Aanroling 23 - Zanniat Bible

Thufim Paruk

¹ Uktu bawi thawn rong na ai fangin, Na hmaiah aisu um i ti khiah phatak niu in sik tu.

² Rongham mi ilesikhaw sup tu deuh law.

³ Amahte pehnak rong urur khiah ir mah; Zaimantifangin na zawlhnak rong i.

Thufim Pasarih

⁴ Na nunhnak siatsuah tiantian in lianhnak si mah; A awldan thiam in fim tu.

⁵ Zaimantifangin na paisa tu mitkhep lakah pai thai sek i; Ko mun zual in mupui bangin zuang tuh teu i.

Thufim Pariat

⁶ Hmunditte ai rong ai sah mah, amahte rong ur dohnak khai ir mah.

⁷ Zaimantifangin amahte thinlung umdan bangin nung i: “Ding tu, ai tu,” na ti tuh i; Ikhalselai ciami tu a thinlung tak in na tihnak ilo i.

⁸ Na aihnak hmuahhmuah heh awk leh tuh sek ai, Anite na lawmhnak ponkam khai thulovang cang tuh sio i.

Thufim Pakua

⁹ Mivoi za thai in thu rel mah, Zaimantifangin fimhnak thu na relhnak khiah nautat tuh i.

Thufim Sawmkhat

¹⁰ Hlanlai ai bawn sa ramri khiah thawn mah; Nu le pa nai lo ngakṭahte ai lo khai sut mah.

¹¹ Zaimantifangin a hatmi Bawipa tu amahte ṭantu i ai, Thukhanhnak hmunah amahte lamah ṭang tuhai thurel sah tuh i.

Thufim Hlaikhat

¹² Zirhhnak thute heh phatak niu in ngai tulai, fimhnak khiah na zir benzah in zir tu.

Thufim Hlaihnih

¹³ Naupang nunthutiam loin um mah. Fungkek in na vit manin thi tuh lo i.

¹⁴ A nunhnak heh thihhnak in o ngah tuh sawn isi.

Thufim Hlaithum

¹⁵ I fapa, na fim lekhaw i ang ngai tuh i.

¹⁶ Fimhnak thu na rel i za fangin thin i nuam tuh ngai i.

Thufim Hlaili

¹⁷ Misualte ot mah, Na nun song Bawipa kihzah um tu sawn.

¹⁸ Ciatihin um lesikhaw na hmai lam tleu tuhai, Na umlamhnak pai tuh lo i.

Thufim Hlainga

¹⁹ I fapa, ngai tu, fim tulai, Lampui dik hlun tu ngio law.

²⁰ Zu le sa ham pawl kom mah.

²¹ Zaimantifangin zu ham le sa ham pawl tu farah tuh i. Na can heh ai le ding can lekin boruai lesikhaw, A rai hlanah ponher sil tuh isi.

Thufim Hlairuk

²² Na cawitu na pa ai thu ngai tu; Amah um hlah selai na sen tuh lo i. Na nu heh a tar fangin nautat mah.

²³ Thudik lai tulai zuar nawn mah. Fimhnak, thuzirhhnak le linghnak khai lai tulai zuar nawn mah.

²⁴ Dikcangmi ai pa tu a lungawi tuh roh i; Fapa fim cawitu in a fapa vumah ang tuh i.

²⁵ Na nu le na pa angruai tu, nangmah na cawitu na nu heh ang in um tuseh.

Thufim Hlaisarih

²⁶ I fapa, na thinlung i pe tu; I nundan khai i cung tu.

²⁷ Hlotlaunu tu khurthuk pui i; Nupang uire tu thihhnak thang i.

²⁸ Ruko bangin mi bawh in mi tampui siatsuah ai mi zuangzam ah cangruai i.

Thufim Hlairiat

²⁹ Aisu thinpit le vansang in um de i? Aisu lungsia de i? Aisu heh mi thawn tawng dun de i? Aisu heh phuncam de i? Aisu heh thu um loin maliam de i? Aisu heh mit san riamriam in um de i?

³⁰ Zu a ding ṭiotute i.

³¹ Khuat songah san hliang le tleu ngai in um ai, Ding fangin dang songah nal ngai in lut tuh ngat zu khiah na mit in sik lamlam mah.

³² A tawphnak ah rul bangin mi cik ai, rusia nai rulha bangin mi cik de i.

³³ Na mit in thil phundang hmu tuhai, phatak niu in khuaruat thil tuh lo ai fiangniu in pong thil tuh lo isi.

³⁴ Ciafangin tipuithuanthum laiteng ah a ittu pa bangin le, lawng pon zarhnak khuam pardir ai ittu pa bangin na cang tuh i.

³⁵ I vit napui i ur lo i, i seu napui ling lo ing, Zaikom fangin tho tuhai, a dang ding tuh si rih tuh ing, tiin ti tuh isi.