Efesa 4 - Zanniat Bible

Pumkhat Ihnak

¹ Bawipa ai na i ruaihhnak manin thawng a totu kaimah in Pathian kohnak ning i bangin ning nunhnak ah amah ai kohnak ning ihnak heh larruai tu ih, tiin ning forh ing.

² Thin nemhnak nai tu ih; thinniam le thinsau in um tu ih. Ithnak ning naihnak khiah pakhat le pakhat ning or dun benhnak in larruai tu ih.

³ Rauhla ai ning pehnak pumkhat ning ihnak khiah kho tuh ngio in hmunkhat ai ning pentu ai remhnak in khoruai tu ih.

⁴ Pathian ai ning ko fangin ning ko sanhnak umlamhnak pakhat um ai Ruang pum pakhat um bang in Rauhla khai pakhat um i.

⁵ Bawi pakhat, sanghnak pakhat, baptisma pakhat um i.

⁶ Pathian pakhat um ai mi zongzong ai pa i. Ani tu zaizongza ai vumah Bawi i; zaizongza songin naper ai zaizongza songah um i.

⁷ Kin veksen pumpak ṭen in covo lehsawng nai ṭen ai ciami tu Khrih ai kin pehnak ṭen bangin i.

⁸ Lai Thianghlim in, “A sang ber hmun a hleng fangin, ralpom mi tampui khor i; minung hnenah lehsawng pe i,” a tihnak khim i.

⁹ Cen, “Hleng i,” tihnak tu ziang ini? A sullam tu a hmasaber ah laipua hmun niam ber ah hleng i tihnak i.

¹⁰ A zuktolhhnak tu laivum ah le van vum dim tuh sio in van pua tianin a hlengtu amah thotho i.

¹¹ “Minung hnenai lehsawng a petu,” khai amah i. A lehsawng pehnak tu: a hrektu nalangte i, a hrek tu prophette i, a hrek tu Thuthangpha phuangtute i, a hrek tu pastor i ai a hrek tu zirhtute i.

¹² Hebangtluk in lehsawng a pehnak tu: Pathian ai minungte pai cia in Khristian naper ah ruaih thil ai Khrih ai ruangpum ah khangsoruai tuhin i.

¹³ Ciatihin kin sanghnak ah le Pathian ai Fapa kin linghnak pakhat songah komkhawm tuh sio ising; puitling kin cang tuhai Khrih ai patling a ihnak a sanghnak ber hmun khai hleng tuh ve ising.

¹⁴ Ciafangin mizawltute thuzirhhnak le lampeng hlun tlang tuseh tiin amahte puahfawmhnak thudon, tilep le hlisiate in khuahacang ah a sep a nuaimi naupang bang i tuh nawn lo ising.

¹⁵ Ithnak thinlung nai in thudik rel tlang tuh sawn ai kin lu Khrih songah a phunkhim in khang tuh ising.

¹⁶ Amah Khrih ai ukhnak hniaah taksa ruang vumai a dang taksakhante tu rem niu in peh dun tlang sio i. Hngeuhhngeuh le ruhte in taksa ruangpui heh hmunkhat ah khawm sio i. Ciamanin taksa ruang vumai sem dangdang heh amah ai naper ṭen per tlang fangin taksa ruangpui tu a veksen in ithnak in khangso i.

Khrih Songah Nunhnak Thar

¹⁷ Bawipa ai hming in ning hnenah ralringhnak thu ning rel i nuam i: Laivum mi bangin nung nawn mah ih. Anite ai ruathnak tu thulovang i ai,

¹⁸ amahte thinlung tu thim i. Pathian ai pehnak nunhnak songah covo zaikhai nai lo i. Zaimantifangin linghnak zaikhai nai lo ai a thinlung ruh bikraw i.

¹⁹ Zakthi khai thiam tlang nawn lo i. Sualhnak songah paih dun ai suphnak zaikhai nai loin mitsih mawi lo thil a phuncang bawn tlang i.

²⁰ Khrih thu ning linghnak tu ciabang ilo i.

²¹ Khrih thu tu ling ngah zo i si; Amah hluntu ning i bangin Jesuh songah thutak ning zirh zo i.

²² A hlanai ning nung kel bangin ning nungruaitu ning nun hlun heh lon tuhang ih; ciami ning nun hlun heh mizawltu taksa hiamhnak in kin thiruai cuahcotu khiah i.

²³ Ning thinlung le ning ruathnak awng veksen in semtharmi i tu sio ilai,

²⁴ Pathian hmuihmel bangin bawnhnak, a dikcang le a thianghlim in larhnak nunhnak dik, ning nun thar heh sil tu ih.

²⁵ Thudonrel nawn mah ih. Pathian sangtu pakhat le pakhat thutak rel dun tuh ising; zaimantifangin Khrih ruangpum songah kin veksen in songtel ṭen ising.

²⁶ Thin na raw lekhaw na thinrawhnak in sualhnak songah na lutpui maseh; na thinrawhnak heh ni tlapui mah.

²⁷ Satan heh can pha pe mah.

²⁸ Rukote in ru nawn maseh; amah nunhnak caah felfaihnak thawn pumcawmtu cang tuhin le mifarahte cawmtu cang tuhin a kut rori in naper tuseh.

²⁹ Ning pon dun fangin ponka sia hmang mah ih; ning ponka a zatute in phahnemhnak ngah thil tuhin ponka pha le ponka mawi hmang tu ih.

³⁰ Pathian ai Rauhla Thianghlim heh lungsiaruai mah ih; zaimantifangin Rauhla tu Pathian ai i si ti hnikhnaihhnak i ai Pathian ai ning luatruai Nia hleng tuh i, ti linghnak amahkhan i.

³¹ Thinlung songah mi huahnak le raldunhnak, taksa hiamhnak le thinrawhnak tepawl khiah boruai tu ih. Pakhat le pakhat huadunhnak, zohsuamhnak le haudunhnak thinlung tlawmniu bangkhai nai mah ih.

³² Ciamite tumrul in pakhat le pakhat ninghio thinpemhnak nai dun tu ilai, Khrih songah Pathian in ning ngaithiam bangin pakhat le pakhat ngaithiam dun tu ih.