Filipi 1 - Zanniat Bible

¹ Khrih Jesuh ai sal pa Paul le Timothy in, Khrih Jesuh thawn a pawlkomduntu Philipi khua ai Pathian ai minung a um mite hnenah le ning pawlpui songai konghoitu le upate hnenah lai ning kuat i ing.

² Kin Pa Pathian le Bawipa Jesuh Khrih in ninghiohnak le daphnak ning pe tu hram seh.

Paul In Anite Caah Sawnget I

³ Ning thu i ruat cang fangin i Pathian naihhla ti ing.

⁴ Ning veksen ca saw i ngen cang fangin anghnak thawn sawngen ing,

⁵ zaimantifangin Thuthangpha naperhnak ah a hampan in tunnia tian ning tu i bawntu ṭio i si.

⁶ Ciamanin ningmah songin naper pha a pantu Pathian in Khrih Jesuh Nia a hleng fangin ciami heh a tawp tian persuak tuh i tiin ling fiang ing.

⁷ I thinlung in ning hih ṭiode ing. Ning vumah hebang thinlung nai tuh i mawi i. Zaimantifangin tunai thawng songah i um laitak ah ituseh, luat ngai in Thuthangpha ṭanpui ai ciami Thuthangpha kho amam ai i ṭanhnak thu ah ituseh, Pathian ninghiohnak manin i cohnak ṭuanvo ahhen ning veksen in tel tlang ṭiode ve i si.

⁸ Khrih Jesuh ai ninghio thinpemhnak songah zaitlukin ning ngai ing, tihnak thudik i relhnak i lingpuitu Pathian i.

⁹ Pakhat le pakhat ning daihdunhnak tu linghnak dik le thu thiathiamhnak thawn a khangso amam tuhin sawngen ing.

¹⁰ Ciatihin ning khangso lekhaw a pha ber heh ril thiam tuh i si. Cen Khrih Nia ah ningrimhnak le mawhhlukhnak hmuahhmuah in ning cianghlim tuh i.

¹¹ Jesuh Khrih ian ai pethilhnak nuncan ziaza pha taktak heh ning nunhnak ah dim tuhai ciami tu Pathian thangphathnak le songlawihnak ah i tuh i.

Khrih Caah Nung Tuh

¹² U le naute, i kongcung ai thil a canghnakte heh Thuthangpha karhzairuaitu lehlam ah cang i, ti khiah ning ling tuhin i daih i.

¹³ Hemi thil manin, kumpibawi inn kiltute hmuahhmuah le heta ai midangte inkhai Khrih ai sal i imanin thawng ah i toh heh ling sio ising.

¹⁴ Cen thawng i tohnak in kin unaute a tam sawn heh Bawipa amahte rinsanhnak khoruai ai ral pha amam ai pangam ngai in thu rel tlang i.

¹⁵ Mi hrekkhat in kin iksik manin le thu el hiamte imanin Khrih thu heh rel tlang peu i; ikhalselai a hrek tu thinlung tluangtlam in Pathian thu rel tlang i.

¹⁶ Ciamite tu ithnak nai manin rel tlang i, zaimantifangin Thuthangpha a ṭantu tuhin Pathian in ṭuanvo i zem heh hmu tlang i.

¹⁷ Mi hrekkhatte tu thinlung tluang ngai in Khrih thu rel loin amahte thinlung pamhaphnak thawn rel tlang i. Thawng ah i um lai ahhen harsahnak belh cih tuhin ruat tlang i.

¹⁸ Zaikhai poi lo i. Lung i awi hlen i; thinlung pha lo thawn a rel inkhai ituseh, thilung tluang in rel inkhai ituseh, Khrih thu rel hnua lamin lung i awi thotho i.

¹⁹ Zaimantifangin ning sawngethnak le Jesuh Khrih ai Rauhla hnenai a hlenghnak thawmin i luatruai tuh i, ti ling ing.

²⁰ I daihhnak ber le i umlam ngaihnak tu ṭuanvo i naihnak heh bawn ben hram inglai, cen zaikom inkhai a hlaice in tunteng hrimhrim ahhen, ralphahnak thawn dim in i nung inkhai ituseh, i thi inkhai ituseh, i thinlung i taksa veksen thawn Khrih heh upat hmaihngalhnak pe thil inglai, ti khiah i.

²¹ Nun tihnak tu ziang i? Kaimah ca ahcen nun heh Khrih i. Ciamanin thi inglai khai hnempui amam i.

²² Ikhalselai nung in thil man nai deuh bawn thil lengkhaw akon sawn ril tuh ling lo ing.

²³ Thinlung kalhkak in um ing. Hemi nunhnak tu hlum in Khrih thawn um heh i hiam ze i; ciami tu pha deuh ngaingai i.

²⁴ Ikhalselai nung tuhlai heh ning caah a kul ze lawnsi i.

²⁵ Ciami tu fiang ngai in ling manin nung tuhlai ing. Sanghnak songah ning khangsohnak le ning anghnak ning belh bawmtu cang tuhin ning hnenah nung tuhlai ing.

²⁶ Ciatihin ning hnenah i hleng leh fangin, Khrih Jesuh thawn ning nunhnak tu a pawlkom dun manin, kaimah vumah hmaihngalhnak tampui nai tuh i si.

²⁷ Tun laiah a thupuihnak tu Khrih ai Thuthangpha ai daihdan bangin ning nuncan heh cang thil selai, ciatihin ning tawk thil inkhai ituseh, tawk thil lo inkhai ituseh, tumtekhnak pakhat nai in kho ngai in ding ai Thuthangpha hrangah hmunkhat ah thinlung rual niu in raltawng tlang i si ti khiah ling tuh ing.

²⁸ Ning ralte heh kih mah ih; ral pha ngai in um tu ih. Ciatihin anite tu sung tuhai ning tu nehtu tuh i si ti khiah larruai tuh i; zaimantifangin nehhnak ning petu heh Pathian i.

²⁹ Khrih ning sanghnak lek ah ilo in amah ca ning tuarhnak ahkhai covo zemhnak i si ai mibawngpha i si.

³⁰ Ciamanin tun tu raltawnghnak songah i hnenah tel ben ve tuh i si. Ciami ral tu kin hnuaah khai tawng zo ing ti ningmah in hmu tlang ai, tun ahkhai ning linghnak bangin tawng hnelhno lai ing.