Filipi 2 - Zanniat Bible

Khrih Thinniamhnak Le A Thawmlianhnak

¹ Khrih thawn ning pawlkomhnak manin ning nunhnak kho cuang ai a ithnak in ning muangruai i. Rauhla thawn pawlkomhnak nai ai pakhat le pakhat vumah ninghio ngaihharhnak nai ilo i sim?

² Ciatih ilekhaw hetihin ning forh i nuam i: ning ruathnak hmunkhat tuseh, ithnak ahkhai pakhat le pakhat it dun tu ih; ning thinlung le ning tumhnak khai bangvek tu selai ciatihin anghnak i naihnak heh khimruai tuh amam i si.

³ Mi iksikhnak nai in, mah ca ian ruat ai mah hmingphahnak lek si in zaikhai bawn mah ih. Pakhat le pakhat thinniamhnak thinlung nai tu ilai midang tahin i pha deuh i, tiin zaikom inkhai ruat dun mah ih.

⁴ Ningmah daihhnak lek ilo in midang in amahte caah a thupui ber ai ruathnak khiah a hmudan thiam tu ve ih.

⁵ Ning thinlung tu Khrih thinlung bang ituseh.

⁶ Khrih tu Pathian ihnak nai ṭio i; Ikhalselai Pathian bang tuhin khengkhebel in tum awng lo i.

⁷ Cia tahin, Amah ai lungtho niu in, amah ihnak hmuahhmuah zam ai, hnenum bangin um i. Minung ah cang ai mihing bangin suak ai mihing hmel in lar i.

⁸ Thinniamhnak thinlung nai ai Pathian thu hlun in, Thinglamteh ah thihhnak tianin tuar i.

⁹ Ciamanin a sang ber hmunah Pathian in cawisang ai, Hming hmuahhmuah lakah Cungnungber hming pe i.

¹⁰ Ciatih imanin Jesuh hming upathnak pe in, Vancung ai a ummi hmuahhmuah in ituseh, Laivum le laihnia ai ummi hmuahhmuah inkhai ituseh, khuk caicin tlang tuhai,

¹¹ Jesuh Khrih tu Bawi i, tiin Pa Pathian songlawihnak ah amahte veksen in phuang tuh i.

Arsi Bangin Tleu Tu Ih

¹² Ciamanin, i ithnak i rualpuite, ning hnen i um laiah i thu ning hlun ngiode bangin le, ciatah in rin a thupui sawn tu ning hnenah i um lo can ahkhai i thu hlun tuh khiah i. Nunohnak semkhim ning ngahhnak tuhin kihzah le hlawng kongin per tu hnelhno ih.

¹³ Zaimantifangin amah ai tumtekhnak daih tuhin le bawn ben tuhin Pathian tu ning songah naper i.

¹⁴ Zaizai ning bawn ita inkhai cam hnelhno le el dun hnelhno mah ih.

¹⁵ Ciatihin he laivum mihrokhrawl le misualte lakah a ummi ningte tu a semkhimmi Pathian ai fapa, mawh nai lo le mithiang ah ning cang tuh i. Van ai arsi tleu bangin laivum mite lakah tleu tu ih.

¹⁶ Nunhnak thu ning phuang laiah ciatih bangin tleu tu ih. Ciatihin Khrih Nia ah hmaihngalhnak nai tuhai i naperhnak le i zuamhnak hmuahhmuah heh a lovang ilo i ti lar tuh i.

¹⁷ Rekhnak tuar in i nunhnak thisan heh ning sanghnak Pathian hnenai hibawlhnak bangin ning selhnak vumah burh i ta inkhai ciami tu i anghnak i tuh pah ai ning veksen in ciami i anghnak khiah ning kawmpui i nuam i.

¹⁸ Ciabang thotho in ningte khai ning anghnak kin kawm tu ve ih.

Timothy Le Epafroditus

¹⁹ Pathian in rem ti lekhaw, ning thulate i linghnak in thazang ngah tuh ing tiin umlamhnak nai manin a rai hlanah Timothy ning hnenah hlat tum ing.

²⁰ Amah ian i thinlung lingtu le ningmah ning ruattu taktak i.

²¹ Midangte tu amahte ca ian ruat tlang ai Jesuh Khrih ca ruat hang lo i.

²² Ani tu zaitlukin rinsantlak i ti ningmah rori in ling i si. Kaimah thawn pafa bangin Thuthangpha hrangah naper kawm i ing, ti hmu zo i si.

²³ Ciamanin i thula ah zaibangin thil cang tuh i ti a fiang sawng in ani tu hlat tuhai,

²⁴ Kaimah rori ning hnenah hleng cing thil tuh ing tiin Bawipa rinsanhnak thawn um ing.

²⁵ Cen kin unau Epafroditus tu ning hnenah hlat kul i tiin ruat ing. Ani tu kaimah thawn naper kawm le raltawng kawm i ing ai i bawm tuhin ning hlathnak i.

²⁶ A ur thula ning zahnak heh a thinnuam lohnak ah cang ai ningmah ning tawk tuh umlam ngai i.

²⁷ A ur ti menma rin ilo i, a thi dawn rori i. Ikhalselai Pathian in ninghio i; amah ninghio lek zolo in kaimah khai ning i hio ai i hnenah lungsiahnak lian amam hleng tuhhnak in i luatruai i.

²⁸ Ciamanin ning hnenai kuat i hiam cuanghnak i ai amah ning hmu fangin thin ning nuam leh tuhai kai khai i lungsiahnak bo tuh ve i.

²⁹ Ani tu Bawipa songah kin unau i ai lungawi aipuang in cosang tu ih. Amah bang minung heh hmaizahhnak pe tu ih,

³⁰ Zaimantifangin Khrih ca naperhnak le ningmah in bawmhnak i pe thil lohnak i pe tuhin a nunhnak rin ruat loin per ai a nunhnak tianin bo dawn i.