2 Timote 3 - Zanniat Bible

Ni Hnuataber Nia Ai Ralring Tuh

¹ Ni hnuataber lamah harsa can tampui hleng tuh i ti khiah hih tu ngio.

² Mi tampui hmundit tlang tuh i, pamhap vanngai tuhai hngal in puarthau tlang tuh i. Mi zohsuam tlang tuh i, amahte nu le pa thu khai el tlang tuh i, ang pha khai thiam tuh lo ai biakhnak khai zaisiar tuh lo i.

³ Mi ninghio thiam tuh lo i, mi zawnruat nai tuh lo i, mi thangsiat hiamtu i tuh i, mi vit hiam tlang tuhai a laukul tuh i. A pha hua tlang tuh i.

⁴ Mi zuar hmang le mi engsan hmang tuhai thin salpa in a nungmi i tuh i; tluangkhawng tuh tliatlo ai Pathian tahin taksa hiamhnak daih tuh sawn i.

⁵ Kin biahnak tu a pualam incen pom tlang tuh i; ikhalselai a songlam ai a hathnak huham ngaingai tu hnawl tlang tuh i. Ciabang minungte tu kom mah ih.

⁶ Ciamite hrekkhat tu midang inn ah lut in sualhnak thilrit a phurtu nupangte, taksa hiamhnak ai a neh cuahco mite le,

⁷ thutak ling nuam in zir hnelhno napui a ling thil lomi nupang ṭawnṭai pawl heh nehsawh i, feh ai zohsuam tlang de i.

⁸ Jannes le Jambres tu Moses engsantute i awng bangin hemite tu thutak engsantute i. Hemite tu phatak niu in thu a ruat ben lomi thinlung dik lo le sanghnak ah a hlawhsam mite i.

⁹ Amahte tumtekhnak ah a hlapui hleng tuh lo i; zaimantifangin mi zongzong in amahte voihnak heh ling tuh zual i. Jannes le Jambres khai ciatih bang rori i.

Hnuataber Nun Zirhhnak

¹⁰ Nang tu i thuzirhhnak, i ziaza le i nun songai i tumtekhnak hmu ai hlun zo isi. I sanghnak, i thinsauhnak, i ithnak le i tuarbenhnak,

¹¹ reem i tuarhnak le harsa i tuarhnak tepawl khai hmu zo isi. Antioch, Iconium le Lystra khua ah reemhnak a roh ngai in i tuarhnak tepawl na ling siohnak i. Ikhalselai Bawipa in ciami songin i hup i.

¹² Aisu bangkhai Khrih thawn a pawlkomhnak in Pathian daihdan ai nung a tumtu heh reemhnak tawk tuh i.

¹³ Cen mihrokhrawl le mi zawltute tu a hnawm lam nong betbo i; mi zawl tuh betbo ai amah khai zawlhnak tuar tuh ve i.

¹⁴ Ikhalselai nang tu na zir zohnak le kho ngai ai na sanghnak thutak ah kho ngai in ding tu ngio law. Na zirhtu sayate aisu i ti ling ai,

¹⁵ Lai Thianghlim heh na naupang lai in ling zo isi ti khiah hai malaw. Ciami Lai Thianghlim tu Khrih Jesuh na sanghnak songin nunohnak ah na hlengruaitu, fimhnak na petu i.

¹⁶ Lai Thianghlim hmuahhmuah heh Pathian ai thawmkhumhnak i ai thutak zirhnak, zirhsual tiamhnak, a sualmi rem lehhnak ah le dikcang ngai in nisiar nunhnak zirhdunhnak ah pha i.

¹⁷ Ciatih ai Pathian naruaihtu mi semkhim i tuhai thilpha phunkhim bawn tuhin thuam semkhim naimi i tuh i.