2 Timote 4 - Zanniat Bible

¹ Mithi le minungte thula a khantu Khrih Jesuh hmai le Pathian hmaiah a hnia lamai bangin heh bawn tuhin roh ngai in na forh ing; zaimantifangin Khrih tu kumpibawi bangin uktu cang tuhin hleng leh tuh i.

² Ciamanin Thuthangpha phuang tu, can a rem inkhai ituseh, rem lo inkhai ituseh, phuang tu tengteng law; amahte lung fiang tuhin rel tulai hau a kul fangin hau tulai forh a kul fangin forh tu; cen thinsau in zirh tu.

³ Mi in a dikmi zirhhnak heh hlun nuam loin amahte daihhnak sawn hlun can hleng leh tuh i. Cen ling a hiamhnak lek phuang tuhin zirhtu saya tampui amahte caah lang tlang tuh i.

⁴ Thutak tu ngai nuam nawn loin zangtak tlang tuhai a dik lomi tluanthu menma sawn ngai nuam tlang tuh i.

⁵ Ikhalselai nang tu zaibang hmun le tikcucan ahkhai thu sau ruat in uk dun ben zuam tu. Harhnak tuar ben zuam tulai Thuthangpha a phuangtu ai naper heh per tu. Cen Pathian naruaihtu na i bangin na ṭuanvo heh a khimniu in bawn tu sio law.

⁶ Kai tu hibawlhnak ai sel tuh can i hleng ihang. Hemi laivum nunhnak heh i zam can cu zo ihang.

⁷ Dawp zuamhnak ah i ti ben tawp in dawp zo ing; dawp zuamhnak a tawp tian dawp zo ai i sanghnak khai zam zel loniu in kho ngai in pom zo ing.

⁸ Tun tu i Bawipa, a dikcang thukhantu Bawi in cia Nia ai i pe tuhhnak nehhnak lehsawng kaimah caah i dah sah ciahnak iang ing. Ciami lehsawng heh dikcanghnak sui lukhuk i ai kaimah ca lek ilo i, ithnak thawn amah a lar tuhhnak a iangtu hmuahhmuah ca ahkhai i.

Pumpak Thucah

⁹ A cang thai tawp in i hnenah kawi cing tuh zuam tu.

¹⁰ Demas tu he laivum daih sawn manin i hlum ai Thessalonica khua ah feh zo i. Crescens tu Galati peng ah feh zo ai Titus khai Dalmatia peng ah feh ve i.

¹¹ Luke pakhat lek i hnenah um i. Mark khai sawm tulai fehpui tu ve, naperhnak i bawmthaitu i.

¹² Taikhikas tu Ephesa khua ah fehruai ing.

¹³ Na kawi fangin Troas khua Karpas hnenah i hlumhnak i korfual i phurh kong tu. Laibute khai phur tu; saphaw ai bawnhnak laihnahzualte heh hai hrimhrim mah.

¹⁴ Dar pumsutu Alexander in harsahnak roh ngai i pe i. Bawipa in a bawnhnak bangin rulthun leh tuh ngawn i.

¹⁵ Nangmah khai ralring tu; zaimantifangin ani tu kin Thuthangpha heh thi ngam in a eltu i.

¹⁶ Thurelhnak ai i suak hmasaber ṭum ah aisu inkhai i ṭanpui lo i. Amahte veksen in i hlum sek i. Anite tu Pathian in mawhhluk hram maseh.

¹⁷ Ikhalselai Pathian tu i hnenah um ai thazang i pe i; ciamanin kin thuthang tu a khimliang in Gentile mite hmuahhmuah za tuhin rel thil ing. Cen thihhnak songin i luat i.

¹⁸ Bawipa in hnophnak hmuahhmuah lak songin i hum tuhai a vancung Ukhnak songah himniu in i lutpui tuh i. Amah hnenah songlawihnak tu kumzangza in um tu ngio selaw. Amen.

Hnuataber Hnuksathnak

¹⁹ Prisilla le Aquila le Onesiforas innsangte hnuk ning sat ing.

²⁰ Erastus tu Corinth khua ah um ai Trophimus tu a ur manin Miletus ah hlum ing.

²¹ Khuasik cu hlanah kawi tuhin zuam tu. Zubulas, Pudens, Linas le Claudia in hnuk ning sat ai a dang Khristian unaute inkhai hnuk ning sat i.

²² Bawipa khiah na rauhla hnenah um tu hram seh. Pathian ai ninghiohnak tu ning veksen hnenah um tu hram seh.