2 Timote 2 - Zanniat Bible

Khrih Ai Rinsantlak Ralkap

¹ I fapa, nang tu Khrih Jesuh thawn kin pawlkomhnak le kin cohnak ninghiohnak manin kho ngai in um tu.

² Lingpuitu tampui hmai ai i zirhhnak thu khai midang zirh salawn bentu tuh rinsantlak mite hnenah ap tu.

³ Khrih Jesuh ai rinsantlak ralkap na i bangin tuar tuh na covo heh tuar tu ve.

⁴ Ralkap a pertu in amah hotu bawi ai daihhnak khiah hlun ai ralkap ilomi mi menma ai thula songah cokkalh lo i.

⁵ Dawp zuamhnak songai a teltu in dan hlun nuam hlah lekhaw lehsawng ngah thil tuh lo i.

⁶ Naper khung a pertu lovai mi in rongkhawm can a hleng fangin rongthar hmasaber a ngahtu tuh i.

⁷ Hetih ai i relhnak tepawl heh pha ngai in ruat tu; zaimantifangin Bawipa in i relhnak tepawl lingthilhnak na pe tuh i.

⁸ Thuthangpha i phuanghnak songai a um bangin David ai tesinfa, thihhnak in thoruai leh mi Jesuh Khrih heh hai mah.

⁹ Thuthangpha i phuanghnak manin harsahnak tuar ai misual bangin thir cikcin in khithnak tuar ing. Ikhalselai Pathian thu tu thir cikcin in khit thil lo i.

¹⁰ Ciamanin Pathian ai rilhnak minungte in Khrih Jesuh hnenin a hlenghnak nunohnak ngah tlang ai kumzangza songlawihnak co tuhin harsahnak hmuahhmuah tuar ing.

¹¹ Hemi thu tu rinsantlak i: “Amah thawn thi lesingkhaw, nung inkhai amah thawn nung tuh ising.

¹² Harsahnak tuar ben lesingkhaw, amah thawn uk tlang tuh ve ising. Amah hnawl lesingkhaw, ani inkhai kin hnawl tuh ve i.

¹³ Rintlak lo kin ita inkhai Ani tu rintlak ngio i, Zaimantifangin amah veve el dun thil lo i.”

Napertu Pha

¹⁴ Pon kam menma vumah thu el dun hnelhno heh com tuhang ih, tiin Pathian hmaiah na minungte ralringhnak pe tulai hai tuh loin rel tu ṭio law. Ciabang thu eldunhnak in zai hnempuihnak khai suahpui lo i; a ngaitute siatsuah sawn i.

¹⁵ A naper a zakthipui lotu le Pathian thutak Thuthangpha heh dik ngai in a relfiangtu tuhin Pathian ai lungkhimhnak ngah tuhin zuam tu.

¹⁶ Pathian kihzah lohnak ponkam voithu ai thu eldunhnak pial tu. Zaimantifangin ciabangte in Pathian hnenin mi hlaruai sawn i.

¹⁷ Ciabang zirhhnak tu kin taksa heh thuk amam in a aitu hmaihma bangtluk i. Ciatihin a zirhtu saya heh Himeneas le Phietas i ai,

¹⁸ amahte pahnih in lampui dik in pial kawm i. Anite in, “Thoruai leh zomi i ing,” ti kawm manin sangtu hrekkhatte ai sanghnak vakvairuai i.

¹⁹ Ikhalselai Pathian in kho ngai ai a bir zohnak ham heh hlin thil lo i. Ciami ham vumah, “Bawipa in amah minungte ling i,” ti le, “Bawipa ai ing titute in phatlohnak pial tuh i,” tiin nganhnak um i.

²⁰ Inn lianpui songah khokheng a phuncang um i. A hrek tu ngun ai bawnhnak i ai a hrek tu sui ai bawnhnak i. A dang tu thing le suntlung ai bawnhnak i. A hrek tu ni songlawi can ah hmang tuhhnak i ai a hrek tu nisiar hmang tuhhnak menma i.

²¹ Aisu khai a pha lomi hmuahhmuah pial ai thiangniu in um lekhaw naper songlawi hrangah hmang tuh i. Zaimantifangin pumpetu i ai naper pha per tuhin a ring dun cialep imanin Bawipa ai hman tlak i.

²² Dawn lai taksa hiamhnak heh zam tulai thinlung thiang in Bawipa ai bawmhnak a ngentute thawn hmunkhat ah dikcanghnak, sanghnak, ithnak le daphnak ngah tuhin a roh ngai in zuam tu.

²³ Voithu le zaikhai hnempui lo thu eldunhnak heh pial tu. Ciabang eldunhnak in hauhnak suakruai i ti ling isi.

²⁴ Bawipa naruaihtu heh midang thawn a hautu hnelhno i tuh lo i. Mi zongzong hnenah ninghio thiamtu, thinsau ai mi zirh thiamtu le,

²⁵ amah a engsantute nun thu a tiam fangin thinnem niu in mi a relthaitu tuh sawn i. Ciatihin bawn lekhaw anite tu thin thleng in thudik ling thil tuhin Pathian in tikcucan pha pe khai i thai i.

²⁶ Ciatihin amahte thinlung fim tuhai Satan in a daihhnak hlun tuhai a awkhnak thang songin luat tlang tuh i.