Aanroling 3 - Zanniat Bible

Minote Hnenah Khuaruah Pehnak

¹ I fapa, i zirhhnak hai mah, Bawn tuhin i relhnak tepawl hih tu ngio law.

² Kaimah zirhhnak in nunsauhnak le nunnuamhnak na pe tuh i.

³ Na hnenin felhnak le rinsantlak ihnak in zaikom inkhai na zam maseh; Na hawng ah velh tulai, na thin songah ngan tu.

⁴ Ciatih bangin bawn lesikhaw, Pathian hmaiah le minung hmaiah daihsahhnak le hmingphahnak co tuh isi.

⁵ Bawipa tu na thinlung veksen in rinsan tu. Nangmah ai ruathnak le linghnak rinsan dun mah.

⁶ Na bawnhnak cangcang ah Pathian ling tu ngio lai, Amah in lampui dik na hmuh tuh i.

⁷ I fim pam i tiin ruat dun mah; Bawipa kih tulai, sualhnak zam tu.

⁸ Ciatihin bawn lesikhaw na taksa hrangah cakhnak i tuhai, Na ruh hrangah si pha cang tuh i.

⁹ Bawipa tu na sumsaw le na hlaithar hmasaber in thangphat tu.

¹⁰ Ciatihin bawn lesikhaw na rong inn ah rong in dim tuhai, Na cabit cinguu tu cabit thar in let tuh piapo i.

¹¹ I fapa, Bawipa nunthutiamhnak tu zaisiar loin um mah. Amah in na hau fangin na thin ur mah.

¹² Zaimantifangin pa in a ithnak a fate nun thu a tiam bangin, Bawipa in a ithnakte nunthutiam de i.

¹³ Fimhnak a hmutu heh mi lungawi i, Lingthiamhnak a naitu khai a lungawi ve i.

¹⁴ Fimhnak tu ngun tahin pha sawn ai, sui tahin a mankhung sawn i.

¹⁵ Fimhnak tu lungvar tahin a man khung deuh ai, Thildang thawn santeh thilh ilo i.

¹⁶ Fimhnak in nunsauhnak, lianhnak le upathnak na pe i.

¹⁷ A lampui tu nunnuamhnak lampui i ai, A lampui hmuahhmuah muanghnak i.

¹⁸ Fimhnak naitute tu lungawi tlang ai, Fimhnak in nunhnak pe i.

¹⁹ Bawipa in laivumpui khiah a fimhnak in semsuah ai, A lingthiamhnak in van khai khoruai i.

²⁰ A fimhnak in runti luangruai ai, laivum ah ruah si tuhin mairo umruai i.

²¹ I fapa, na fimhnak le na ruatthiamhnak khiah a kho ngai in awh tu, Na hnenin zaikom inkhai tlanruai mah.

²² Na rauhla caah nunhnak i tuhai, Na hawng caah mawihnak i tuh i.

²³ Na lamtluanah himniu in feh thil tuhai, Bahsualhnak khai tawk tuh lo isi.

²⁴ Zan na mitmu fangin na lau tuh lo ai, Mitmu muang ngai in zanvar it thil tuh isi.

²⁵ Mihrokhrawl pawl hnenah hlisia bangin hnophnak a hleng fangin, Ziang donharhnak khai nangmah caah um tuh lo i.

²⁶ Bawipa in himniu in na kilkhawl tuhai, Thang songah na awkruai tuh lo i.

²⁷ A kul a sam mite hnenah na bawn ben zah tianin thilpha bawn tu.

²⁸ Na innhnen khiah tun rori in na bawmthilhnak ilekhaw thangha tianin hak mah.

²⁹ Nangmah rinsan in na hiangai a ummi na innhnen khiah a vumah harsahnak bawn tuhin tum mah.

³⁰ Na vumah hnophnak a bawn awng lomi hau hnelhno mah.

³¹ Mi luhlul khai ot mah, Amah bangin bawn tuh khai ruat mah.

³² Zaimantifangin, Bawipa in phatlohnak a bawntute hua ai, Midikcangte tu humhim i.

³³ Bawipa in misualralte inn heh cukcam ai, Midikcangte tu hmuifu pe i.

³⁴ Mi zaisiar lotute tu zaisiar ve lo ai, thinniam mite hnenah ithnak larruai i.

³⁵ Mifimte in upat le songlawihnak ngah tuhai, Mivoite tu zakthihnak ian co tuh i.