Ezra 4 - Zanniat Bible

Biakinn Sa A Lungkhim Lotute

¹ Cen Judah mi le Benjamin mite a huatute in Bawipa, Israel ai Pathian Biakinn sa heh saltanghnak in a lettute in pan tlang zo i, ti khiah ling i.

² Ciamite tu Zerubbabel le amahte hin ṭenai hotute hnenah feh tlang ai, “Ning Biakinn sa heh ning bawm tuh i ing. Ning biahnak Pathian tu kin inkhai bia tlang ve ai Assyria Kumpimangbawi Esarhaddon in he ramah um tuhin kin kuat sawng fangin Pathian hnenah hibawlhnak sel tlang ṭiode i ing,” tiin ti i.

³ Ciafangin Zerubbabel, Jeshua le amahte hin ṭen in hotute in, “Bawipa kin Pathian ca Biakinn sahnak tuhin ning in kin bawm kul lo i. Persia Kumpimangbawi Cyrus ai thupe zo bangin kinmah hlanlam niu in sa tuh ngawn i ing,” tiin ti tlang i.

⁴ Ciafangin ciami ramai a umtu minungte in Biakinn sa tuh loin le tha nau tuhin Judah mite heh hring tlang dekdo i.

⁵ Ciahlaiah Biakinn sa comruai tuseh tiin Persia acuzah tlangsuakte heh nawhthuh pe ai amahte tumtekhnak bawnsuak thil tuh loin le thinpit thai in Kumpimangbawi Cyrus in ram a uk song hmuahhmuah le Kumpimangbawi Dairus bawi a cang tianin ciatihin engsan tlang i.

⁶ Cen Kumpimangbawi Xerxes bawi a cang fangin Judah le Jerusalem ai a umtute zuarhnak lai heh kumpimangbawi hnenah pe tlang i.

Kumpimangbawi Hnenah Laikuathnak

⁷ Persia Kumpimangbawi Artaxerxes in ram a uk laiah, Bishlam, Mithredath le Tabeel le a rualpuite in Kumpimangbawi hnenah laikuat i. Ciami lai heh Aramaic pon in ngan awnghnak i ai a siar fangin let kul de i.

⁸ Cen ram uktu bawi Rehum le ramsong laingantu Shimshai in Jerusalem thu heh Kumpimangbawi Artaxerxes hnenah a hnia lamai bangin lai ngan i.

⁹ Ram uktu bawipa Rehum, ramsong laingantu Shimshai le amah bawmtute, thukhantute, le Erek, Babylon le Elam ram Susa khuasong mi i ai tunah bawi a ṭuantute,

¹⁰ ciahlaiah milian le mihat Arshubanipal in amahte khua le ram an thawn ai Samaria khua le Euphrates Nitlak lamai ramah umruaihnak zapui in ciami lai heh ngan tlang i.

¹¹ Anite nganhnak lai tu hetihin i: Euphrates in Nitlak lamai ai a ummi na salte in Kumpimangbawi Artaxerxes na hnenah lai na kuat i ing.

¹² Bawipa na ram song hmun dangdang in Judah mite he ramah hleng tlang ai Jerusalem khua ah um ai hemi khua pha lo le raltho hmang khua heh din tlang thliahthlo i. Khua kulhhnak vingpui tiang tlang leh ai a ham lungphumhnak khai remm ai ben dawn ihang.

¹³ Kumpibawi, he khua heh din ben tlang ngaingai ai a vingpui khai tiang ben tlang ngaingai lekhaw heta ai mizapui in siah ituseh, ngunkhuai ituseh, na pe tuh nawn lo ai na siahkhawlhnak ṭum tuh i.

¹⁴ Bawipa na kuthnia ah a ummi i ing ai na ramsong ai thula na lingruai tuh heh kin bawn tuhhnak i. Siah na pe tuh lo le na siah ṭum tuh heh kin daih lo i.

¹⁵ Ciamanin na pupate ai hluphnak thula khumhnak hnikhnaihhnak laibupui songah sik tulai, ciami songah he khua heh hlanlai in raltho hmang khua i awng zia le kumpibawi le ram uktu bawite harsahnak a pe ṭiotute i ti khiah hmu tuh isi. Hemi khuasong mite heh a uk har minung i awng ṭio i. Ciaman nakhaw he khua siatsuah ai a hnawmcan awng sio khiah!

¹⁶ Hemi khua dinsuak ngaingai ai a vingpui khai tiang ben ngaingai lekhaw, Kumpimangbawi, Euphrates Nitlak lamai ram tu uk thil tuh nawn lo isi, tiheh fiang ngai in hmu i ing,” ti i.

Kumpimangbawi Ai Lairulhnak

¹⁷ Kumpimangbawi in hetihin lairul i: “Ram uktu bawi Rehum, ramsong laingantu Shimshai, le Samaria le Euphrates Nitlak lamai a ummi ning bawmtute, hnuk ning sat ing.

¹⁸ “I hnenah lai ning kuathnak tu pon let tlang ai i hnenah i siar sah i.

¹⁹ Ning relhnak bangin thu hnikhnaihhnak laibu songah zong tuhin thupe ai a zong tlang fangin hlanlai in Jerusalem tu Kumpimangbawi a tawngcaitu le mi hnaihnok le ralthotute umhnak awng ṭio i, tiheh hmu tlang ngaingai i.

²⁰ Kumpibawi hat ngaingai in Jerusalem le Euphrates in Nitlak lamai heh uk awng ai siah le ramte ram nga lang awng i.

²¹ Ciamanin thu i than leh hlanlo a khua salehhnak heh com tuhin thupe tu ih.

²² Ngulsul loin rang ngai in bawn tu ih; i uk songah tuarharhnak suakruai pang tuh i,” ti i.

²³ Kumpimangbawi Artaxerxes laikuathnak tu Rehum, Shimshai le a bawmtute hmaiah siar ben sawng fangin a rang ngai in Jerusalem ah feh tlang ai khengkhebel in naper comruai i.

²⁴ Hlanlai ahkhai ciatih bang thotho in Biakinn sa heh comruai awng zo ai Persia Kumpimangbawi Dairus bawi a cang kum hnihhnak tian zaikhai bawn thil loin com awng i.