Hebru 1 - Zanniat Bible

Fapa Songin Pathian Ai Pongkam

¹ Hlanlai ah Pathian in kin pupate hnenah vel tampui a phunphun in prophette hmangin thu rel awng i.

² Ikhalselai he ni hnuataber lam ahcen kin hnenah a Fapa songin rel i. Ciami a Fapa hmangin Pathian in lai le van semsuah ai a tawphnak ah zaizongza naitu sio tuhin Amah heh ril i.

³ Ani tu Pathian songlawihnak larruaitu i ai Pathian ihnak semkhim nai i. Huham a naimi a thu in lailung le vancung khiah cawm ai kilkhawl i. Minungte ai sualngaithiamhnak le sual ṭawlcianghnak a bawn ben sek hnuaah vancung ah Cungnungber Pathian ai kiahhan lamah to i.

Pathian Fapa Ai Thawmlian Zia

⁴ Pathian in a Fapa hnenah a pehnak hming tu vancungmite ai hming tahin a cungnung sawn bangin a Fapa tu vancungmite tahin cungnung sawn in dah i.

⁵ Zaimantifangin Pathian in zaibang vancungmi khai: “Nang tu i Fapa isi; Tunnia ah na Pa ah i cang zo i,” ti awng lo i. Ciahlaiah zaibang vancungmi thu ahkhai, “Kai tu na Pa i tuhai, ani tu i Fa i tuh i,” ti awng lo i.

⁶ Ikhalselai Pathian in a Fa upa ber lailung ah a hlat fangin, “Pathian ai vancungmi hmuahhmuah in amah bia tlang tuh i,” tiin ti i.

⁷ Ikhalselai vancungmite thu ah, “Pathian in vancungmite tu hlivua ah bawn ai, A cengfate tu mai ah bawn i,” ti i.

⁸ Cen a Fapa thu ah Pathian in, “Nang tu Pathian isi ai, na bawi tohkham heh kumzangza in kho tuh i; Na minungte dikcanghnak in uk tuh isi.

⁹ Dikcanghnak na daih ai sualhnak na hua i. Ciamanin Pathian, Na Pathian in na ril ai, Na ruapuite hnenah pehnak tahin a lian cuang upat songlawihnak na pe i,” ti i.

¹⁰ “Cen Bawipa nangmah in a hampan ah laipua heh semsuah ai, Na kut rori in vante khai bawn isi.

¹¹ Ciamite tu pairal tuh i, ikhalselai nang tu na kho tuh i. Anite tu hnikpon bangin her tuh i.

¹² Angki bangin nang in hlep tuhai hnikpon bangin thleng tuh sek isi. Ikhalselai nang tu nangmah kel tuh ngio ai na nunhnak tu bo nia rel tuh lo i,” ti i.

¹³ Pathian in vancungmi hnenah, “Na ralte tu na kephah ah i dah hlanlo, i kiahhan lamah to tu,” ti awng lo i.

¹⁴ Ciatih ilekhaw vancungmite tu aisute ini? Anite tu Pathian naruaihtu rauhlate i ai nunohnak a ngahtu tuh pawl bawm tuhin Pathian in a hlathnak mite i.