Pathian in cawi teu i. Lai Thianghlim songah, “Pathian hnenah a cawi teu hlanah Enoch in Pathian lungawiruai i,” tiin um i.

⁶ Sanghnak loin aisu inkhai Pathian lungawiruai thil lo i; zaimantifangin Pathian a nongtu in Pathian um i, ti le amah a situ hnenah a si man lehsawng pe i, ti sang kul i.

⁷ Noah heh hmai lam thu ah Pathian in ralring pehnak a linghnak heh a sanghnak manin i. Pathian thu ngai in lawng bawn ai ciami lawng songah amah le a innsang himniu in luat i. Ciamanin lailung tu hnawlhnak tawk ai Noah tu a sanghnak manin dikcanghnak Pathian hnenin co i.

⁸ Abraham tu Pathian in na pe tuh ing tiin a thukhamhnak ram feh tuhin a ko fangin Pathian daihhnak a hlun thilhnak heh a sanghnak manin i. Konteng ramah feh tuh ing ti rin ling loin a khua le a ram heh hlum in feh i.

⁹ Pathian in a thukhamhnak ram songah sanghnak in mikhual cang in um i. Pathian ai thukhamhnak a cotu ve Isaac le Jacob bangin hlam songah um ve i.

¹⁰ Zaimantifangin Pathian in kumzangza kho tuhin ham a tohhnak, inn ruang ruat cia le a sahnak khuapui songah um tuhin iang i.

¹¹ Abraham tu tar ze zo ai Sarah khai fa nai thil nawn lo napui, pa ai cangthilhnak hathnak heh sanghnak thawmin i. Pathian in a thukhamhnak tu bawn sah tuh i tiin sang i.

¹² Abraham tu a thi cia zo tlukin ruat napui amah songin tesinfa van ai arsi zah le tipui kamai siar cawk lo runsiat zah in suak tlang i.

¹³ A vumai kin relhnak sanghnak naitute khiah a thi fangin sanghnak thawn thi tlang i. Pathian ai a thukhamhnak tu co ngah tlang lo napui a vanghla in hmu ai lungawi tlang thotho i; laivum ah mikhual le mi vakvai pawl i, ti khiah fiang ngai in phuang i.

¹⁴ Ciabang ai a lingduntute tu amahte co tuhhnak ram si tlang i, ti lar i.

¹⁵ Amahte hlumhnak ram heh pamhmaih tlang nawn lo i, pamhmaih awng ta selai lethnak can nai tlang tuh napui i.

¹⁶ Anite ai ruathnak le ngaihnak tu ram pha deuh sawn, vancung ram i. Ciamanin Pathian tu anite in, “Kin Pathian,” tiin ko tlang fangin Pathian zakthi lo i, zaimantifangin amahte caah khuapui bawn sah zo i.

¹⁷ Abraham tu Pathian in a cu fangin Pathian hnenah a fapa Isaac heh hibawlhnak ah a pe thil khiah a sanghnak manin i. Pathian ai thu a tiammi tu Abraham i, ikhalselai a fapa naihsun tu hibawlhnak ah sel tuhin ralring i.

¹⁸ Pathian in Abraham hnenah, “I thukhamhnak tesinfate tu Isaac ai sen mi i tuh i,” tiin ti i.

¹⁹ Abraham ai ruathnak ahcen Pathian in Isaac tu thihhnak in thoruai leh tuh i, tiin ruat ai a ruathnak bangin a thi zo tluk in a ruathnak Isaac heh a pa Abraham in a nung in tawk leh ngaingai i.

²⁰ Isaac in hmai lamah hmuifu ngah tuh i si tiin Jacob le Esau hmuifu a pehnak heh a sanghnak manin i.

²¹ Jacob in a thi banghma fangin Joseph ai fapate hmuifu a pe ṭen heh a sanghnak manin i. A faikiang lep kongin Pathian bia i.

²² Joseph tu a thi dawn inrin Israel mite Egypt ram in suak leh tuh i tiin a relhnak le a thi fangin a ruang heh akontih in bawn tuh tiin thu a cah thil heh a sanghnak manin i.

²³ Moses ai nu le pa in Moses a te hnua hla thum song thup ai a daihkul ze imanin Kumpibawi ai thupehnak el rin a lau kawm lohnak heh amahte sanghnak manin i.

²⁴ Moses a khang fangin Egypt kumpibawi fanu ai fapa tiin ko a daih lo heh a sanghnak manin i.

²⁵ Can comniu song sualhnak songah nunnuam in um tahin Pathian ai minungte thawn harsahnak tuar ril sawn i.

²⁶ Messiah caah nautathnak tuar heh Egypt ram songai lianhnak hmuahhmuah tahin man sawn i tiin ruat i; zaimantifangin a sunghnak hmai lamah a ngah tuhhnak tuarman lehsawng i.

²⁷ Moses tu Egypt ram kumpibawi thinrawhnak rin kih loin Egypt ram a zam ngamhnak heh a sanghnak manin i. Hmu thil lo Pathian hmu bangin sang ai let hiam hrimhrim lo i.

²⁸ Sanghnak a nai manin Kansuak Puai bawn ai dawngkham vumah thisan mat tuhin thupe i. Ciabang a bawnhnak heh Israel mi fapa upa ber pawl heh Mirektu vancungmite in rek maseh tica i.

²⁹ Sanghnak thawmin Israel mite in Tipui San heh lai ro bangin tan thil i; ikhalselai Egypt mite in tan tum ve fangin tiin khuk sek ai thi tlang sek i.

³⁰ Israel mite in ni sarih song hel tlang hnuaah Jericho khuapui kulhhnak vingpui a minruaitu heh sanghnak i.

³¹ Israel mi micultute a thup in hup manin Pathian thu ngai lo Jericho khua mite lakah hlotlaunu Rahab a thi ve lo heh a sanghnak manin i.

³² Rel betbo rih ngang maw? Gideon, Barak, Samson, Jephthah, David, Samuel le prophette ai thula rel tuh tampui um napui relhnak tikcucan um lo i.

³³ Sanghnak thawn ram tampui tawng ai neh tlang i. Thil dikcang bawn tlang ai Pathian thukhamhnak co tlang i. Chintitte ai ka cipruai i;

³⁴ Kihkul ngai mai hmit ai ralvang in rekhnak in luat tlang i. Mi ṭawnṭai inapui mi hat ngai in cang tlang i. Raltawng hat tlang ai ramdang ralkap tampui neh tlang i.

³⁵ Sanghnak thawmin nupangte ai songkhatte thihhnak in nungruai lehsal i. Midangte tu nunhnak pha sawn ai thoruai leh tuh daih tlang manin luathnak ril loin reemhnak songah thih ril tlang sawn i.

³⁶ Mihrekkhat tu zohsuam le vit tuar tlang i; mi hrekkhat tu thir cikcin in khit ai thawng ah toh i.

³⁷ Lungto in sep ai thihhnak tuar tlang i, hluah in tan hnih tanhnak tuar ai ralvang in rekhnak tuar tlang i; tuu phaw le mephaw sil in hmun cangcang ah vakvai tlang i; farah tlang ai reemhnak le hnawmcanhnak tuar tlang i.

³⁸ Amahte caah laivum heh umhnak pha i nawn lo i! Ral tlanmi bangin hampalak le mual ahkhai vakvai ai lungkhukua le lai kua songah um tlang i.

³⁹ Sanghnak nai tlang manin hemite hmuahhmuah heh zaitlukin porh tlak i! Ikhalselai Pathian in a thukhamciahnak ngah tlang lai lo i,

⁴⁰ zaimantifangin Pathian in kin caah khuakhanhnak pha deuh a nai manin i. A tumtekhnak ngaingai tu kinmah thawn kin hmunkhat hnuaah semkhimhnak ngah tuh ising tihnak i.