Daniel 4 - Zanniat Bible

Nebuchadnezzar Mang Pahnihhnak

¹ Kumpibawi Nebuchadnezzar in phunkhim, hinkhim le pongkhim hnenah a hnia lamai bangin thucah i: “Ning vumah daphnak um tuseh!

² Cungnungber Pathian i hnenah a larruaihnak mangbangkul le khuaruahhar thilte heh ruat tu ṭen ih.

³ “Pathian ai hmuhhnak ngaihsunurkul heh zaitlukin thawmlian i! Khuaruahhar a bawnhnak heh zaitlukin huham nai i! Pathian tu kumzangza in kumpibawi i tuh i, santong tianin uk tuh i.

⁴ “I inn ah nunnuam ngai le nainung ngai in um awng de ing.

⁵ Ikhalselai vaikhat tu i mitmu laiah a kihkul mang man ing ai tihikkul thil hmu ing.

⁶ Ciami i mang ai a sullam i relfiangtu tuhin Babylon peng songah kumpibawi thuron mite kokhawm tuhin thupe ing.

⁷ Kutrin sikthiamte, mipolte, mitkher thiamte le arsi sikthiamte kawi tlang ai i mang heh rel napui a sullam aisu inkhai rel thiam tlang lo i.

⁸ Cen Daniel kawi i. (Daniel tu i khuavang hming suang in Belteshazzar ti inkhai ko i). A songah a thianghlimmi khuazingte ai rauhla um ai a hnenah i mang heh rel ing. A hnenah:

⁹ Belteshazzar, kutrin sikthiamte hotu, na songah khuazing thianghlim pawl rauhla um ai thil ngaihsunurkul le thil thuk ling thil isi, ti ling ing. I mang tu hetihin i: a sullam i rel tu!

¹⁰ “I mitmu laitak ah larhnak hmu ing ai laivum pumpuhluk laiteng ah thingkung lianpui kung khat hmu ing.

¹¹ Ciami thingkung tu khang amam sang amam ai a phundir in van ban ai laivum mi hmuahhmuah in hmu sio i.

¹² A hnahte tu mawi roh ai, a thai tu tampui ai laivum pumpuhluk aih khop in tam i. Ramsate a hlimhnia ah bok tlang i, vaniute a kakte ah bu sa ai a nungmi hmuahhmuah in a thai ai i.

¹³ “Ciami larhnak thu i ngaisung hnelhno laitak ah van in fel ngai le ralring ngai in khua a tangmi vancungmi pakhat zuktolh i.

¹⁴ Aw cawm ngai in thu phuang ai, ‘Thingkung heh vawng tu ilai a kakte tan tusek ih. A hnahte heuh tusek ilai a thaite piakruai tusek ih. A hnenin ramsate le a kakte ai vaniute hnawt tusek ih.

¹⁵ Ikhalselai a kunghmui le a hamte tu thir le dar cikcin thawn khit tu ilai laipua lakah zam tu ih. Cia hmunah hampa lakah zam tu ih. “Tunai panin hemi pa vumah nai tla tu selai ramsa le thingkung le hampa lakah um tuseh.

¹⁶ Kum sarih song minung thinlung nai loin ramsa thinlung sawn nai tuh i.

¹⁷ Hemi tu fel ngai ai a ralring ngai vancungmi ai thurelcathnak i. Ciatih imanin laivum khuahacang mite in ling tuseh: Cungnungber Pathian in minung ai ram ukhnak vumah thu nai ai ciami ram ukhnak tu a daihhnak vumah pe i, laivum mi nauta ber hnen ahkhai pe thai i, ti i.

¹⁸ “Hemi tu i mang manhnak i. Tunah Belteshazzar, i mang ai a sullam i rel tu. I thuron mite pakhat inkhai a sullam i rel ben tlang lo i; ikhalselai nang incen i rel ben tuh isi, zaimantifangin a thianghlim khuazingte ai rauhla na songah um i,” tiin ti i.

¹⁹ Ciami a za fangin Belteshazzar ti inkhai kohnak Daniel tu a thinlau ai zaikhai pong ben lo i. Ciatihin kumpibawi in a hnenah, “Belteshazzar, i mang le a sullam in zaikhai na lauruai maseh,” tiin ti i. Belteshazzar in, “Kumpibawi, na mang le a sullam heh nangmah caah ilo in na ralte ca tuh iselai i daih ngai napui i!

²⁰ Thingkung sang ngai ai a phundir in van a tongtu heh laivum mi zongzong in hmu thil i.

²¹ A hnahte tu mawi roh ai a thai tu laivum pumpuhluk in aih khop tuhin tam i. A hniaah ramsate bok ai a kakte ah vaniute in bu sa i.

Daniel In Mang Relfiang I

²² “Aw kumpibawi, thingkung sang ngai le a kho ngai tu nangmah isi. Thawm na lian ai van ban isi; na hathnak huham tu laivum pumpuhluk hleng i.

²³ Kumpibawi, nangmah in na sik laitak ah van in vancungmi zuktolh ai, ‘Thingkung heh vawng tu ilai cek tusek ih; ikhalselai a kunghmui tu laipua lakah zam tu ih. Thir le dar cikcin in khit tu ilai ram lak ai hampa lakah zam tu ih. Hemi pa vumah nai tla tu selai ciata ah ramsa thawn kum sarih song um tuseh,’ ti i.

²⁴ “Aw kumpibawi, na mang ai sullam tu hetih i ai Cungnungber Pathian in na vumah a hleng tuhhnak phuang zo ihang.

²⁵ Minungte umhnak khua le ram an na hnawt tuhai ramsa lakah um tuh isi. Kum sarih song kawlpawcang bangin hampa ai tuh isi; hampalak ah it tuhai nai in na tlak tuh i. Cen minung ram ukhnak vumah Cungnungber Pathian in thu nai i tihnak le ciami ram uktu heh a daihhnak hnenah pe i tihnak khiah ling ngah tuh isi.

²⁶ Kunghmui tu laipua lakah zam tuhin vancungmi in thupe i. A sullam tu Pathian in laivum pumpuhluk uk i, ti na ling ngah fangin kumpibawi na cang leh tuh i, tihnak i.

²⁷ Ciamanin kumpibawi, i thu relhnak heh ngai tu. Sualhnak bawn nawn mah, a dikcangmi bawn tulai mifarahte ninghio tu. Ciatihin khang na so tuh zianzo i,” ti i.

²⁸ A tihnak bangin kumpibawi Nebuchadnezzar vumah khim sio i.

²⁹ Hla hlaihnih hnuaah, Babylon khua a kumpibawi inn vumah a lamleng teng fangin,

³⁰ “Sik tu ih, Babylon a thawmlian zia heh! I khuapui ah bawn ai i huham le i hathnak, i songlawihnak le i thawmlianhnak larruai tuhin din ing,” tiin ti i.

³¹ A ponghnak rin a bo man hlanah van in aw in, “Kumpibawi Nebuchadnezzar, i relhnak heh ngai tu! Na kumpibawi huham na hnenin lang zo i.

³² Minung umhnak khua le ram in na hnawt tuh i; hampalak ramsa lakah um tuhai kum sarih song kawlpawcang bangin hampa ai tuh isi. Cen Cungnungber Pathian in minung ram ukhnak vumah thu nai ai ciami ram ukhnak heh amah a daihhnak hnenah pe thai i, ti khiah ling ngah tuh isi,” tiin ti i.

³³ A tihnak bangin khim ngaingai i. Nebuchadnezzar tu minung umhnak khua le ram in hnawt teu ai kawlpawcang bangin hampa ai ngaingai i. A taksa vumah nai tla i; a sam tu muvanlai kohmul tluk in sau ai a tin tu vaniu tin bangin sandir i.

Nebuchadnezzar In Pathian Thangphat I

³⁴ Kum sarih khim ai van i sik fangin lungmu i khim leh i. Cungnungber Pathian thangphat ing ai kumzangza in a nungmi hnenah upathnak le songlawihnak pe ing,” tiin kumpibawi in ti i. “Kumzangza in uk tuh i, A ukhnak tu catloin kho tuh i.

³⁵ Laivum minungte tu Zaikhai ilo in sik i. Van ai vancungmi le laivum ai minungte tu, Amah in uk sio i. Aisu inkhai a daihhnak el thil lo i; A thil bawnhnak khai thu zawt thil lo i.

³⁶ “I thinlung a khim leh fangin tu i hmingthanghnak, i thawmlianhnak, i songlawihnak le i ram umhnak pawl khiah i hnenah i pe leh sio i. I kuthnia ai bawi awngtu le i minung phun upate inkhai i cosang leh ai i kumpibawi thunaihnak khai a hlan tahin a thawmlian sawn in i hnenah i pe leh i.

³⁷ “Tun tu kaimah Nebuchadnezzar in Vancung Kumpibawi thangphat ing, upat ai aan fawn ing. A bawnhnak hmuahhmuah a dikcang le a dikmi i ai puarthau ngai in thil a bawntu heh a hniaah hla i,” tiin kumpibawi in ti i.