Amos 9 - Zanniat Bible

Bawipa Ai Thukhanhnak

¹ Bawipa tu puleng hiangah a ding khiah hmu ing. Thupe ai, “Biakinn khuam lubolte lang tulai sumpua tianin hlin tusek seh. Khoi tusek selai misenpui ai lu vumah tla tusek seh. Midang hmuahhmuah ral kut in thiruai tuh sek ing. Aisu khai luat tuh lo i. Pakhat bang khai tlansuak tuh lo i.

² Mithi khua ah relh tum in laipua co dekdo khalselai kaimah in phorhsuak tuh thotho ing. Vancung ah kai khalselai duk ai hla tuh sek thotho ing.

³ Karmel mual phundir ah relh khalselai kaimah in si tuhai pom tuh thotho ing. Kaimah hnenin tlan ai tipuithuanthum holtong ah relh khalselai ti songai rulpui thupe tuhai cikruai tuh ing.

⁴ Amahte ralte in pom tuhai ramdang ah hoi sek khalselai rek tuh sek in ralte tu thupe tuh ing. Hemi minungte tu mitkhep loin sik tuh ing; anite bawm tuh tum lo ing, siatsuah tuh sek ian tum ing,” ti i.

⁵ Cungnungber Bawipa Pathian in lailung dai ai hlin dekdo i. Laivum mi zongzong lungsia i. Laivum pumpuhluk tu Nile Runpui bangin A niam tuak, a kai tuak in um i.

⁶ Bawipa in vancung ah a umhnak bawn i; Van tu laipua ai vumah a kumpui in dah i. Tifingriat ai tite ko ai laipua vumah burh i; A hming tu Bawipa i.

⁷ Bawipa in, “Aw Israel mite, ningmah tluk in Ethiopia mite khai ruat ngai ing. Egypt ram an kaimah in ning hoi bangin Filistin mite tu Crete ram an hoi ai Syria mite tu Kir ram an kaimah in hoi ing.

⁸ Kaimah Cungnungber Bawipa in he miphun sualral, Israel kumpibawi ram tu a thupniu in sik ṭiode ai laivum in ciangfai in phiat tuh ing. Ikhalselai Jacob ai tesinfate tu a veksen in siatsuah tuh lo ing.

⁹ “Kaimah in thupe tuhai Israel mite tu khoseng in rong a sut bangin sut tuh ing. Mi phahnem lo pawl lon nuam in miphun tampui lakah sut tuh betbo ing.

¹⁰ I minungte lakin, ‘Harsahnak tu Pathian in kin hnenah hlengruai tuh lo i,’ a titu misualte tu ral kut in thi tuh i,” tiin ti i.

Israel Cakruai Lehhnak

¹¹ Bawipa in, “Inn min bangin a minsa David ram ukhnak i tunglehhnak nia tu hleng dawn ihang. A vingpui remm leh tuhai tungding leh tuh ing. Sa leh tuhai hlanlai a um cia bangin umruai leh tuh ing.

¹² Ciamanin Israel mite in a tanglaimi Edom ram neh tlang tuh sio ai kaimah ai awng miphun hmuahhmuah khai neh tuh sio i,” ti i. Hemi a cangruaitu tuh Bawipa in ti i.

¹³ Bawipa in, “Can hleng tuhai Lo rong khawm cawk loin pung tuh i; Cabit tu cabitti bawn cawk loin karhzai tuh i. Tlangsangpui in cabitti hlum far tuh piapo ai, Tlang vuman ti bangin luang tuh i.

¹⁴ I minungte amahte ramah tlungruai leh tuh ing; A hnawm cia amahte khua saleh tuhai Ciata ah um tuh i. Cabit vuan bawn tuhai Cabitti ding tuh i. Vuandum bawn tlang tuhai Amahte cinghnak ai tuh i.

¹⁵ Amahte hnenah i pehnak ram songah I minungte bir tuhai Phai leh tuh nawn lo i,” tiin ti i. Bawipa ning Pathian in rel zo i.