Ezra 7 - Zanniat Bible

Jerusalem Ah Ezra Hleng I

¹ Kum rai rianro ai Artaxerxes tu Persia Kumpimangbawi a cang fangin, Ezra tihnak pa um i. Ezra ai pupate tu Suangbawi Sang Aaron ai sentute i. Ezra tu Seraiah ai fapa i, Seraiah tu Azariah ai fapa i, Azariah tu Hilkiah ai fapa i;

² Hilkiah tu Shallum ai fapa i, Shallum tu Zadok ai fapa i, Zadok tu Ahitub ai fapa i,

³ Ahitub tu Amariah ai fapa i, Amariah tu Azariah ai fapa i, Azariah tu Meraioth ai fapa i;

⁴ Meraioth tu Zerahiah ai fapa i, Zerahiah tu Uzzi ai fapa i, Uzzi tu Bukki ai fapa i;

⁵ Bukki tu Abishua ai fapa i, Abishua tu Phinehas ai fapa i, Phinehas tu Eleazar ai fapa i, Eleazar tu Aaron ai fapa i.

⁶ Ezra tu Dan thiammi i ai Bawipa, Israel ai Pathian in Moses hnenah a pehnak Dan thu heh ling ngai i. Ezra tu Bawipa in hmuifu a pe manin a ngenhnak hmuahhmuah heh kumpimangbawi in pe i.

⁷ Artaxerxes kumpimangbawi a cang kum sarihhnak kum ah Ezra tu Babylon an Jerusalem ah Israel mite, suangbawite, Levi mite, Biakinn lasatute, Biakinn kotka kiltute le napertute thawn feh tlang i.

^8-9 Hla khathnak hla, ni khat nia ah Babylon an suak tlang ai Pathian bawmhnak thawmin Jerusalem heh hla nga hla, ni khat nia ah hleng i.

¹⁰ Ezra in a can hmuahhmuah heh Bawipa ai pehnak Dan zirhhnak tuhin le hlunhnak tuhin ituseh, ciami dan le thupehnakte tu Israel mite zirh salawnhnak tuhin, hmang i.

Artaxerxes In Lainganhnak Ezra Pe I

¹¹ Kumpimangbawi Artaxerxes in a hnia lamai lainganhnak tu Bawipa in Israel mite hnenah a pehnak dan le thupehnakte a lingtu suangbawi le laithiam mi Ezra hnenah pe i:

¹² “Kumpibawi Artaxerxes in Van ai Pathian ai Dan thu a thiammi suangbawi Ezra hnenah,

¹³ I uksong khuahacang ai a umtu Israel mite, suangbawite le Levi mite, Jerusalem ah let a nuamtu hmuahhmuah na hnenah let thil tlang tuh i, tiin thupe ing.

¹⁴ Kumpimangbawi kaimah le ruathnak i petu i minungte pasarih in, na ṭuanvo ai dahhnak Pathian pehnak Dan heh Judah le Jerusalem ah akontih in hlun tlang i, ti sik tuhin na hlat ing.

¹⁵ Israel ai Pathian, Jerusalem khua Biakinn a naitu hnenah, kaimah le ruathnak i petu i minungte pasarih in pe kin nuamhnak sui le ngun keng tlang tuh i si.

¹⁶ Ciahlaiah Israel mite le a suangbawite in Jerusalem ai umhnak Pathian Biakinn hrangah amahte pehnakte le Babylon peng songai a khawmciahnak sui le ngun khai keng tlang tuh i si.

¹⁷ “Hemi tangkate tu kawlpawcang, tuucang, tuuniu, sangvut le cabitti laihnak tuhin fel ngai in hmang tlang tu ilai ciamite tu Jerusalem Biakinn ah hibawlhnak, rong hibawlhnak le dinti hibawlhnak ah sel tlang tuh i si.

¹⁸ A tanglaihnak sui le ngun um lai lekhaw nangmah le na ramsong mite in a mawi ning tihnak ah le ning Pathian ai daihhnak bangin hmang thil tuh i si.

¹⁹ Biakinn song naperhnak le Pathian biahnak ah hmang tuhin amahte pehnak bungbelte hmuahhmuah Jerusalem khua, Pathian caah pe tuh sio i si.

²⁰ Biakinn hrang a kulhnak dangdang um lai lekhaw acuzah tangka songin hmang thil tuh i si.

²¹ “Kumpimangbawi Artaxerxes kaimah in, suangbawi le Van ai Pathian ai Dan thu a thiammi Ezra ai a ngenhnak hmuahhmuah heh rang ngai in pe tlang tuhin, Euphrates Nitlak lamai peng songai a ummi tangka kiltute hmuahhmuah heh thupe zo ing.

²² A ngenhnak hmuahhmuah heh ngun tangka talent zakhat tian, sangvut han zaruk le sawmnga tian, cabitti pung za le sawmnga tian, olive thau pung za le sawmnga tian, ci a kul zah, pe ben tuh i si ti ing.

²³ Van ai Pathian in a Biakinn tuh hrang a kulhnak hmuahhmuah heh pe tlang tuh sio ai kol ngai in per tulai Pathian tu i vumah le i hnua ai ram uktu vumah zaikom inkhai a thinraw tuh loin fimkhur bik in bawn tu.

²⁴ Suangbawite, Levi mite, lasatute, kotka kiltute, napertute le he Biakinn thawn a pehduntute hmuahhmuah hnenin siah ituseh, ngunkhuai le a dang khawlhnak khai ituseh, langthilhnak thu hrimhrim nai tlang lo i si.

²⁵ “Ezra nangmah in, na Pathian ai na pehnak fimhnak hmangin Euphrates Nitlak lamai peng ah Bawipa pehnak Dan bangin a nungtute uktu tuh isi. Ram uktu bawi le thukhantute dah tuh isi. A ling lai lotute hmuahhmuah hnenah hemi dan heh zirh tuh isi.

²⁶ Aisu inkhai na Pathian ai Dan, ihlahle ramsong ai dan hlun hlah lekhaw rek in maw, hnawt teu in maw, a thilri hmuahhmuah sut sio in maw, thawngtla in maw, a rang ngai in cawhhnak tuar tlang tuh i.

Ezra In Pathian Thangphat I

²⁷ Ciafangin Ezra in, “Kin pupate ai Pathian, Bawipa tu thangphat in um tuseh! Amah in naper ai he bangin Jerusalem ai a umhnak Bawipa Biakinn vumah kumpimangbawi in upathnak a nai khiah!

²⁸ Pathian ai ninghiohnak in kumpibawi le ruathnak a petute le thunai mi a kuthnia tlangsuakte ai mithmai pha ngah zo ing. Bawipa i Pathian in ralphahnak i pe ai Israel hin songin songkhat ai luber ṭen tampui tu kaimah thawn tlung tlang tuhin sawm ben ing,” tiin ti i.