Daannolhnak 5 - Zanniat Bible

Thupe Sawmkhat

¹ Moses in Israel mite tu kokhawm ai amahte hnenah, “Israel mite, tunnia ai i pehnak dante heh phatak ngai in ngai tu ih. Zir tu ilai hlun tu ih.

² Bawipa kin Pathian in Sinai Mual ah kinmah thawn thutiamhnak bawn i.

³ Kin pu le kin pate hnen lek ah bawn ilo i; tun heta ai a nungmi kinmah hnen ahkhai bawn i.

⁴ Ciami mual vumah mai songin Bawipa in hmaiton in ning hnenah pong i.

⁵ Ciami mai heh ning lau ai mual vumah kai ngam lo manin Bawipa ai thurelhnak khiah ning hnenah rel tuhin Bawipa le ningmah lakah ding ing. “Bawipa in,

⁶ Kai tu Bawipa ning Pathian, sal ning tanghnak Egypt ram an ning suahtu ing.

⁷ “Kaimah siarlo Pathian dang bia tuh lo i si.

⁸ “Van ai a ummi, ihlahle laipua vumai a ummi, ihlahle laihnia ti songai um mite ai hmel bangin milim bawn tuh lo i si.

⁹ Zaibang milim hmai ahkhai bok in bia mah ih. Zaimantifangin kaimah heh Bawipa ning Pathian ing ai umhlah naimi ing. Kaimah i huatu vum ahcen amahte sualhnak manin amah le a tesinfa vumah santhum sanli tianin cawhhnak hlengruai tuh ing.

¹⁰ Ikhalselai kaimah i ittu le i thukham a hluntute vumah san thawng tampui tianin a kho ngai i ithnak hmuh tuh ing.

¹¹ “Bawipa na Pathian hming heh hngalsakhnak in hmang mah ih; i hming hngalsakhnak in a hmangtu heh cawh tuh hrimhrim ing.

¹² “Bawipa ning Pathian kaimah in thu ning pehnak bangin Sabbath nia ul tu ilai kaimah ca thianghlimruai tu ih.

¹³ Niruk song naper tuh can nai i si;

¹⁴ ikhalselai ni sarih nia tu kaimah ca cianghlimruaihnak le cawlumhnak nia i. Cia nia ah naper tuh lo i si; ningmah ituseh, ning fate ituseh, ning salte le ning sumhnamte ituseh, ning hnenai a ummi ramdang mite ituseh, aisu khai naper tuh lo i si. Ningmah ning cawlum bangin ning salte khai cawlum tu ve seh.

¹⁵ Egypt ramah sal ah ning tang ai Bawipa ning Pathian kaimah in i huham le i hathnak in ning ohnak heh hih tu ngio ih. Ciamanin Sabbath nia ul tuhin thu ning pehnak i.

¹⁶ “Bawipa ning Pathian kaimah thupehnak bangin ning nu le ning pa upat tu ih; ciatihin ning lampui ning tluang tuhai i pehnak ramah a raipui ning nung tlang tuh i.

¹⁷ “Mi rek mah.

¹⁸ “Kangkawm sualhnak bawn mah.

¹⁹ ‘Ruko mah.

²⁰ “Na minungpuite a dik loin sualpuh mah.

²¹ “Midang nupui ot sah mah. A inn, a lo, a salte, a kawlpaw le a siphuh le a naihnak hmuahhmuah khai ot mah,’ ti i.

²² “Bawipa in he dante tu mual vumah a taikhawmtu Israel mizapui hnenah pe i. Maiko songin le mairo hangbel songin aw cawm ngai in pong ai he thupehnakte pe i; cia hnuaah belh cuang lo ihang. Cen he thupehnakte heh i hnenah i pe i.

Mizapui Lauhnak

²³ “Cen a mual pumpui heh mai in tuam ai, khuathim songin aw ning za fangin ning hotute le ning upate tu i hnenah kawi tlang ai,

²⁴ ‘Bawipa kin Pathian tu a hathnak le a huham songlawi kin hmuh ai mai songin a pong za i ing. Minung hnenah Pathian pong ai a pong hnua ahkhai kin nung lai thotho i, ti khiah tunnia lek ah ling i ing.

²⁵ Ikhalselai zaimanin thi tuh lau in um tuh hnelhno ising? Khia kihkul maiko pui in kin kang ai kin thi tuh sek i. Bawipa kin Pathian kin hnenah pong leh lekhaw kin thi tuh rori i.

²⁶ A nungmi Pathian mai songai pong a zatu aisu a nung um awng aw im?

²⁷ Ciamanin nangmah feh leh tulai, Bawipa kin Pathian ai ponghnak hmuahhmuah ngai ta tu. Cia hnuaah let tulai na hnenai a ponghnak heh kin rel leh tu. Ngai tuhai hlun tuh sio i ing,’ iti tlang i.

²⁸ “Ciami heh Bawipa in a za fangin i hnenah, ‘Na hnenai amahte ponghnak heh za zo ai thudik i.

²⁹ Hetihin amahte thinlung um ṭio selai i daih bang ngai! Amahte le a tesinfate lampui a tluang tuh ṭio in kaimah heh i kih ṭio ai i thupehnak hmuahhmuah hlun ṭio selai i daih i.

³⁰ Feh tulai amahte riahbuk ah tlung tusek seh.

³¹ Ikhalselai nang tu i hnenah um tulai i dan le i thu hmuahhmuah ning pe tuh ing. I pe tuhhnak ram songah amahte hlun tuhin ciami dante le thupehnakte heh zirh tu,’ iti i.

³² “Ciamanin Bawipa ning Pathian in thupeciahnak hmuahhmuah ning bawn tuh sio in fimkhur tu ih. A thupeciahnak heh pakhatniu bangkhai hlun loin um mah ih.

³³ Ning umhnak tuh ram songah ning um thai ngiohnak tuhin Bawipa ai thupeciahnak heh hlun tu sio ilai zaizongza ah lampui ning tluang tuh i.”