Daannolhnak 6 - Zanniat Bible

A Thupuimi Thukham

¹ “Bawipa ning Pathian in ningmah zirh tuhin a ruaihnak a thu le a dan hmuahhmuah hetihin i. Ning khur tuhhnak ram ning hleng fangin he dante hlun tu ih.

² Ciata ah can raipui ning um thil tuhin ningmah le ning tesinfate in ning nun song hmuahhmuah Bawipa ning Pathian kihzah tu ilai i pehnak amah dante hlun tu ih.

³ Aw Israel mite, cia thu heh ngai in hlun le i sikhaw lampui ning tluang tuhai kin pupate Pathian, Bawipa in thu kin khamhnak bangin miphun lianpui in ning cang tuhai hnawiti le khoitizu luanghnak ram nuam ah um tlang tuh i si.

⁴ “Aw Israel mite, phaniu in ngai tu ih! Bawipa amah pakhat lek heh kin Pathian i.

⁵ Bawipa ning Pathian tu ning thinlung veksen, ning nunhnak veksen, le ning thazang veksen in it tu ih.

⁶ Tunnia i pehnak thukhamte heh ning thinlung songah um tu ngio seh.

⁷ Ning fate zirh tu salawn ih. Inn ning um fang inkhai ituseh, sumpua lam ning vak fangin khai ituseh, rel tu ṭio ih. Ning cawlum fangin le naper ning per fangin khai sal tu ṭio ih.

⁸ Ning ban ah pen tu ilai, ning lingruaitu tuhin ning cal ah bet tu ih.

⁹ Ning inn dawngkham vumah le ning kotka vum ahkhai ngan tu ih.

Thungailo Hrang Ralringhnak

¹⁰ “Bawipa kin Pathian in ningmah ai ning sa lohnak khuapui lian puipui umhnak ram ning pe tuh ing tiin ning pupate Abraham, Isaac, le Jacob hnenah thukham zo i.

¹¹ Ciami khua songai innte heh ningmah ai ning khawl lohnak thil phapha in dim i, ningmah ai ning co lohnak namkumte um tuhai ningmah ai ning bir lohnak cabit vuandum le olive vuandumte um tuh bial i. Bawipa in cia ram ning hlengpui fangin ning rawphnak hmuahhmuah kham ngai in aih tuh ning nai fangin,

¹² sal ning tanghnak hmun Egypt ram an ning suahtu Bawipa ning hai lohnak tuhin fimkhur bik in nung tu ih.

¹³ Bawipa ning Pathian ian kihzah tu ih. Amah lek ruaih tu ilai amah hming lekin thukham bawn tu ih.

¹⁴ Ning hiangai ummi miphunte ai khuavangte bia mah ih.

¹⁵ Bia le i sikhaw Bawipa ai thinrawhnak ning vumah mai angin hleng tuhai ci ning hmit tuh sek i; zaimantifangin Bawipa ning Pathian, ning hnenai a ummi heh umhlah nai Pathian i.

¹⁶ “Bawipa ning Pathian tu, Massah ah ning cu zo bangin cu nawn mah ih.

¹⁷ A pehnak thukham hmuahhmuah felniu in hlun tu ih.

¹⁸ Bawipa hmaiah a dikmi le a phami bawn tu ilai lam ning tluang tuh i. Ciatihin ram pha heh ning pupate hnenah Bawipa ai thukhamhnak bangin khur tuhai,

¹⁹ a tiamhnak bangin ning ralte hnawt tuh sek i si.

²⁰ “Hmai lam can ah ning fate in, “Zaimanin Bawipa kin Pathian in he thukhamte heh hlun tuhin ning ruai heh ipa? tiin thu ning zawt fangin,

²¹ anite hnenah, ‘Egypt kumpibawi kuthnia ah sal tangmi ising ai Bawipa in a kut thacak in kin osuak i.

²² Ngaihsunurkul thil tampui le a kihkul thil tampui heh Egypt mite vumah le amahte Pharoah kumpibawi le a kuthnia ai tlangsuakte vumah a hlengruaihnak khiah kin mit rori in hmu i ing.

²³ Egypt ram an kin luatruai ai kin pupate hnenah a thukham bangin he ram khur tuhin kin fehpui i.

²⁴ Ciamanin Bawipa kin Pathian in he thukhamte le dante heh hlun tuhin le amah kihzah tuhin kin ruai i. Ciatihin bawn lesingkhaw kinmah heh kin kilkhawl tuhai kin khangsoruai tuh i.

²⁵ Amah thupeciahnak hmuahhmuah felniu in hlun ben lesingkhaw Pathian tu kin vumah a lungawi tuh i,’ tiin ti tu ih,” ti i.