Galati 5 - Zanniat Bible

Ning Luathnak Kilkhawl Tu Ih

¹ Khrih in kin luatruai zo ai kin luat zo i. Ciamanin kho ngai in ding tu ilai sal cang leh nuam mah ih.

² I relhnak ngai tu ih: ningmah lala zarhtan le i sikhaw Khirh tu ning caah zaikhai hnempuihnak nai hrimhrim lo i, tihnak i.

³ Ralring thu not leh tuh ing: aisu khai ningmah lala zarhtan le i sikhaw dan a veksen in hlun kul sio i.

⁴ Ningmah lakah dan hlun in Pathian hmaiah dikcangruai a cang tumtu heh Khrih thawn ning pehzomhnak ri satcat zo i si. Cialek zolo in, Pathian ninghiohnak ai pualam hleng zo i si.

⁵ Ikhalselai kin ai umlamhnak tu Pathian Amah in dik kin cangruai tuh, tihnak i. Ciami tu kin sanghnak thawmin Pathian Rauhla ai huham in bawn sah tuh tiin kin ianghnak ngelngo i.

⁶ Zaimantifangin Khrih Jesuh thawn pehzom lesingkhaw zarhtan ituseh tan lo ituseh dang nawn lo i. A thupui tu ithnak thawn napertu sanghnak ian i.

⁷ Ning fehdan pha ngai hlen i. Thudik hlun heh aisu in ning zawl manin awl i si?

⁸ Ning awlruaitu heh Pathian le ibang hlah. Ani tu ning kotu sawn i.

⁹ “Col cikniu in sanghlom veksen thoruai i,” ti dehnak a khim ngaingai ihang!

¹⁰ Ikhalselai ning caah thin i hnawm lo i. Kin Bawipa songai kin pehzomdunhnak manin ning thinlung lamdang tuh lo i ti khiah sang hlen ing. Ning naunehtu heh, aisu ita inkhai, Pathian ai cawhhnak tawk tuh i.

¹¹ U le naute, zarhtan kul i tiin thu ning rel inglai zaimanin cawhhnak tuar lai ini ing? Ciatihin thu rel peu inglai, Khrih ai thinglamteh thu i relhnak heh mi bahhnak ah cang tuh lo i.

¹² Ning hnaihnoktute heh amahte lampui hlun lawlaw in amahte til ret lawlaw selai i daih i!

¹³ U le naute, ning tu miluat cang tuhin komi i si. Ikhalselai ciami luathnak heh ning taksa diriamhnak ah cangruai mah ih. Ciahnak tahin ithnak in pakhat le pakhat ruaih in bawm dun tu ih.

¹⁴ Zaimantifangin dan hmuahhmuah heh, “Nangmah na it dun bangin na innhnen it tu,” tihnak thukham pakhat songah khim sek i.

¹⁵ Ikhalselai hampalak ramsa bangin ning nung ai pakhat le pakhat ngeu dun dawp dun le i sikhaw ralring tu ih, ning pairal leh tuh i.

Rauhla Nunhnak Le Minung Tisa

¹⁶ I rel nuamhnak tu hetihin i: Rauhla in ning nundan uk lekhaw minung tisa hiamhnak heh thinriamruai tuh lo i si.

¹⁷ Zaimantifangin minung tisa daihhnak le Rauhla diahhnak tu a ral dun i. Minung tisa daihhnak tu Rauhla in hua ai Rauhla daihhnak tu tisa in hua ve i. Hemite pahnih tu hua dun i. Ciamanin i ning daihhnak bawn thil lo i si.

¹⁸ Rauhla in ning hoi lekhaw dan ai ukhnak i nawn lo i si.

¹⁹ Cen minung tisa ai a bawnhnak tepawl khai fiang ngai in lar i: nupa sualhnak, ziaza cianghlimlo, thilmawi lo bawnhnak,

²⁰ milim biahnak le dawi le hnam, pakhat le pakhat raldunhnak le tawngdunhnak, pamhaphnak le rem dun loin khekdunhnak;

²¹ iksikhnak, zurihnak, mitsih mawi loin lam le auhnak le hebang a dangdang tampui amahte bawn betbohnak tepawl i. Ralringhnak thu hmasa ai i rel zohnak bangin not leh tuh thio ing: ciabang a bawntute tu Pathian Ukhnak co thil tuh lo i.

²² Ikhalselai Rauhla ai a thaite tu ithnak, anghnak, muanghnak, thinsauhnak, ninghiohnak, phathnak, rintlakhnak,

²³ nunnem thinniamhnak le supbenhnak tepawl i. Ciabang thai umhnak ah dan kul nawn lo i.

²⁴ Cen Jesuh Khrih ai mite in amahte taksa hiamhnak le daihhnak tepawl heh thinglamteh vumah khenbet zo i.

²⁵ Rauhla in nunhnak kin pe zo manin kin nunhnak khai heh Rauhla Amah in uk tuh i.

²⁶ Hngal tuh ilo ising; pakhat le pakhat thin harruai dun tuh lo ising; iksik dun tuh lo ising.