Haggai 2 - Zanniat Bible

Biakinn Thar Mawihnak

¹ Cia kum hla sarih hla, ni kul hluankhat nia ah Bawipa ponkam tu prophet Haggai hnenah hleng lala i.

² Haggai tu Judah ram uktu bawi Zerubbabel, Suangbawi Sang Joshua le misenpui hnenah thu rel tuhin ruai i.

³ “A hmasa Biakinn heh zaitlukin mawi i, ningmah lakah a hihtu pakhat tal um aw i sim? Tunah akontih in hmu i si? Tun tu zaikhai ilo i, ti tuh i si.

⁴ Ikhalselai aisu khai ning thinhnawm in tha ning nau maseh. Naper tu ih, ning hnenah um ing.

⁵ Egypt in ning suak awng laiah ning hnenah um tuh ngiode ing, tiin thu ning kham awng ing. Tun ahkhai ning hnenah um ing; ciamanin ning thinlau mah ih.

⁶ “A rai hlanah van le lai, lairam le tifingriatte heh hlin tuh dekdo ing.

⁷ Miphun hmuahhmuah kaimah in lon tuh sek ai a sumsaw le a hlawnthilte heta ah koih tlang tuh i. Ciatihin he Biakinn heh lianhnak in dim tuh i.

⁸ Laivum ai sui le ngun hmuahhmuah kaimah ai i.

⁹ Biakinn thar tu a hlun tahin a thawmlian tuh sawn ai ciata ah i minungte khangsohnak le lungmuanghnak pe tuh ing,” ti i. Cungnungber Bawipa in rel zo i.

¹⁰ Dairus in kumpimangbawi a cang kum hnihhnak, hla kua hla, ni kul hluanli nia ah Cungnungber Bawipa in prophet Haggai hnenah rel lala i.

¹¹ “Suangbawite hetihin thuzawt tucuk:

¹² Santehhnak ah mi pakhatkhat in hibawlhnak ai selhnak sa cianghlim songin a hrekkhat lang in a pon in fun in fehpui selai ciami pon in sangreu maw, rong suang cia maw, cabitti maw, olive thau maw, ihlahle rong phun khatkhat maw khing ngah pang selai ciami a khinghnak tu a cianghlimmi songah cang thil nga im?” ti i. Ciatihin a zawt fangin suangbawite in, “Cang tuh lo i,” ti tlang i.

¹³ Cen Haggai in, “Santehhnak ah mi pakhatkhat in mithi luang a dai manin mi ningrim ah cang i, ti singlai. A vum lamai kin relhnak ti le rong heh dai selai, ti le rong ningrim ah cang ve ni im?” tiin zawt i. Suangbawite in, “Cang tuh i,” ti i.

¹⁴ Ciafangin Haggai in, “Bawipa cenin, mi ningrim pakhat in a daihnak ti le rong heh ti le rong ningrim ah a cang bangin he ram minungte le amahte cinghnak ti le rong vum ahkhai cang tuh ve i; ciamanin puleng vumah a selhnak thil hmuahhmuah thil ningrim cang sio i,” tiin rel i.

Bawipa Ai Hmuifu Thukhamhnak

¹⁵ Bawipa in, “Ning vumai a hlenghnak heh lingthiam lo i sim? Biakinn ning saleh hlan ahcen,

¹⁶ Ning lo rong bawm kul ngah tuhin um napui bawm hra ian ngah de i si. Ralca bel in cabitti pung sawmnga ngah tuhin ruat napui pung kul ian ngah de i si.

¹⁷ Ning cinghnak hmuahhmuah siatsuahtu tuhin a roh ngai hlivua le rial hlat ing, ikhalselai sir nuam cuang lo i si.

¹⁸ Tun nia heh hla kua hla, ni kul hluanli nia i ai Biakinn hampui naper a ben nia i. Tunai panin thil a hleng tuhhnak phatak niu in sik tu ih.

¹⁹ Fang um nawn lo ai cabit thai le thaihmin le olive thaite um lai lo napui, tunai panin hmuifu ning pe tuh ing,” tiin ti i.

Bawipa Ai Zerubbabel Thukhamhnak

²⁰ Ciami ni kul hluanli nia, hla kua hla ahcen Bawipa ai ponka Haggai hnenah a vel hnihhnak hleng i.

²¹ Judah ram uktu bawi Zerubbabel hnenah hetihin pong tuhin i ruai i: “A rai hlanah van le lai heh hlin tuh dek ai,

²² a ram ukhnak khai lon tuh sek ai a hathnak boruai tuh sek ing. Siphuhleng le a mawngtute bungbaleh tuh sek ing: siphuhte tu thi tuhai a totute pakhat le pakhat rek dun tuh i.

²³ Cia nia ahcen nang i cengfa Zerubbabel, i hming in ram uktu ah na bawn tuh ing. “Kaimah ai thaupawh mi isi,” tiin ti i. Cungnungber Bawipa in ti i.