Hebru 10 - Zanniat Bible

¹ Judah mite ai dan cenin a ngaingai heh felniu le khimniu in larruai thil lo i; a hleng tuhhnak thil pha ai a hla ian i. Amahte bawn kel hibawlhnak heh kumsiar in bawn de i. Ciatih ilekhaw akontih in dan in a ruaihnak bang hibawlhnak hmang in Pathian hnen a kawitu minungte heh mi semkhim in bawn thil tuh i?

² Pathian a biatute amahte sualhnak in cianghlimruai ngaingai iselai sual i ing ti thinlung nai tlang tuh nawn lo ai hibawlhnak hmuahhmuah um tuh nawn lo i.

³ Ikhalselai thil umdan ngaingai ahcen kumsiar in amahte sual linghnak tuhin hibawlhnak sawn i.

⁴ Zaimantifangin kawlpawcang le me thisan in sualhnak heh cianghlimruai thil lo i.

⁵ Ciamanin laivum ah Khrih a lar dawn fangin Pathian hnenah, “Hibawlhnak le selhnak tu na daihhnak ilo i; ikhalselai kaimah caah taksa pum remruat zo isi.

⁶ Sumhnam maitai hibawlhnak vumah lungkhimhnak nai lo i, sual cianghlimhnak tuhin hibawlhnak ahkhai anghnak nai cuanglo i.

⁷ Cen dan laibu songai i thula nganhnak bangin a hnenah, ‘Aw Pathian, na daihhnak bawn tuhin heta ah um ing,’ ti ing,” tiin rel i.

⁸ A hmasaber ah a relhnak tu, “Hibawlhnak le selhnak ituseh, puleng vumai sumhnam le sual cianghlimhnak hrangah hibawlhnak ituseh, na lungawi zawng le na daihhnak ilo i,” ti i. Hemi hibawlhnakte tu dan bangin bawnhnak inapui hebang in rel thotho i.

⁹ Cia hnuaah ani in, “Aw Pathian, na daihhnak bawn tuhin heta ah um ing,” tiin ti i. Ciamanin Pathian in hibawlhnak hlun pawl heh hnawl sek ai cia ca in Khrih hibawlhnak dah i.

¹⁰ Zaimantifangin Pathian in bawn tuh a daihhnak tu Jesuh Khrih in bawn sek manin amah ai taksa pum kumzangza hrang in a pedunhnak thawmin kin sualhnak in kin somciang i.

¹¹ Judah suangbawite in amahte ṭuanvo heh nisiar in bawn tlang ai amahte sel dehnak hibawlhnak tu vel tampui sel tlang i. Ikhalselai hibawlhnak in sualhnak tu somciang awng lo i.

¹² Ikhalselai Khrih in sualhnak hrangah hibawlhnak tu vel khat pe ai ciami tu kumzangza hrangah i; cia hnuaah Pathian kiahhan lamah to i.

¹³ Ciata in Pathian in a ralte a ke phah ah a bawn hlan song iang i.

¹⁴ Vel khat hibawlhnak in sualhnak in a somciang mite tu kumzangza misemkhim ah bawn i.

¹⁵ Cen Rauhla Thianghlim inkhai a lingpuihnak kin hnenah larruai i. A hmasaber ah Rauhla Thianghlim in,

¹⁶ “Hemi tu Bawipa ai ponkam i: Hmai lam can ah amahte thawn kin bawn tuhhnak thutiamhnak tu hetihin i; I dante a thinlung songah dah tuhai amahte ruathnak vumah ngan tuh ing,” ti i.

¹⁷ Ciahlaiah rel lehsal ai, “Amahte sualhnak le hnophnak tepawl tu hih tuh nawn lo ing,” tiin ti i.

¹⁸ Ciatih bangin amahte sualhnak ngaithiam lekhaw sual hibawlhnak kul nawn lo i.

Pathian Nong Ngasing

¹⁹ Ciamanin u le naute, Jesuh thihhnak thawmin Hmun Thianghlim Ber songai lut thil luathnak semkhim ngah zo ising.

²⁰ Amah in ponzar zik in lampui thar, lampui nung, kin hon zo i. Ciami ponzar tu amah ai taksa pum i.

²¹ Vancung ai Pathian innpui kilkhawltu tuhin Suangbawi Sang ber nai ising.

²² Ciamanin thinlung tak rori in le sanghnak fel thawn Pathian nong ngasing. Mawhhnak thinlung cianghlimruai mi le cianghlim ti thawn somciang mi kin taksa pum thawn Pathian nong tlang ngasing.

²³ Umlamhnak nai i ing tiin kin larruaihnak kho ngai in pom ngasing; zaimantifangin a thukhamhnak a khimruaitu Pathian heh rintlak i.

²⁴ Pakhat le pakhat zawnruathnak nai ngasing; pakhat le pakhat bawm dun in ithnak le phathnak khai larruai ṭen ngasing.

²⁵ Hmunkhat ai kin pumkhawm dehnak heh com hlah sing ih. Mihrek in com napui Bawipa ai Ni a nong zianzo manin, kin tu pakhat le pakhat thazang pe dun tuh amam ising.

²⁶ Thudik kin ling ngah hnuaah sualhnak ling kong in bawn betbo thotho lesingkhaw sual thianfai thilhnak tuhin sual hrangah hibawlhnak zaikhai um nawn lo i.

²⁷ Amahte caah a tanghnak covo tu a hleng cing tuh Pathian thukhanhnak le Pathian a tawngcaitute a kang sektu tuh a kihkul mai khiah lau kong in iang tuh lek ihang.

²⁸ Moses dan thu a hlun lotu heh thunaitu pahnih pathum in sual i tihnak in a thu relcathnak ah ninghiohnak zaikhai um loin rek i.

²⁹ Ciatih ilekhaw, Pathian Fapa zaisiar lotu le sualhnak in mi cianghlimruaitu Pathian thutiamhnak thisan nautattu le, ninghiohnak a naitu Rauhla a zohsuamtute tang zaibang in bawn tuh ini? Ciabang minung tu zaitlukin cawhhnak roh ngai tuar tuh i, ti khiah ruat tu ih!

³⁰ Zaimantifangin, “Kaimah in phuzul tuh ing, kaimah in rulthun tuh ing,” a ti hlaiah, “Bawipa in a minungte tu thukhan tuh i,” a titu aisu i ti ling i ing.

³¹ A nungmi Pathian kut songah tlok heh zaitlukin tihikkul i.

³² Hlan ai ning umdan ruat tucuk ih. Cialai ah Pathian tleuhnak ning hnenah a hleng sawng ah tuarhnak le harsahnak a phunphun tawk tlang napui ciami harsahnak in ning neh lo i.

³³ Vel khatkhat ah mizapui hmuh ah zohsuamhnak le reemhnak tawk tlang ai vel dang ah ciatih bangin zohsuamhnak le cawhhnak a tawktute tuarpui tlang i si.

³⁴ Harsahnak a tawkmi thawngto mite vumah ngaihharhnak nai tlang i si. Ning naihnak thilri hmuahhmuah ning sut sio fangin ning sunghnak heh anghnak in tuar ben i si. Zaimantifangin he thilri tahin in pha sawn le kumzangza a kho tuh nai lai ising ti ling i si.

³⁵ Ciamanin ning thin nau mah ih, zaimantifangin ralphahnak nai le i sikhaw lehsawng tampui ngah tuh i si.

³⁶ Pathian daihhnak bawn thil tuhin le a thukhamhnak co thil tuhin thinfual in um tu ih.

³⁷ Zaimantifangin Lai Thianghlim in, “Can comniu hnuaah a hleng tuh mi Ani tu hleng tuh i, rai tuh lo i.

³⁸ A dikcangmi a miphun in sang tuhai nung tuh i; Ikhalselai khellettu um lekhaw, amahte vumah lung i awi tuh lo i,” ti i.

³⁹ Kin tu khel lamah let ai a pairal mite ilo i ing. Sanghnak nai in nunohnak a cotu sawn i ing.