Filemon 1 - Zanniat Bible

¹ Khrih Jesuh manin thawng a to mi kaimah Paul le kin unau Timothy in kin rualpui le naperpui Philemon na hnenah le,

² na inn ai a khawmtu Khristian unaute, kin farnu Apphia le kin ralkap pui Arkhipas hnenah lai ning kuat i ing.

³ Kin Pa Pathian le kin Bawipa Jesuh Khrih in ninghiohnak le daphnak ning pe tu hram seh.

Philemon Ai Ithnak Le Sanghnak

⁴ I unau Philemon, saw i ngen cang fangin na hih ai i Pathian hnenah anghnak thu rel ṭiode ing.

⁵ Zaimantifangin Pathian minungte na ithnak le Bawipa Jesuh na sanghnak thu ling ing.

⁶ Na sanghnak thu heh midang na rel thil ve tuhin saw na nget ing; ciatihin Khrih ai kin naihnak thilpha hmuahhmuah heh semkhim liang in lingthiam ngah tuh isi.

⁷ Ithnak unau pa, ithnak na naihnak in anghnak le thazang tampui i pe ai Pathian ai minungte veksen thinlung nuamruai sek isi.

Onesimas Ca Ngenhnak

⁸ Ciatihin Pathian minungte vumah ithnak na nai manin le Khrih songai kaimah heh na unau imanin na bawn tuhhnak i tiin i ruathnak tu ralpha ngai in thu na pe tuhhnak inapui ciatihin tu na ti tuh lo ing.

⁹ Zaimantifangin ithnak na vumah nai manin a ngen lam sawn in na ngen ing. Khrih Jesuh ai palai, tun laitak ah thawng a to mi kaimah Paul in,

¹⁰ Onesimas aiawh in na ngen ing. Ani tu Khrih songah rauhla lamah a pa ah i cang i.

¹¹ Tun hlan ahcen nangmah caah zaikhai santlaihnak nai lo i. Ikhalselai tun tu nangmah le kaimah caah santlai ngai ihang.

¹² Tunah ani tu ithnak thawn na hnenah na kuat ing.

¹³ Thuthangpha manin thawng songah i um laiah, nangmah aiawh in i bawmtu tuhin ani tu i hnenah umruai rih tuh i daih i.

¹⁴ Ikhalselai umruai tuh lo ing; zaimantifangin na daih lo cing in i bawm tuseh tiin ti tuh lo ing. Na thintha tho in le nangmah ai lungsuak in na bawnhnak i daih i. Ciamanin na lungkhimhnak a um lomi zaikhai bawn tuh lo ing.

¹⁵ Onesimas thawn can comniu ning khekdunhnak heh khek dun nawn loin kumzangza um kawm thil tuhin i thai pang i.

¹⁶ Tun tu sal i si, ti tuh menma i nawn lo i; sal tahin uak deuh ngaingai zo i: Khrih songah kin ithnak mi unau i zo ihang. It ze ing. Nang inkhai sal i, ti lek ilo in Bawipa songah unau i zo manin it tuh amam i si.

¹⁷ Ciamanin kaimah heh na naperpui in i ruat lesikhaw kaimah i cosang bangin amah khai cosang tuh ve in i daih i.

¹⁸ Thil a bawn sualhnak le a bahnak um lekhaw kaimah in rul tuhin dah tu.

¹⁹ Heta ah kaimah ai kut rori in, Kaimah Paul in kuan tuh ing tiin ngan ing. (Tunai na nunhnak khai kaimah manin i ti khiah na rel kul in ruat lo ing).

²⁰ Ciamanin i naupa, kin Bawipa manin i ngenhnak heh i bawn sah tu hram law; Khrih songai unau suakkhat kawm ising ai thin i nuamruai tu hram law.

²¹ Hemi lai i ngan kongin i ruaihnak heh bawn tuh i, tiin na sang ai i ruaihnak tahin tam sawn bawn tuh isi ti ling ing.

²² Ciahlaiah innkhan pakhat a cia in i dah sah tu law. Zaimantifangin Pathian in ning veksen ai sawngenhnak ning ngai sah tuhai ning hnenah i hlengruai tuh i tiin umlamhnak nai ing.

A Tawphnak Hnuksat

²³ Khrih Jesuh manin i thawngtopui Epafras in hnuk na sat i.

²⁴ Cen i naperpui Mark, Aristarchus le Demas le Luke inkhai hnuk na sat ve i.

²⁵ Kin Bawipa Jesuh Khrih ai ninghiohnak ning veksen hnenah um tu hram seh.