Daniel 10 - Zanniat Bible

Tigris Runpui Ah Daniel Hmuhnak

¹ Cyrus in Persia Kumpimangbawi a ṭuan kum thumhnak ah Belteshazzar ti inkhai a kohnak Daniel hnenah thu pakhat larruai i. Ciami thu tu thudik i, ikhalselai ling har ngai i. A hnenah larhnak in relfiang i.

² Cia laiah zarh thum song lungsia in um ing.

³ Zarh thum a khim hlan tu rong ur zaikhai ai lo ing, sa khai ai lo ing, cabitti khai ding lo ai sam khai kiat lo ing.

⁴ Cia kum hlakhathnak hla, ni kul hluanli nia ah runpui lian ngai Tigris Runpui kamah ding ing.

⁵ Khua cuan ing ai minung bang, pon fangfem hnikpon sil ai sui pha ber elpen a penmi hmu ing.

⁶ A taksa ruangpui tu lungvar bangin tleu i. A mithmai tu vantlingtleleuh bangin tleu ai a mit khai mailiau bangin liau i. A ban le a kete tu ciang ngai ai a nawthnak liang dar bangin tleu zutzo ai a aw tu miburpui aw bang i.

⁷ Ciami larhnak a hmutu heh kaimah ian ing. I hiangai a umtute in zaikhai hmu lo i, ikhalselai lau ai tlan tlang i, cen relh tlang i.

⁸ Kaimah lek i tang ai ciami ngaihsunurkul a larhnak heh sik hnelhno ing. Tha i bo sio i, i mithmai khai dal sio ai aisu inkhai i lingthiam tuh lo i.

⁹ A aw i za fangin laipua lakah i tlu ai zaikhai ling loin bokkhup ing.

¹⁰ Cen kut pakhat in i awh ai i kut le i khuk in i vakruai i. I ngor derdo lai i.

¹¹ Vancungmi in, “Daniel, Pathian ai ithnak mi isi. Ding tulai i rel tuhhnak heh phatak niu in ngai tu. Na hnenah a hlatmi ing,” tiin i ti i. Ciatihin a rel sawng fangin ding ing. Ikhalselai i ngor derdo lai i.

¹² Cen ani in, “Daniel, Lau mah. Lingthiamhnak nai tuhin hniatacuh tuhai na ruatcat nia ai panin na sawngenhnak Pathian in za zo i. Na sawngenhnak na sawn tuhin hleng zo ing.

¹³ Persia ram kilkhawltu bawi vancungmi in ni kul hluankhat song i kham i. Cen vancungmi lakai a lianber pakhat Michael in i bawm i, zaimantifangin Persia ramah kaimah lek a hlummi ing.

¹⁴ Hmai lamah na minungte vumah ziang hleng tuh i ti na lingruai tuhin hleng zo ing. Hemi larhnak tu hmai lam thu i,” i ti i.

¹⁵ Ciatihin a pong fangin tu laipua lek sik ing, zaikhai pong thil loin i um i.

¹⁶ Cen minung bang vancungmi in a kut i san ai i kahmur i dai i. A hnenah, “Bawipa, Hemi larhnak in tha i boruai sio ai ngor loin um thil lo ing.

¹⁷ A bawipa hmaiah a dingtu sal bang ing. Na hnenah akontih in pong thil tuh ing? Thazang zaikhai nai lo ing, haihawh tuh khai nai lo ing,” tiin ti ing.

¹⁸ Amah in i dai leh fangin i hat deuh in ling dun ing.

¹⁹ Ani in i hnenah, “Pathian in na it i. Ciamanin zaikhai lau mah, zai inkhai na lauruai maseh,” i ti i. Ciatihin i ti fangin kaimah lala a hat deuh bangin i um ai a hnenah, “Bawipa, nang in i rel tuhhnak tu rel tuhang. I cak deuh zo i,” tiin ti ing.

^20-21 Ani in, “Zaimanin na hnenah kawi ing, ti khiah ling aw sim? Thutak laibu songah a nganhnak na hnenah phuang tuhin kawi ing. Tunai Persia ram kilkhawltu bawi vancungmi tawng tuhin let tuh ing. Cia hnuaah Greek ram kilkhawltu bawi vancungmi lar tuh i. Israel ram kilkhawltu bawi vancungmi Michael siarlo i bawmtu aisu khai um lo i.