Daniel 11 - Zanniat Bible

¹ Michael, ani tu i bawmtu le i ṭantu tuhin ṭuanvo naitu i,

² Cen tunai i rel tuhhnak heh thudik i,” ti i. Vancungmi in, “Persia ram tu kumpibawite pathum in uk tuhlai i. A palihnak kumpibawi tu a dangte tahin lian tuh deuh i. A hat ber le a lianber laitak ah Greek ram zuam ngam tuh i.

³ Cen a ralpha ngai kumpibawi pakhat suak tuh i. A ukhnak ram tu kau tuh ngai ai a nuamhnak hmuah bawn tuh hluahhlo i.

⁴ Ikhalselai a hat ber laitak ah a ram ukhnak tu khan dun tuh sio ai ramte pali ah cang tuh i. Amah ai tesinfa a ilomi in a tumrul in Kumpibawi ṭuan tuh i. Ikhalselai amah tluk in aisu inkhai huham nai tuh lo i.

Egypt Le Syria Ramte

⁵ “Egypt ram kumpibawi tu hat tuh ngai i. A ralbawi lianber pakhat tu amah tahin hat tuh sawn ai a ram ukhnak khai kau tuh sawn i.

⁶ Kum tampui hnuaah Egypt kumpibawi in Syria kumpibawi thawn ṭangkawmhnak laikhen bawn kawm tuhai a fanu khai nupui tuhin pe tuh i. Ikhalselai ciami laikhen tu a rai awk tuh lo i. Egypt kumpibawi ai fanu, a pasal, a fa le amah a hluntu, cengfate rekhnak tuar tuh sio i.

⁷ A rai hlanah Egypt kumpibawi fanu ai songkhat kumpibawi cang tuh i. Syria kumpibawi ralkapte tawng tuh i; amahte ral ṭanghnak ralkulh song tianin nor tuhai neh tuh i.

⁸ A khuavang limte le a khuavangte hnenah pehnak sui le ngun ai bawnhnak thilrite tu Syria in Egypt ramah phur leh tuh i. Kum rai thah daphnak a um hnuaah,

⁹ Syria kumpibawi in Egypt ram tawng tuh i; ikhalselai let kul leh tuh i.

¹⁰ “Syria kumpibawi ai fapate in raltawng tuhin ralring tuhai ralkap tam roh khawm tuh i. Kumpibawi fapa lakai pakhat in ralte ai ṭanghmun khuarhnak tu tilian bangin tawng tuh i.

¹¹ Ciafangin a thinraw in Egypt kumpibawi in Syria kumpibawi tawng tuhai a ralkap tam roh pom tuh i.

¹² Ciatihin ral a neh manin le Syria ralkap tampui a rek manin hngal tuh ngai i; ikhalselai ral tu neh tuh ṭiode lo i.

¹³ “Syria kumpibawi khai let tuhai a hlan tahin ralkap tam deuh in khawm tuh i. A can remcang fangin ralthuam pha bik a awhtu ralkap siar cawk lo thawn Egypt tawng tuhin feh tuh i.

¹⁴ Ciafangin Egypt mi tampui tu amahte kumpibawi daih loin raltho tuh i. Cen Daniel, na miphun songin mirek kih lomi hrekkhat tu, larhnak a hmu manin raltho tuh ve i; ikhalselai sung tuh i.

¹⁵ Ciamanin Syria kumpibawi in vingpui ai kulhhnak khuapui khiah kulh tuhai lang tuh i. Egypt ralkapte in tawng ben tuh nawn lo i. A ralkapte lakai a hat ber pawl rin raltawng tuhin thazang nai tuh nawn lo i.

¹⁶ Ral nehtu Syria in tawngtu aisu khai nai loin a nuamnuam bawn tuh betbo i. Thukhamhnak Ram ah ding tuhai ciami ram tu a kut songah hup tuh i.

¹⁷ “Cen Syria kumpibawi in raltho tuhin ngaisung tuh i; a ralkap hmuahhmuah hmang tum tuh i. A ral ram siatsuah tuh sek in a ral thawn lungrualhnak bawn tuhai amahte fanu khai a ralpa nupui tuhin pe tuh i, ikhalselai a tumtekhnak tu hlehsuah tuh lo i.

¹⁸ Cia hnuaah tifingriat kam ramte tawng tuhai ram tampui neh tuh i. Ikhalselai ramdang pakhat uktu bawi in amah khiah neh tuhai a puarthauhnak boruai tuh i; a puarthauhnak tu amah Syria kumpibawi vum lala ah hlengruai tuh i.

¹⁹ Kumpibawi tu amah ai ram ralṭanghnak vingpui ah let in ṭang tuh napui sung tuh thotho i; ciatihin ani khai bo tuh i.

²⁰ “Amah hnuaah kumpibawi pakhat suak tuh i. Ciami kumpibawi in a ram song paisa khangruai nuam in a kuthnia bawi pakhat ruai tuhai a ram minungte hnenin ngunkhuai tampui lang tuh i. A rai hlanah ciami kumpibawi khiah rek tuh i, ikhalselai mizapui hmuh ah i tuh lo ai raltawnghnak hmun ahkhai i tuh lo i,” tiin ti i.

Mihrokhrawl Syria Kumpibawi

²¹ Vancungmi in relfiang betbo ai, “Ciami kumpibawi a sangtu Syria kumpibawi tu mihrokhrawl, misiava i tuh i; kumpibawi cangthilhnak lampui nai tuh lo napui mangrinlo in mi zawlhnak in kumpibawi thunaihnak khiah sut tuh i.

²² Amah a engsantu heh, Pathian ai Suangbawi Sang ita inkhai, lon le hnawlhnak tuar tuh i.

²³ Laikhen bawn in ram tampui zawl tuh i; ram cikniu uktu inapui ni khat hnua ni khat hat tuh amam i.

²⁴ Mangrin loin peng lian ngai tawng tuhai a pupate ai bawn awng lohnak thil bawn tuh dekdo i. Raltawng ai a langhnak le a suthnak hlawnthilte khiah amah a hluntute zem tuh dekdo i. Ralving tampui tawng tuhin tum lawk tuh napui a rai hlanah a can bo tuh i.

²⁵ Ralpha ngai in Egypt ram tawng tuhin ralkap tampui lang tuh i; Egypt kumpibawi khai amah tawng tuhin ralkap tampui le hat ngai thawn ralring tuh ve i. Ikhalselai Egypt kumpibawi tu engsanhnak tawk tuhai hlawhtling tuh lo i.

²⁶ A thuronhnak ber mite in siatsuah tuh i; a ralkap tampui rekhnak tuar tuhai piak tuh sio i.

²⁷ Cen kumpibawite pahnih tu cabuai pakhat ah rong daikim kawm tuh i; ikhalselai amahte thinlung tu pha tuh veve lo ai pakhat le pakhat zawl dun tuh hnelhno i. Amahte tumhnak tu bawn ben tuh lo i, zaimantifangin a can khim lai lo i.

²⁸ Syria kumpibawi tu a suthnak thilri hmuahhmuah thawn let tuh i; Pathian minungte ai biahnak siatsuah tuh sek tum in let tuh i. A nuamnuam bawn tuh betbo ai amah ramah let tuh i.

²⁹ “Leh hnuaah Egypt ram tawng leh tuh i; ikhalselai a hlan bangin thil cang thil tuh lo i.

³⁰ Rome miphunte amah tawng tuhin lawng thawn kawi tuhai a thinlau tuh i. “Cen a thinraw in let tuhai Pathian minungte ai biahnak siatsuah tum tuh dekdo i. Mah ai biahnak a zamtute ai thuruahpehnak khiah hlun tuh i.

³¹ A ralkapte hrekkhat in biakinn ningrimtiar tuh i. Nisiar hibawlhnak tu boruai tuhai thil Ningdul Tihikkul dah tuh i.

³² Ciami Kumpibawi in hrokhrawlhnak thawn naper tuh manin amahte biahnak a zangtaktute in bawm tuh i; ikhalselai Pathian a hluntute in tawng tuh i.

³³ Mipui lakai hotu mifimte khiah mi tampui hnenah kawm tuh ve i. Ikhalselai a rai hlanah ciamite seukhat tu raltawnghnak ah thi tuhai a hrekkhat tu mai in tai tuh i. Cen mi hrekkhat tu amahte thilri sut sah i tuhai thawng ah toh tuh i.

³⁴ Ciatihin rekhnak a tuar thliahthlo lakah Pathian ai minungte tu bawmhnak tlawmniu ngah tuh i; anite ṭantu mi tampui tu mah ca lek ruathnak manin ṭantute i tuh i.

³⁵ Ciami a fimmi hotute hrekkhat tu rekhnak tuar tuh napui ciatihin tuarhnak manin mizapui tu cianghlim deuh tuh i. Ciatihin can tawphnak, Pathian ai a thiahhnak can, a hleng hlan heh i tuh betbo lai i.

³⁶ “Syria kumpibawi in a nuamnuam bawn tuh i. Zaibang khuavang tahin khai i lian sawn i, tiin tluangkhawng tuhai Cungnungber Pathian tahin rin thawm i lian sawn i, tiin porh dun tuh i. Pathian cawhhnak a tawk hlan ahcen ciatihin ti thil tuh betbo i. Ikhalselai Pathian incen a tumtekhnak bang cekci in bawn tuh i.

³⁷ Kumpibawi in a pupate ai ruaih mi khuavang, le nupangte ai a daih ngai mi khuavang khai zaikhai siar tuh lo i. Zaibang khuavang khai zai nam tuh lo i, zaimantifangin khuavang tahin i lian sawn i, tiin ruat dun tuh i.

³⁸ Cia tahin vingpui a humhimtu khuavang upat tuh sawn i. A pupate in bia awng lohnak khuavang hnen sawn ah sui le ngun, lungmankhung le lehsawng songlawi dangdang pe tuh i.

³⁹ A vingpui in ṭangtu tuhin ramdang khuavang biatute hmang tuh i. Amah khiah kin uktu bawi isi, tiin a sangtute tu upathnak, naper lian puipui le lehsawng ah lairam pe tuh i.

⁴⁰ “Syria kumpibawi in nehhnak can a khim cuahco fangin Egypt kumpibawi in amah khiah tawng tuh i; cen Egypt kumpibawi tu a hathnak veksen, a siphuh le a siphuhlengte le lawng tampui thawn tawng tuh ve i. Tilian bangin ram tampui tawng tuh i.

⁴¹ Thukhamhnak Ram rin tawng tuhai a thawng a thawng in rek tuh i; ikhalselai Edom ram, Moab ram le Ammon ram a tang lai mite tu luat tuh i.

⁴² Hemi ramte a tawng fangin Egypt ram rin luat tuh lo i.

⁴³ Egypt ramai a thuphnak hlawnthil, sui le ngun le a dang a mankhung thilte lang tuh sio i. Libya ram le Ethiopia ram khai neh tuh i.

⁴⁴ Cen nisuah lam le sak lamin a hlenghnak thuthang in a thin lauruai tuh i; thin raw ngai in tawng tuh amam ai khua le ram tampui siatsuah tuhai mi tampui rek tuh i.

⁴⁵ A kumpibawi ponhlamte rin tifingriat le Biakinn dinghnak karlak ah sa tuh i. Ikhalselai ciata ah aisu khai bawmtu nai loin thi tuh i,” tiin ti i.