Habakkuk 3 - Zanniat Bible

Habakkuk Sawngenhnak

¹ Prophet Habakkuk sawngenhnak tu hetihin i:

² Aw Bawipa, na thil bawnhnak za zo ing, ngaihsunurkul ngaingai i. Na thil bawnhnak tepawl tu a thar in Kin san ah bawn leh tu hram. Thin na raw lai ahkhai Kin vumah ninghiohnak nai tu hram.

³ Pathian tu Edom in kawi leh i. Pathian thianghlim tu Paran tlang in kawi i. A songlawihnak in van khuk i, A thangphathnak tu laivum ah dim i.

⁴ A kawi fangin vantlingtleleuh bangin tleu i, A kut songin tleuhnak suak zutzo i; Ciata ah a hathnak tu thup sio i.

⁵ Urhnak a hmaiah hlat ai, Thihhnak tu a khel lamin hlun tuhin thupe i.

⁶ Amah a com fangin laipua hlin durdo i; A mit sik menma ah miphun cang hlawng hlulhhlo i. Kumzangza khohnak tlangsangpuite tu khoi sek i, Santong tianin a umhnak mualtlangta tu phum sio i. Hlanlai ai a hlum dehnak mualtlangta khiah!

⁷ Cushan mite thinlau in a um hmu ing; Midian mite khai hlawng i.

⁸ Bawipa, runpui in na thin na tok im? Tifingriat in thin na rawtiar im? Nang tu mairo vumah to isi, Khuahupui tu na siphuhleng i; Na minungte hnenah nehhnak na pe fangin khiah.

⁹ Na li khiah er ai na conkiang sai tuhin en isi. Na vantlingtleleuh in laipua khiah tlam berh i.

¹⁰ Tlangsangte in nangmah a hmu fangin hlawng thlurhthlo i. Van in ti lai i. Lai hnia ti tu pau dekdo i, Tilep tu sang ngai in tho i.

¹¹ Na conkiang tleu zutzo in a suak fangin le, Na faipui tleu zutzo in a zuang fangin khiah, Ni le hlapuite khai amahte umhnak ah ding kawm i.

¹² Na thinraw in laipua fon isi, Na thinraw in miphunte rial isi.

¹³ Ikhalselai na minungte hup tuhin suak isi, Thau na pawh mite hup tuhin. Mihrokhrawl pawl ai hotu khiah sat berh si ai, A hnuahlunte tu siatsuah sek isi.

¹⁴ Na conkiang in a ralkap hotu bawi kha lio i, Kinmah piakruai tuhin khuahu bangin a kawi fangin khiah! Thupruk in mifarah a naunehtu bangin, Kinmah hnihsan kongin a kawi fangin khiah!

¹⁵ Na siphuhte thawn tifingriat na rah fangin khiah, a thawmlian tipui tu phul hluahhlo i.

¹⁶ Ciamite i za fangin i hlawng i, I kahmur tu lauhnak in hlin derdo i. I ruangpui tu mer thil nawn lo i, I kete tlu i, i dingpui lo i. Kinmah kin tawngtute Pathian in a cawh can, Thinsau in iang tuh ing, a hleng tuhlai can khiah!

¹⁷ Thaikung in a thai nai lo ai Cabit kuang in cabit thai lo inkhai Olive kung ai olive thai hnawm sio ai, Lo in rong a suak lo inkhai, Tuute thi sek ai, Kawlpaw inn lawng sek inkhai,

¹⁸ Angin thin i nuam tuh thotho i; Zaimantifangin Bawipa Pathian tu i otu i.

¹⁹ Cungnungber Bawipa in thazang i pe i; Kiho bangin i ke i khoruai i, Tlangsang vumah a himniu in i dah i.