Daannolhnak 13 - Zanniat Bible

¹ “Prophet ihlahle mang letthiam mi pakhatkhat ningmah lakah suak ai,

² ning bia awng lohnak pathian khiah bia tuhai ruaih ngasing, tiin ning sawhhmuh ai thil mak ngaingai le ngaihsunurkul ning hmuh ai, cia a hmuhhnak thil mak ngaingai khai dik ngai in khimliang khalselai,

³ ciami heh zaikhai siar mah ih. Bawipa tu na thinlung a veksen in it ngaingai maw it ngaingai lo tiin ningmah ning cu tuhin Bawipa ning Pathian in ani tu hmang i.

⁴ Bawipa ning Pathian heh hlun tu ilai kihzah tu ih. Amah thu ngai tu ilai a thupehnak bawn tu ih. Ani tu bia tu ilai rinsantlak mi cang tu ih.

⁵ Ikhalselai sal ning tanghnak Egypt ram an ning suahtu Bawipa ralcai tuhin ning forhtu prophet ihlahle manglettu heh rek tu ih. Ani tu mi phalo i ai Bawipa ai ning daihsahhnak nunghnak lampui in ning hoisual tum manin ani tu rek tuh i si. Ciatihin thil sual heh boruai tuh i si.

⁶ “Na unau, na fapa, na fanu, na ithnak na nupui, ihlahle na rualpui pha ber inkhai ningmah le na pipute ai bia awng lohnak khuavang bia tuhin a thupniu in ning zawltu i thai i.

⁷ Ning hiangniu ai a umtu miphunte ai khuavang, ihlahle lamhlapui ai umtu miphunte ai khuavang bia tuhin ning zawltu pakhatkhat i thai i.

⁸ Ikhalselai hlun mah ih; a ponghnak khai ngai mah ih. Ani tu ninghio hrimhrim mah ih, hup mah ih; a zuah khai zuah mah ih.

⁹ Rek tu lio! Lungto in sep a hmasabertu itu; midang inkhai sep tu ṭen seh.

¹⁰ Lungto in a thi tian sep tu rori ih! Sal ning tanghnak Egypt ram an ning otu Bawipa ning Pathian thawn lamhla ah ning hoi tum i.

¹¹ Ciafangin Israel mite in ling tuhai lau tlang tuh i; lehhnua ah ciabang thil sual heh aisu inkhai bawn ngam tuh lo i.

¹² “Bawipa ning Pathian ai a ning pehnak khuapui songah ning um fangin,

¹³ ning bia awng lohnak khuavang bia tuhin ning miphun songin mihrokhrawl hrekkhatte in khuasong mite hoisualhnak thu ning za fangin,

¹⁴ fel ngai in zong tu ih. Thudik i ai ciabang thilpha lo um ngaingai lekhaw,

¹⁵ ciami khua songai a ummi zongzong a sumhnamte thawn vang in sattu ilai rek tusek ih. Cia khua heh siatsuah tusek ih.

¹⁶ Khua song mite naihnak thilri hmuahhmuah heh khua mual ah khawm tusek ih. Cen Bawipa ning Pathian hnenah hibawlhnak aiawh in cia khua le a songai umhnak hmuahhmuah heh mai in tai tusek ih. Ciatihin kumzangza in hnawm tuhai saleh tuh lo ihang.

¹⁷ Hnawmruai tuh sio tihnak songin ning ca zaikhai lang tuh lo i si; cia hnuaah Bawipa ai thinrawhnak heh dem tuhai ning ninghio tuh i. Tun nia ai i pehnak thukhamte hlun ai amah ruaihnak bawn le i sikhaw,

¹⁸ ning vumah ninghio thinpemhnak nai tuhai ning pu le ning pate hnenah a thukhamhnak bangin ning pungzai tuh i.”