Daannolhnak 8 - Zanniat Bible

Co Tuh Ram Pha

¹ “Tunnia i pehnak thukham hmuahhmuah heh fel ngai in hlun tu ih. Ciatihin hlun le i sikhaw ning nung tuh i, ning pungzai tuhai ning pupate hnenah Bawipa ai a thukhamhnak ram co tuh i si.

² Nelrawn ramcar ah kumpui kum sawmli song Bawipa ning Pathian in kong ning hoi ai a thupehnakte ning hlun tum maw hlun tum lo tiin ning thinlung songai thuruathnakte ling nuam manin ning hnenah harsahnak a hlengruai khiah ruat tu ih.

³ Rikam in ning dah i. Cia hnuaah ningmah le ning pupate ning ai awng lohnak manna sang ning aih tuhin ning pe i. Hetihin a bawnhnak tu rong lekin nunhnak ilo i; Pathian hmurka ai suakhnak thu sawn nunhnak i, ti ning linghnak tuh sawn i.

⁴ Ning vakvaihnak kum sawmli songah ning hnikpon her lo ai ning ke khai por lo i.

⁵ Pa in a fate thu a tiam de bangin Bawipa ning Pathian in thu ning tiam ai cawhhnak khai ning tuar de khiah hai mah ih.

⁶ Ciamanin Bawipa ai thupeciahnak bangin nung tu ih; a thukham bangin nung tu ilai ani tu kihzah tu ih.

⁷ Bawipa ning Pathian in ram pha, runpui le namkumte umhnak, horkua le tlang vuman suakhnak rawnti le cirhtite umhnak,

⁸ sangvut le barley sangvut, cabit, thaihmin, tale thai, olive le khoitizu suakhnak ramah ning hlengpui i.

⁹ Cia ramah rikam in um tuh awng lo i si; hlawhsamhnak khai nai tuh awng lo i si. Hemi ramai lungto in thir suah tuhai tlang vumah dar co tlang tuh i.

¹⁰ Ai tuh ning rawphnak hmuahhmuah ai tuhai ning petu Bawipa ning Pathian thangphat tuh i si.

Bawipa Hai Fangin

¹¹ “Bawipa ning Pathian ning hai lohnak tuhin ralring tu ih; tunnia ai i pehnak a dan, a thupeciahnak le a thute hmuahhmuah pakhat khai pelh loin hlun tu ih.

¹² Ai tuh ning rawphnak hmuahhmuah ning ngah hnua, ning umhnak tuhin inn phapha ning sa hnua,

¹³ ning kawlpaw le ning tuute, ning sui le ning ngunte le ning sumsaw hmuahhmuah pungzai ai a tam ze fangin,

¹⁴ Sal ning tanghnak Egypt ram an ning suahtu Bawipa ning Pathian heh hai mah ih.

¹⁵ Khia tluk a kaumi le a kihkul nelrawn, a ru nai rul le kaikuamte umhnak songin amah in kong ning hoi i. Khia tluk a carmi le ti um lo hmun hampalak ah lungpui songin ningmah ca ti suakruai i.

¹⁶ Nelrawn ah ning pupate ai awng lohnak manna sang heh ning aih tuhin ning pe i. Leh hnuaah ning phahnak tuhin harsahnak in ning cu i.

¹⁷ Ciamanin kinmah hathnak le thazang in kin lian i, tiin zaikom inkhai ruat mah ih.

¹⁸ Ning lianhnak tuhin hathnak huham ning petu heh Bawipa ning Pathian i, ti khiah ling tu ngio ih. Hetihin a tihnak tu ning pupate hnenah thutiam a bawnhnak a khimruai manin i ai tunnia ahkhai cia thutiamhnak heh khoruai nuam i.

¹⁹ Khuavang dangdang bia nuam in le ruaih nuam in Bawipa ning Pathian hai mah ih. Hai le i sikhaw, tunnia ah fiang ngai in ning rel ing: siatsuahhnak tuar tuh tengteng i si.

²⁰ Bawipa ai thu hlun hlah le i sikhaw hmai lam ning nor deuhdeuh fangin he ramai minungte a pairalruai sek bangin ning khai ning pairalruai tuh sek i.