Daniel 5 - Zanniat Bible

Belshazzar Puai Bawnhnak

¹ Zan khat ah kumpibawi Belshazzar in rong aih puai lian ngai bawn ai a kuthnia ai umtu tlangsuak le upate thawng khat sawm ai hmunkhat ah zu ding tlang i.

² Ciatihin zu a ding laitak ah Belshazzar in Jerusalem Biakinn in a pa Nebuchadnezzar ai sui khuat, ngun khuat le hlengte a lang awnghnak khiah koih tuhin thupe i. Amah le a tlangsuak upate, a nupuite le a nuzawlte in zu dinghnak tuh hrangah a cahhnak i.

³ A cahhnak bangin sui khuat le hlengte khiah koih ai zu dinghnak ah hmang i.

⁴ Ciatihin sui le ngun, dar le thir, zanthing le lungtote ai bawnhnak khuavangte khiah thangphat tlang dekdo i.

⁵ Mangrin loin minung kut pakhat lar ai maikhuat varhnak khuam hiang bangkhang vumah lai ngan i. Lai a ngantu hnelhno kut heh kumpibawi in hmu i.

⁶ Ciasawng pahin a mithmai dul sio i; lau roh ai a khuk hlin derdo i.

⁷ Cen mitkher thiamte, dawithiam mite le arsi sikthiamte ko tuhin mi auh dekdo i. A ko mite tu hleng tlang ai anite hnenah kumpibawi in, “Hemi lainganhnak a siarthiamtu le a sullam i rel bentu heh kumpibawi pon san in thuam i tuh i, a hawng ah hmingphahnak sui khihual orh tuhai i ukhnak songah thunaihnak lamah pathumhnak i tuh i,” tiin ti i.

⁸ Kumpibawi ruathnak petute tu hmaiah suak tlang ai lainganhnak khiah sik tlang napui aisu inkhai siar thiam lo i; a sullam khai kumpibawi rel bentu aisu khai um lo i.

⁹ Kumpibawi Belshazzar tu a vansang in a hmai dul amam i; a tlangsuak upate inkhai ziang bawn tuh ling tlang hrimhrim lo i.

¹⁰ Kumpibawi le a tlangsuak upate mangbang ai a umhnak thawmvang khiah kumpibawinu in a za fangin rong ai hmun khan songah lut ai, ‘Kumpibawi, na nunkhua sau tu hram seh! Hemi bangin thinhar le hmaidul in um hram malaw.

¹¹ Na ram songah a thianghlim khuazingte ai rauhla a naimi pakhat um i. Na pa a kumpibawi laiah ciami pa in ruathnak dik le linghnak a naidan khiah larruai awng zo ai a fimhnak khai khuavang fimhnak bangtluk i. Ciamanin na pa kumpibawi in kutrin sikthiamte, mitkher thiamte, tlahsan thiamte le arsi sikthiamte ai hotu ah bawn awng i.

¹² Thiltibenhnak a hlaice in nai i; fim ngai ai mang ai sullam rel le ngaihsunurkul lingthilhnak le thuthuk relthilhnak lamah thiam ngai i. Ciamanin ciami pa, kumpibawi in Belteshazzar tiin hming bawthnak, Daniel ko tulai amah in a sullam na rel tuh sio i,” tiin ti i.

Daniel In Lainganhnak Sullam Rel I

¹³ A rang ngai in Daniel khiah kumpibawi hmaiah hoi ai kumpibawi in a hnenah, “Daniel isim? Judah mi sal ai pommi, i pa kumpibawi in Judah ram an a hoimi Daniel isim?

¹⁴ A thianghlim khuazingte ai rauhla na songah um ai thiamhnak, linghnak le fimhnak nai i tiin na za ing.

¹⁵ Ruathnak i petute le mitkher thiamte heh lainganhnak siartu tuhin le a sullam i reltu tuhin hoi napui a sullam ling thil tlang hrimhrim lo i.

¹⁶ Thuthup a sullam rel ben ai thil thuk khai rel thiam i tiin na ling zo ing. Hemi lainganhnak heh nang in siar thiam ai a sullam i rel ben ngaingai ilesikhaw kumpibawi ponsan in thuam i tuh isi, hmingphahnak suikhi na hawng ah na orh tuhai he ram song thunaihnak lamah pathumhnak i tuh isi,” tiin ti i.

¹⁷ Ciafangin Daniel in, “Na lehsawng tu nangmah caah dah tu ngawn, ihlahle midang pe tu. Kumpibawi nangmah caah he lainganhnak tu kaimah in siar tuhai a sullam na rel tuh ing.

¹⁸ “Cungnungber Pathian in na pa Nebuchadnezzar khiah kumpibawi lian ngai in bawn ai huham nairuai in mithupui cangruai i.

¹⁹ A thawmlian ze ai phunkhim, hinkhim le pongkhim a pong mi in kih tlang ai hlawng tlang diamdo i. Mi pakhatkhat rek nuam lekhaw rek i. Nungruai nuam lekhaw nungruai i. A nuamnuam in mite khiah hmingthanghnak pe ai mualpho inkhai bawn i.

²⁰ Ikhalselai ciatihin puarthau in, thinlung ruh in le ninghio thinpemhnak zaikhai nai loin a um manin a kumpibawi tohkham sut ai upathnak dinhmun khai sung i.

²¹ Minung umhnak khua le ram in hnawn teu ai a thinlung tu ramsa thinlung bangin cang i. Hampalak ai laakte lakah um ai kawlpawcang bangin hampa ai in, huptu le bertu zaikhai nai loin lenkolh ah it ai nai in tlak i. Hnuataber ah Cungnungber Pathian in ram ukhnak vumah thu nai ai ciami ram ukhnak tu a daihmi hnenah pe thil i, ti khiah ling ngah i.

²² “Ikhalselai ciami thute heh nang a fapa in ling sio napui na thinlung nem cuang lo isi.

²³ Vancung Bawipa ralcai in bawn ai Biakinn in langhnak khuat le hlengte heta ah koih isi. Nangmah le na tlangsuakte, na nupuite le na nuzawlte in ciami khuat thawn zu ding tlang ai sui le ngun, dar le thir, zanthing le lungto thawn bawnhnak khuavangte thangphat tlang dekdo i si. Khua a hmu thil lo khuavang, thu zaikhai a ling lomi le zaikhai linghnak nai lo khuavangte thangphat tlang dekdo i si. Ning nunhnak le ning thihhnak vumah laireltu, na bawnhnak hmuahhmuah vumah thunaitu Pathian sawn upathnak zaikhai pe tlang lo i si.

²⁴ Ciamanin he thute ngantu tuhin kut a kuathnak i.

²⁵ “A nganhnak tu, ‘Mene, mene, tekel upharsin,’ ti i.

²⁶ A sullam tu a hnia lamai bangin i: ‘Mene’ tihnak tu ‘siar’ tica i ai na ram ukhnak heh Pathian in a ni heh siar zo ai bo cing tuh i, tica i.

²⁷ ‘Tekel,’ tihnak tu ‘cuai teh’ tica i ai na teh fangin cuai na khim lo i tica i.

²⁸ ‘Upharsin,’ tihnak tu ‘khan’ tica i ai na ram ukhnak heh khan tuh sio ai Media mi le Persia mite hnenah pe i, tica i,” tiin ti i.

²⁹ Cia sawngpah in Belshazzar in Daniel khiah kumpibawi ponsan silh tuhin le a hawng ah suikhi orh tuhin a cengfate thupe i. Ciatihin a ukhnak ai thunaitu ber pathumhnak ah dah i.

³⁰ Ciami zan rori ah Babylon kumpibawi Belshazzar khiah rek tlang ai,

³¹ kum sawmruk le kum hnih a khimmi Media mi Dairus in Babylon ram heh lang ihang.