Amos 6 - Zanniat Bible

Israel Siatsuahhnak

¹ Zion ah nunnuam ngai in a ummi le Samaria ah hlamuang niu in a ummi, miphun lianpui Israel hoitu mi thawmlian pawl, Israel misenpui ai bawmhnak daih in a bentute, ning hmai lam pit ze i!

² Feh tu ilai Kalneh khua khiah sik tu ih. Khua lian ngai Hamath le Filistin ramai Gath khua khai sik tu ih! Hemi ramte tahin ningmah ning pha sawn im? Ning ram heh amahte ram tahin kau deuh im?

³ Hnophnak nia hleng tuh heh ling ning nuam lo inkhai thil ning bawnhnak in cia nia khiah nongruai amam i.

⁴ Khuahluan pha ngaingai vumai a ittu le khunzau nuam ngaingai ah a zau tu hiahho, kawlpaw dawnniu sa le tuuniu sa kham ngai ai a aitu ningmah ning hmai lam pit bikraw i!

⁵ David bangin la puah le congcing tum ning nuam ngai i.

⁶ Cabitti tu khuat lian puipui in dut tlang hnelhno ai rimhmui pha ber mat dun hnelhno i si; ikhalselai Israel a hnawmral fangin lung ning sia tau lo i.

⁷ Ciamanin sal cang tuhin a feh hmasabertu ningmah i tuh i si. Ning rong aih puai le ning nuamhnak puaite bo tuh i.

⁸ Cungnungber Bawipa Hmualnaiber Pathian in he ralringhnak thu tu pe zo i: “Israel ai hngalhnak heh i hua i; a inn lian ngaingai khai i hmuhheh phun pawl i. Amahte khuapui ber le a songai umhnak thil hmuahhmuah ral kut songah pe tuh sio i,” tiin ti i.

⁹ Innsang pakhat songah minung pahra tang inkhai a pahra pahin thi tuh i.

¹⁰ Mithi ai songkhat mithi vui ṭuanvo naitu in miluang heh inn songin suah tuh i. Ciami a songkhat in innsong ai a tanglaimi pakhatkhat hnenah, “Aisu tal um lai aw i sim?” tiin auh tuh i. Ciafangin aw pakhat in, “Um hlah,” ti tuh i. Cen a songkhat pa in, “Dapniu in um tu! Bawipa ai hming sal hrimhrim tuh loin ralring tu,” tiin ti tuh i.

¹¹ Bawipa in thu a pe fangin inn lian ituseh inn cikniu ituseh bal tuh sek i.

¹² Lungtlep vumah siphuh dawp thil awm? Minung in tifingriat ti vumah kawlpawcang thawn lovai thil awm? Ikhalselai ning in dikcanghnak tu thihsi ah cangruai zo ai a pha heh a pha lo ah cangruai tlang i si.

¹³ “Lodebar khua lang ben i ing,” tiin porh dun dekdo i si. “Karnaim lang tuhin tu kin hat ngai i,” ti i si.

¹⁴ Cungnungber Bawipa Pathian Amah rori in, “Aw Israel mite, ning ram khurtu tuhin ramdang ralkapte hlat tuh ing. Ciami ralkapte in sak lamah Hamath Tlangkawn in hlang lam Arabah phairawn tian ning tawng tuhai ning nem tuh i.