Amos 1 - Zanniat Bible

¹ Hemi thu tu Tekoa khuami tuukhal Amos ai relhnak i. Hlinhlin hlan kum hnih, Judah kumpibawi tu Uzziah i ai Israel kumpibawi tu Joash ai fapa Jeroboam a cang laiah Pathian in Israel thula Amos hnenah a larruaihnak i.

² Amos in, “Bawipa tu Zion in huk dumdo i; A aw tu Jerusalem an khuari bangin thang i. Tuu lenghnak hampa ro sek i. Karmel Mual vumah hampa ro zo i,” ti i.

³ Bawipa in, “Damascus khua mite tun le tunin sual manin cawh tuh ing. Gilead mite ninghiohnak nai loin thir kam mun fangrialhnak thingtum thawn rial diamdo i.

⁴ Ciamanin Syria kumpibawi Hazael inn vumah mai hlak tuhai kumpibawi Benhadad ai bawhkulhte tu kang tuh sek i.

⁵ Damascus kotkate ekruai tuh sek ai Betheden uktu le Aven phairawn ai umtute hnawt tuh sek ing. Syria ram mite Kir ramah sal cang tuhin hoi tuh sek i,” tiin ti i.

Filistin

⁶ Bawipa in, “Gaza mite tu tun le tunin sual manin cawh tuh tengteng ing. Amahte miphun pumpui in Edom ramah sal cang tuhin zuar sek i.

⁷ Ciamanin Gaza ai khuakulhhnak vingpui vumah kaimah in mai hlak tuhai a inn pha pawl hmuahhmuah thawn kang tuh sek i.

⁸ Ashkelon khua uktute tu lon tuh ing. Ekron khua tu cawh tuhai a tang laimi Filistin mite tu thi tuh sek i,” tiin ti i.

Tyre

⁹ Bawipa in, “Tyre khua mite tu tun le tunin sual manin cawh tuh tengteng ing. A miphun pumpui in Edom ramah sal cang tuhin fehpui sek i. Pawlkomhnak thukham bawnhnak tu hlun lo i.

¹⁰ Ciamanin Tyre khua ai khuakulhhnak vingpuite vumah kaimah in mai hlak tuhai inn pha pawl hmuah thawn kang tuh sek i,” tiin ti i.

Edom

¹¹ Bawipa in, “Edom mite tu tun le tun sual manin cawh tuh tengteng ing. Amahte unau Israel mite ninghiohnak nai loin vang thawn hnawh i. A thinrawhnak tu tawp ti nai lo ai dap nia um lo i.

¹² Ciamanin Teman khua vumah mai hlat tuhai Bozrah inn pha pawl kang tuh sek i,” tiin ti i.

Amon

¹³ Bawipa in, “Ammon mite tu tun le tunin sual manin cawh tuh tengteng ing. Mi ram nor ai ral a tawng fangin Gilead nupang naupaite a pum rai sah sio i.

¹⁴ Ciamanin Rabbah khua ai khuakulhhnak vingpui vumah mai hlak tuhai a inn pha pawl kang tuh sek i. Cen raltawng dun nia ahcen auhnak tam tuhai a tawngdunhnak tu hlisia bangin zuang tuh i.

¹⁵ Kumpibawi le a kuthnia tlangsuakte sal ah pom tuh i,” tiin ti i.