Filipi 3 - Zanniat Bible

Dikcanghnak Taktak

¹ Thutawphnak ah i rel nuamhnak tu, u le naute, Bawipa thawn ning pawlkomhnak songah ning lungawi tu ih. A hmasa ai ning hnenah i nganciahnak ngan leh heh poi ti lo ing. Thungai in ti fangin ngan lehsal heh ning caah huphimtu tuh sawn i.

² Uicote heh ralring tu ih, thil sual a bawntute heh ralring tu ih, zarh a tantute heh ralring tu ih.

³ Anite ilo in kinmah sawn heh a dikmi zarhtanhnak a cotute ising; zaimantifangin Rauhla in Pathian bia tlang ai kin nunhnak tu Khrih Jesuh thawn kin pawlkomhnak manin anghnak in dim i. A pualam ai bawnhnak vumah zaikhai rinsanhnak nai lo i ing.

⁴ Ciabang a pualam hluntute rinsan nuam inglai rinsan thil ve hlen ing. Aisusu khai pualam ai hlunhnak thil rinsan i tiin i ruat lekhaw ciami pa tahin tam amam ruat tuh sawnhnak ing.

⁵ Niriat i khim fangin zarhtanhnak co ing; suahkehhnak lamin Israel miphun, Benjamin hin, Hebrew cit ing. Judah dan hlun lamah Farasi mi ing.

⁶ Ciami ah ṭang ze ai Khristiante reem ing. Dan hlun in midikcang cangthilhnak lamah kaimah mawh nai lo ing.

⁷ Ikhalselai hnempuihnak ai i ruathnak hebang thilte heh tuh ahcen Khrih manin a veksen in sunghnak ah ruat zo sek ing.

⁸ Hemi thilte ian ilo i; thildang zaizongza khai zaizongza tahin a songlawi sawn i Bawipa Khrih Jesuh i linghnak manin sunghnak pittawp ah ruat ing. Amah manin zaizongza lon sek ing; Khrih i co thilhnak tuhin le,

⁹ amah thawn a semkhim in pawlkom tuhin zaizongza heh hnawmborh menma bangin ruat ing. Kaimah niu in dikcanghnak nai nawn lo ing; dan hlun in ngahhnak dikcanghnak khiah nai nawn lo ing. Tunai dikcanghnak i naihnak tu Khrih sanghnak manin pehnak dikcanghnak i; sanghnak songin Pathian hnenin kin ngahhnak dikcanghnak i.

¹⁰ I daihhnak tu Khrih le a tholehhnak ai hathnak heh tep ve selai, a tuarhnak le a thihhnak ahkhai tel ve selai,

¹¹ ciatihin thihhnak in nunhnak ah thoruai leh mi cang tuh ve in i umlamhnak i.

Hmuisunghnak Lamah Dawp Ing

¹² Hetih ai i ti fangin, i hleng tumhnak hmun hleng zo ing, tihnak ilo i; i semkhim zo i tihnak khai i lo i. Khrih Jesuh in amah caah i pom ngah zo manin kaimah caah a dahhnak zuam man co tuhin hmai lamah nor hnelhno ing.

¹³ U le naute, ciami tu ngah zo ing, tiin ruat hrimhrim lo ing. I bawnhnak tu pakhat ian i: i hnua lamai a liam sa thil heh hai sek in i hmai lamai umhnak khiah ban tuhin zuam hnelhno ing.

¹⁴ Ciamanin hmuisunghnak lamah zuam man ngah tuhin cang ngai in dawp ing. Cia zuam man heh Pathian in Khrih Jesuh songin kumkhua nung tuhin kin kohnak i.

¹⁵ Rauhla lamai puitling kin veksen in hebang thinlung nai tuh ṭenhnak ising. Ikhalselai mi hrekkhat in thinlung umdan dang nai lekhaw ciami tu Pathian in fiang ngai in ning hnenah larruai tuh i.

¹⁶ Ciahlan song tu, tunnia tian kin hlunhnak dan hlun in hmai lam feh tlang ngasing.

¹⁷ U le naute, i nundan heh i cung tu ṭio ih. Ning sik tuhin ning hmaiah santeh tuh pha kinmah in dah zo ai ciami a hluntute khiah sik tu ngio ih.

¹⁸ Mi tampui tu amahte nundan manin Khrih thinglamteh ai ral ah cang tlang ti khiah ning rel de bangin tun ahkhai mithli thawn ning rel lehthio ing.

¹⁹ Ciamite tu hell ah hleng tuh i, zaimantifangin amahte pathian tu amahte daihhnak ian i. Amahte thil bawnhnak heh zakthipui tlak napui amahte hmaihngalhnak ah cang lehlam i; he laivum thilte lek ruat tlang i.

²⁰ Ikhalselai kin tu vancung ram minung ising ai, kin otu Bawipa Jesuh Khrih vancung in a hleng tuh iang tlang ising.

²¹ Amah in ṭawnṭai ai a thi thaimi kin pumsa ruangpui heh a songlawi mi amah ai ruangpui bangin thleng tuh i; ciami bawn tuhin zaizongza amah ai ukhnak hnia ai dah thilhnak huham a naihnak khiah hmang tuh i.