Efesa 3 - Zanniat Bible

Gentile mite Ca Paul Ai Naperhnak

¹ Ciatih imanin ningmah Gentile mite caah Khrih Jesuh hming in kaimah Paul tu thawngtla pa ing.

² Pathian in ning phathnak tuhin hemi naper heh a ninghiohnak in i pe zo i ti khiah ning in ling tuh sio hlen i si.

³ Pathian in a thuthup phuang ai i hnenah larruai zo i. Hemi thu tu a comzawng in ngan zo ai,

⁴ ciami i nganhnak siar le i sikhaw Khrih ai thuthup i ling zia heh ling thil tuh i si.

⁵ Hlan ahcen cia thuthup heh minung hnenah phuang awng lo i; Ikhalselai tuh ahcen Pathian in a thianghlimmi a nalang le a prophette hnenah a Rauhla in phuang zo i.

⁶ Cia thuthup tu hetih bangin i: Thuthangpha um manin Gentile mi khai Judah mite thawn Pathian ai hmuifu cotu cang tlang zo ihang; pumkhat songah a teltute i ai Khrih Jesuh thawmin Pathian thukhamhnak songah covo nai tlang i.

⁷ Ciami Thuthangpha naruaihtu ing ai Pathian ai i pehnak lehsawng i. Ciami lehsawng heh a hathnak huham ai naperhnak i.

⁸ Kai tu Pathian ai minungte lakai mi nautaber tahin rin nauta sawn ing. Ikhalselai rel cawk lo tianin a lianmi Khrih ai a lianhnak Thuthangpha heh Gentile mite hnenah hlenpui tuhin le,

⁹ Pathian ai tumtekhnak a thuthup heh zai bangin lar zo i ti khiah mi zongzong in hmu thil tuhin amahte mit varruai tuhin Pathian in ṭuanvo i pe i. Zaizongza semsuahtu Pathian in kin hnua lam san song hmuahhmuah a thuthuk heh thup i.

¹⁰ Zaimanin ciatihin thup ini ti fangin a pawlpui thawmin vancung ai vancungmite uktu le thunaitute in Pathian ai fimhnak phunzakhim heh tun san ah ling semkhim thil tuhin i.

¹¹ Ciami tu kumzangza tumtekhnak a nai bangin Pathian in kin Bawipa Jesuh Khrih songin khimruai i.

¹² Khrih thawn kin pawlkomhnak manin le amah kin sanghnak thawmin Pathian umhnak ah ralpha ngai le ngam ngai in lutthilhnak nai ising.

¹³ Ciamanin ning caah rimsuhnak i tuar fangin thinhar mah ih, tiin ning ngen ing; ning caah a pha ciang i.

Khrih Ai Ithnak

¹⁴ Ciamanin kin Pa hmaiah khukcaicin in sawngen ing.

¹⁵ Ani tu innsang cangcang ai a ummi le lai le van ai ummi hmuahhmuah in amahte hming langhnak hampui i.

¹⁶ Rel cawk loin songlawi lianhnak songin ning songlam ai minung ning ihnak heh a Rauhla thawmin hathnak huham ning pe tuhin Pathian ngen ai,

¹⁷ ning sanghnak thawmin ning thinlung tu Khrih in a umhnak inn ah bawn tu hram seh, tiin sawngen ing. Saw i ngen bethnak tu: ning ham le ning hamtohhnak heh ithnak songah bir tu ilai,

¹⁸ ciatihin Pathian ai minungte thawn thinkhat in Khrih ai ithnak heh thuk ai a sang zia le a sau ai a kau zia heh lingthilhnak nai tuh, tihnak i.

¹⁹ Minung fimhnak ai a ling thil sio lohnak a ithnak heh ling tuhai a semkhimmi Pathian a ihnak thawn ning nunhnak dim tuh i.

²⁰ Kin songah a huham in napertu in kin ngenthilhnak le kin ruatthilhnak tahin rin a let tampui in per thil i.

²¹ Pawlpui song le Khrih Jesuh songin amah Pathian hnenah thangphathnak heh kumzangza in um tu ngio selaw! Amen.