Efesa 1 - Zanniat Bible

¹ Pathian lungkhimhnak bangin Khrih Jesuh ai nalang kaimah Paul in Ephesa khua ai a ummi Pathian minungte, Khrih Jesuh thawn ning pehzomdunhnak ah rintlak ai a nungmi, ning hnenah he lai ning kuat ing.

² Kin Pa Pathian le kin Bawipa Jesuh Khrih in ninghiohnak le daphnak ning pe tu hram seh.

Khrih Hnenin Hmuifu

³ Kin Bawipa Jesuh Khrih ai Pa le a Pathian tu thangphat in um tuseh. Zaimantifangin Khrih thawn kin pehzomdunhnak thawmin kin rauhla ca van hmuifu a phuncang kin hnenah kin pe i.

⁴ Khrih thawn kin pawlkomhnak thawmin Pathian in kinmah heh Amah ai hmaiah mi thianghlim le mawh nai lo i tuhin laivum a semsuah hlanah rin Amah naihnak ah kin ril zo i. Kin it manin,

⁵ Pathian in Jesuh Khrih thawmin a fate ah kin cangruai tuh heh a lungawi phun le a daih phun remruat zo i.

⁶ A songlawi mi a ninghiohnak le a ithnak a Fapa thawmin lehsawng kin pehnak manin Pathian tu thangphat in um tuseh!

⁷ Zaimantifangin Khrih a thihhnak thawmin kin sualhnak tu ngaithiam zo ai a luat zomi ising. Pathian in a ninghiohnak kin hnenah a tampui kin pe manin,

⁸ a ninghiohnak tu a lian ze lawmlam i!

⁹ Pathian in a fimhnak le a thu linghnak thuk ngai in a tumtekhnak bawnsuak ai Khrih songin a khimruai nuamhnak a thuthup heh kin hnenah larruai zo i.

¹⁰ Tikcucan a khim fangin Pathian in semkhim niu ai a tumtekhnak tu: van ah ituseh, laivum ah ituseh semsuahhnak thil hmuahhmuah khawlkhawm sek ai Khrih khiah luber ah dah tuhhnak i.

¹¹ Zaizongza heh Pathian Amah ai tumtekhnak le ruatciahnak bangin khim sio i. Khrih thawn kin pehzomdunhnak thawmin a nungmi i tuhin Pathian in kin ril zo i; ciami tu amah ai tumtekhnak i ai a hampan in a khuakhan cia i.

¹² Ciamanin Khrih umlamhnak a nai hmasabertu kinmah in Pathian hnenah songlawihnak pe tlang ngasing.

¹³ Ning hnenah nunohnak a hlengruaitu Thuthangpha a dikmi thuthang tu ning za fangin ning khai Pathian minung i ve i si. Khrih sang tlang ai Pathian in amah ai ning ihnak larruai tuhin hnikhnaihhnak ning vumah khen i; ciami hnikhnaihhnak pe tuhin a thukhamhnak tu Rauhla Thianghlim i.

¹⁴ Pathian in a minung hnenah a thukhamhnak ngah tuh rori ti larruaihnak ah ciami Rauhla Thianghlim tu amahkhan ai a minung hnenah luathnak a khim in pe tuh i ti kin lingfianghnak khai i fawn i. A songlawihnak tu thangphat in um tuseh.

Paul Sawngenhnak

¹⁵ Bawi Jesuh ning sanghnak le Pathian ai minung vumah ithnak ning naidan i ling sawng ai panin,

¹⁶ ningmah manin Pathian hnenai anghnak thurel com awng lo ing. I sawngenhnak in ning hih ṭiode ing.

¹⁷ Cen kin Bawipa Jesuh Khrih ai Pathian, a songlawi mi kin pa, ning hnenah Rauhla ning pe tuhin ngen ing. Ciami Rauhla in ning fimruai tuhai Pathian ning hnenah lar tuh fawn i; ciatihin Pathian ling tuh i si.

¹⁸ Zaibangtluk umlamhnak nai tuhin ning ko ai a minungte caah thukhamhnak heh zaitlukin ngaihsunurkul i.

¹⁹ Amah a sangtute songah a naper benhnak huham tu zaitlukin lian i, ti khai ning hmuthilhnak tuhin le a varhnak khai ning hmuthilhnak tuhin ning thinlung hongruai tu hram seh, tiin a hnenah saw ngen ing. Kin songai a ummi hathnak tu,

²⁰ Khrih thihhnak in a thoruai hnuaah vancung khua a kiahhan lamah a toruaitu Pathian ai hathnak huham thotho i.

²¹ Ciata ah Khrih tu uktu i tuhai vancung uktu dangdang ituseh, thunaitu dangdang ituseh, bawi dangdang a um mite khai ituseh, amahte vumah Khrih tu uktu bawi i. Hemi laipua vumah ituseh a hleng tuhlai laipua vumah ituseh, thunaitute hmuahhmuah vumah Bawi ber i.

²² Pathian in Khrih ke hniaah zaizongza dah sio ai zaizongza vumah Bawi i tiin pawlpui ai lu ah Khrih dah i.

²³ Pawlpui tu zaizongza a semkhimruaitu Khrih ai ruangpum i.