Habakkuk 2 - Zanniat Bible

Pathian In Habakkuk Thusawn I

¹ I ralvilhnak sardonsang ah kai tuhai Bawipa in i pong tuhhnak zaibang i rel tuh i ti le i phuncamhnak khiah akontih in i sawn tuh i, ti iang tuh ing.

² Bawipa in hetihin i rel i, “Na hnenai i larruaihnak tu vel khat sik pah in siar thil tuhin lungtlep vumah fiang ngai in ngan tu.

³ Pha ngai in ngan tu, zaimantifangin a khimhnak can ilai lo i. Ikhalselai ciami can tu rang ngai in hleng tuhai i hmuhhnak khiah khim tuh ngaingai i. A khimhnak can khuahnua bang tuh napui thinsau in iang tu; khim tuh tengteng ai a can khuahnua tuh nawn lo i.

⁴ Ciami thu tu: ‘Mihrokhrawl pawl tu luat tuh lo i; ikhalselai midikcangte tu Pathian rinsantlak a imanin nung tuh i,’ ti khiah i,” tiin ti i.

Midikcang Lo Pawl Bo I

⁵ Lianhnak tu mi zawl hmang i. Miduhhamte tu puarthau ai dap niu in um thil lo i: thihhnak bangin kham ti nai awng lo i. Mithi khua Shoel bang i: ca zo hang ti awng lo i. Ciamanin i miphun pakhat hnua pakhat amahte ca ian ah neh dekdo i.

⁶ Nehtute in neh mite khiah sawi tuhai nautathnak larruai tuh i. “Ningmah ai lo lang i si; ikhalselai ning bo tuh i. Ning hnenah laiba a naitute laiba rul tuhin khengkhebel in ngen ai ning lian amam i; zaikom tian ciatihin laileng tuhlai i si?” ti tuh i.

⁷ Ikhalselai ning ling man hlanah, minehtu ningte heh laiba naitu ah ning cang tuh ve ai midang in paisa khang pe tuhin khengkhebel in ning ngen tuh ve i. Ralte kawi tuhai ning lau ze manin hlawng derdo in ning bawn tuh i. Ning rok tuh dekdo i!

⁸ Miphun tampui khiah nangmah in rok isi. Ikhalselai a nungsunte in, mi tampui na rek zo manin le laivum pumpuhluk khuapuite le a minungte na hnawmcan sek manin na rok tlang tuh ve i.

⁹ Na bo ihang! Midang siatsuah in na innsang tu lianruai isi; na umhnak inn tu siatsuahhnak le thinlauhnak in him tuseh tiin ngaisung dekdo isi.

¹⁰ Ikhalselai na ngaisunghnak tu a lovang i, na innsang zakthihnak a hlengruaitu sawn i. Miphun tampui na siatsuahhnak in nangmah vumah siatsuahhnak hlengruai zo isi.

¹¹ Khantianghnak ai lungto rin nangmah ralcai in au tuhai innbo in awkhawk in sawn tuh i.

¹² Na bo ihang! Khuapui khiah mi siatsuahhnak thawn nangmah in din si ai mirekhnak thawn sa isi.

¹³ Na nehhnak miphunte in amahte tha bo tianin thil hnempui lo naper per ai a saciahnakte tu mai in kang sek i. Ciami tu Cungnungber Bawipa in thil bawnhnak i.

¹⁴ Ikhalselai tifingriat tu tidap in a dim bangin laivum tu Bawipa ai songlawi zia lingthiamhnak in dim tuh i.

¹⁵ Na bo ihang! Na thinraw in na ompuite zakthi in bawn si ai mualphotiar isi; zu ri bangin tluruai isi.

¹⁶ Ciamanin nang khai upathnak cotu ilo in zakthihnak in na dim tuh i. Nangmah rori zu ding tuhai na sawn na tlu tuh i. Bawipa in nangmah cawhhnak khuat na dingruai tuhai upat hmingphahnak na naihnak heh mualphohnak ah cang tuh i.

¹⁷ Lebanon tupui ai thing vawng sek isi; tun tu nangmah vawnghnak tuar tuh isi. A ramsate rek isi; tun tu ramsate kihhnak thawn na dim tuh i. Laivum pumpuhluk minung le a khuapuite na siatsuah manin le minung tampui na rek manin he bangin na vumah hleng tuh i.

¹⁸ Milim in ziang hnempuihnak nai i? Minung ai bawn fawmhnak thil pakhat menma i ai thudon ti siar lo a relthilhnak zaikhai um lo i. Milim bawntu in a bawnhnak khiah a rinsan fangin amah caah ziang hnempui i? Pong rin a pong thil lomi khuavang khiah!

¹⁹ Na bo lawlaw ihang! Thingtan hnenah, “Phawk tu,” ti isi. Lungtlep khat hnenah, “Tho tu,” ti isi. Milim in na hnenah larruai thilhnak zaital nai awm? Sui le ngun in khuthnak i tuh napui a songah nunhnak um lo i.

²⁰ Bawipa tu a Biakinn thianghlim songah um i. A hmaiah laivum mi hmuahhmuah dap niu in um tuseh.