2 Siangphahrang 7 - Zanniat Bible

¹ Ciafangin Elisha in, “Bawipa ai thurelhnak heh ngai tu ih! Thangha tun camcu fangin Samaria ai dawr ah sangvut pha ber cuai khat, ihlahle barley sangvut cuai hnih heh ngun tangka fang khat in lai tlang tuh i si,” ti i.

² Kumpibawi hluntu tlangsuak pakhat in Elisha hnenah, “A cangthilhnak ilo i, Bawipa amah rori in van tukvirh hong in fangcang hlak diamdo inkhai cang thil tuh lo i!” tiin sawn i. Cen Elisha in, “Cang thil tuhai na mit rori in hmu tuh isi; ikhalselai nang incen ai ngah tuh lo isi,” tiin sawn i.

Syria Ralkapte Tlan Tlang I

³ Phar ur a tuartu miurte pali tu khuapui kotka ah um tlang ai pakhat le pakhat hnenah, “Zaimanin kin thi tian heta ah um tuh hnelhno menma ising?

⁴ Khuasong ah kin lut ta inkhai phathnem lo i, rong loin kin thi tuh pah i; heta ah kin um inkhai kin thi tuh thotho i. Ciamanin Syria ralkapte ai riahbuk ah feh tlang sawn ngasing. Kin rek lekhaw thi bang ngasing; ikhalselai rek loin kin zuah khai i thai pang nakhaw,” tiin ti dun tlang i.

⁵ Ciamanin khua thim sawng fangin Syria ralkapte riahbuk ah feh tlang i. Ikhalselai amahte hleng tlang ngaingai fangin pakhat khai um nawn lo ihang.

⁶ Bawipa in Syria ralkapte za thai in thawmvang thangruai ai ciami thawmvang tu ralkapte tampui, siphuh le siphuhleng tampui thawmvang bang i. Israel kumpibawi in Hit kumpibawi le Egypt kumpibawi, a ralkapte thawn sawm tlang in kin tawng tum i, tiin Syria ralkapte in ruat tlang i.

⁷ Ciamanin thi tuh lau in Syria ralkapte tu amahte lu ai sam rin hih loin tlan tlang ai, amahte ponhlam, siphuh le laakte khai lang man loin amahte riahbuk khiah ciatih pah in zam tlang i.

⁸ Mipharte pali tu riahbuk hleng fangin ponhlam pakhat songah lut tlang ai ponhlam songai a umhnak rong ai hnuaah amahte tawkhnak sui, ngun le hnikponte rang ngai in lang tlang ai amahte caah thup tlang i. Cia hnuaah kawi tlang lala ai ponhlam a dang pakhat songah lut ai ciatih thotho in bawn tlang i.

⁹ Ciafangin anite tu pakhat le pakhat, “Hetihin kin bawnhnak heh thudik ilo i. Thuthangpha nai ising ai kinmah ca lek tuseh ti tuhhnak ilo i. Thangha tian iang tlang lesingkhaw mawhhnak phur tuh rori ising. Tun rori in feh ngasing khaw kumpibawi kuthnia ai tlangsuakte rel tuh ising,” tiin ti dun tlang i.

¹⁰ Ciamanin Syria ralkapte riahbuk in suak tlang ai Samaria khua songah feh ai kotka kiltute hnenah, “Syria ralkapte riahbuk ah feh tlang ai aisu khai hmu lo i ing, khing sukso i. Amahte siphuh le laakte a ri peu khai hawk tlang lo i! Ponhlamte khai Syria ralkapte a zamhnak bang rori in um lai i,” tiin rel tlang i.

¹¹ Ciami thu heh kotka kiltute in kumpibawi hnenah rel tlang i.

¹² Zanlai inapui kumpibawi tu tho ai a kuthnia ai tlangsuakte hnenah, “Syria ralkapte ai a tumhnak ning rel tuh ing. Khuasong ah rong um lo heh ling tlang i. Ciamanin a riahbuk in suak tlang ai hampalak ah relh tlang i. Rong si in khua songin suak tlang tuhai ciafangin a nung in pom tuh sio ising, tiin ruat tlang i,” ti i.

¹³ Ciafangin a kuthnia ai tlangsuak pakhat in, “Zaizai inkhai ituseh kin hlanai a thi bangin hemi khua songah a umtute tu kin thi tlang tuh sek thotho i. Ciamanin thil umdan zaibang ngaingai ini, ti kin lingthilhnak tuhin a nung lai siphuh panga thawn mi hrekkhat hlat cu thai bang sing,” tiin ti i.

¹⁴ Ciamanin minung hrekkhat ril ai Syria ralkapte akonah i, ti sik tuhin kumpibawi in siphuhlengte pahnih in hlat i.

¹⁵ Feh tlang ai Jordan tian hleng i. Lampui vumah Syria ralkapte in a tlan kongin zamhnak hnikponte le fai le vangte hmu tlang i. Let tlang ai ciami thu heh kumpibawi hnenah rel tlang i.

¹⁶ Ciafangin Samaria khuasong mi miburpui tu khi dun murhmo in suak tlang ai Syria ralkapte ai riahbuk heh rok tlang dekdo i. Cen Bawipa ai ponghnak bang rori in sangvut a pha ber cuai khat, i hlahle barley sangvut cuai hnih ah tangka fangkhat in zuar tlang ngaingai i.

¹⁷ Ciami can ngelcel ah Israel kumpibawi in amah hluntu de a kuthnia ai tlangsuak tu kotka kiltute hotu in dah i. Cen mizapui Syria ralkapte riahbuk lamah a cuh in dawp tlang murhmo fangin ciami hotu pa heh mi fonhnak in thi i; Elisha tawk tuhin kumpibawi a feh fangin Elisha ponghnak bangin ciami pa tu thi ngaingai i.

¹⁸ Elisha in kumpibawi hnenah, “Thangha tun camcu fangin Samaria ai dawr ah sangvut pha ber cuai khat, ihlahle barley sangvut cuai hnih heh ngun tangka fangkhat in zuar tlang tuh i,” a ti fangin,

¹⁹ ciami kumpibawi hluntu bawi in, “Cang thil lo i, Bawipa amah in van tukvirh hong in fang hlak diamdo inkhai cang thil lo i,” tiin sawn awng i. Cen Elisha in, “Cang tuhai na mit rori in hmu tuh isi; ikhalselai nang incen ai ngah tuh lo isi,” tiin ti awng i.

²⁰ A tihnak bangin a vumah hleng ngaingai i; mizapui in khuapui kotka ah fon ai thi i.