Amos 5 - Zanniat Bible

Sir Tuhai Kohnak

¹ Aw Israel mite, mithi phumhnak la kaimah in ning sakhnak heh ngai tu ih:

² Fenu him Israel tu bo zo i, Tho leh tuh nawn lo ihang. Lailung ah tlu zo i, Amah thotu um lo i.

³ Cungnungber Bawipa in, “Israel ramsong khua pakhat in ralkapte thawng khat hlat i; ikhalselai zakhat ian tlung leh i. Khua dang pakhat in zakhat hlat napui pahra ian tlung i,” ti i.

⁴ Bawipa in Israel mite hnenah, “I hnenah let tu ilai ning nung tuh i.

⁵ Khuavang bia tuhin Beersheba ah feh mah ih; Bethel ah i si duh mah ih; Bethel tu zaikhai i tuh lo i. Gilgal khai feh duh mah ih; a minungte sal ah hoihnak tuar tuh sek i,” ti i.

⁶ Bawipa hnenah feh tu ilai ning nung tuh i. Feh hlah le i sikhaw ning vumah mailiau bangin Bawipa hleng tuh i. Bethel mite tu mai in kang tuh i; aisu inkhai hmit ben tuh lo i.

⁷ Dikcanglairelhnak khiah merh in felhnak khiah lai ah a septu ningte tu ning bo tuh i.

⁸ Bawipa in arsi khai bawn i, Siruk arsi le lepbak arsite; Thimhnak khiah sun nitleu ah bawn i, Sun khiah zan ah cangruai i. Tifingriat tite ko ai Laivum ah burh i. A hming tu Bawipa i.

⁹ Mi thahat pawl le a ṭanghmun vingpuite tu siatsuah sek i.

¹⁰ Ningte in thukhanhnak zung ai diklohnak a phuangtu le thudik a reltute hua i si.

¹¹ Mirimsu harsate cawh ai amahte rong sut i si. Ciamanin ning sahnak lungto inn phapha heh hluh tuh lo ai cabit vuan mawi songai ning cinghnak cabitti ding tuh lo i si.

¹² Ning sualhnak laukuldan le thil sual ning bawnhnak a tamdan heh ling sio ing. Mipha cawh i si, nawhthuh lang ai farah rimsu mite vumah dikcanglairelhnak thawn thukhan lo i si.

¹³ Ciamanin ciami can ah thuruat thiam mifimte tu dapthen in um i. Zaimantifangin cia can heh can sia i.

¹⁴ Thil siava zam in thil pha bawn tu ih; ciatih lekhaw ning nung tuh i. Cungnungber Bawipa Pathian tu kin hnenah um i ning ti bangin um tuh ngaingai i.

¹⁵ Thil siava hua tu ih, thil pha daih tu ih; thukhanhnak zung ah dikcanglairelhnak khiah bawi tuseh. Ciatih ilekhaw Joseph hin a tangsun vumah Bawipa in ninghiohnak nai tuhlai i.

¹⁶ Ciamanin Hmualnaiber Bawipa Cungnungber in, “Khuasong lampui ah kaphnak le aihramhnak um tuh i. Lovai mite ko tuhai kap man tham mite thawn mithi kah tlang tuh i.

¹⁷ Cabit vuandum cangah aihramhnak um tuh i. Kaimah in ning cawh tuh manin ciamite tu khim tuh sio i,” ti i. Bawipa in rel zo i.

¹⁸ Bawipa nia a um roh mite ning caah a kihkul i. Ciami nia in ziang ning phahnempui tuh i? Ning caah thimhnak nia i tuh i, tleuhnak nia i tuh lo i.

¹⁹ Chintit kih in tlan ai vom raw tawktu thawn bang dun tuh i. Ihlahle inn ah tlung in bangkhang zut ta ve ai rul cik tawktu bang i tuh i.

²⁰ Bawipa nia in tleuhnak ilo in thimhnak hlengruai i. Tleuhnak tlawmniu khai um lo a thim bikraw nia i tuh i.

²¹ Bawipa in, “Biakinn puai ning bawnhnak tepawl i hua ai hmuh i heh i.

²² Maitai hibawlhnak le sangvut hibawlhnak ning in i selhnakte heh ning sang sah tuh lo ing; hibawlhnak hrangah tiin thau ngai in ning cawmmi sumhnamte khai ning sang sah tuh lo ing.

²³ A cawm ngai ning lasahnakte khai com tuhang ih; ning congcing awte khai a ngai i zuam nawn lo i.

²⁴ Dikcanglairelhnak heh runti bangin luang tu selai felhnak tu a kang awng lomi tidap bangin luang tu sawn seh.

²⁵ “Aw Israel mite, hampalak ah kum sawmli song kaimah in ning hoi laiah hibawlhnak le pehnak zaikhai ning ngen lo ing.

²⁶ Tun tu ning khuavang le kumpibawi Sakkuth le ning arsi khuasia Kaiwan ai limte ning bia manin,

²⁷ Damascus pualam ramah sal cang tuhin kaimah in ning hoi fangin ciami milimte tu keng sek ning kul tuh i,” tiin Bawipa in ti i. A hming tu Cungnungber Pathian i.