2 Siangphahrang 6 - Zanniat Bible

Haihpui Fang Ngah Leh I

¹ Vaikhat ah Elisha ai hohnak prophette tu Elisha hnenah kawi tlang ai, “Sik tu, kin umhnak heh a cik ze i.

² Kin umhnak inn a kau deuh in sa tuhhnak thing vawng tuhin Jordan ah kin feh siang tu,” tiin ti tlang i. Elisha in, “Pha i, feh tu ih,” ti i.

³ Cen prophet pakhat in feh tuh ve in Elisha heh sawm ai a lungkhim i.

⁴ Cen amahte veksen in feh tlang i. Jordan hleng fangin thing vawng tlang i.

⁵ Pakhat pa in thing a vawng laitak ah mangrinlo in ti songah a hai fang tloktiar i. “Ai aw, i bawipa, akontih in ti tuh ing? I zawnghnak ina khaw,” tiin au dekdo i.

⁶ Elisha in, “Akonteng ber ah tlok i?” tiin zawt i. Ciapa in a tlok hmun rel i. Ciafangin Elisha in fungkek pakhat sat ai ti songah lon ai haihpui fang khiah dak leh i.

⁷ Elisha in, “Lang ta tu,” ti ai ciami pa in lang leh i.

Syria Ralkapte Sung I

⁸ Vaikhat ah Syria kumpibawi in Israel tawng i. A ralbawite thawn taikhawm tlang ai, “Ciata dung, khiata dung in tawng tu ih!” tiin thupe i.

⁹ Cen Elisha in Israel kumpibawi hnenah, “Ciata dung, khiata dung tu feh mah ih. Syria ralkapte in ning bawh tuh i,” tiin thucah i.

¹⁰ Ciamanin Israel kumpibawi in ciata lamai a fehtu Israel ralkapte tu ralringruai ai ralring ngai in um tlang i. Ciatihin vel tampui luat tlang i.

¹¹ Ciami heh Syria kumpibawi in a ling fangin a thinraw i. A ralbawite ko ai, “Aisu Israel kumpibawi lamah a ṭangtu um isi? tiin zawt i.

¹² Ciafangin a ralbawi pakhat in, “Aw kumpibawi pa, aisu inkhai na zuar lo i ing. Na khan songai na relhnak na thuthup rin prophet Elisha in Israel kumpibawi hnenah rel cingcing de man i,” ti i.

¹³ Syria kumpibawi in, “Ciapa umhnak i rel tu ilai pom tuh ing,” tiin ti i. Elisha tu Dothan ah um i, tiin a rel tlang fangin,

¹⁴ siphuh le siphuhlengte thawn ralkapte tampui ciata ah hlat i. Dothan khua tu zan ah hleng ai kulh tlang sio i.

¹⁵ A thangha zingniu in Elisha ai hnenum pa a tho fangin sumpua ah suak ai, Dothan khua a kulhtu Syria ralkapte, siphuhlengte thawn a ralring lep khiah hmu i. Elisha hnenah dawp ai, “Ai aw, bawipa, kin bo ihang! Akontih in um tuh ising?” tiin a thinlau in au i.

¹⁶ Ciafangin Elisha in, “Lau mah; anite hnenai a ummi tahin kin hnenai a ummi tam sawn i,” ti i.

¹⁷ Cen Bawipa hnenah sawngen i. “Aw Bawipa, a mit hong sah tulai khua hmuruai tu,” ti i. Bawipa in a sawngenhnak ngai sah ai Elisha ai hnenum pa in khua a hlir fangin Elisha ai hiang tlangtluan hmuahhmuah heh siphuh le mai siphuhleng in dim liang khiah hmu i.

¹⁸ Syria ralkapte in a tawng fangin Elisha in sawngen ai, “Aw Bawipa, hemi ralkapte heh a mit cawruai tu,” ti i. Bawipa in a sawngenhnak ngai ai amahte mit khiah cawruai ngaingai i.

¹⁹ Cen Elisha tu amahte hnenah feh ai, “Lampui ning vai i. Ning sihnak khua tu hemi khua ilo i. I hlun tlang tu ilai ning sihnak pa umhnak ah ning fehpui tuh ing,” tiin ti i. Ciatihin Samaria ah fehpui i.

²⁰ Khua songah a hleng sawng fangin Elisha in sawngen ai, “Aw Bawipa, amahte mit cakruai leh tuhang lai khua hmu tlang tuhang seh,” ti i. Bawipa in a sawngenhnak ngai i; anite mit cakruai ai Samaria khua songah a um tlang khiah hmu i.

²¹ Israel kumpibawi in Syria ralkapte a hmu fangin, “Bawipa, hemi ralkapte heh rek berh ngang maw?” tiin zawt i.

²² Ciafangin Elisha in, “Rek tuh lo i si. Ral ning tawnghnak ai ning pomhnak ralkapte rin rek tuh lo i si. Amahte aih tuh ti le rong pe tulai amahte kumpibawi hnenah tlung tlang tuseh,” tiin ti i.

²³ Ciamanin Israel kumpibawi in amahte caah rong ai puai lian ngai bawt ai a ai a ding tlang hnua fangin Syria kumpibawi hnenah tlung tlang i. Ciami ai panin Syria ralkapte in Israel ram tawng nawn lo ihang.

Samaria Sim Tlang I

²⁴ Can a rai deuh fangin Syria kumpibawi Benhadad in a ralkap hmuahhmuah kokhawm sio ai Israel tawng le Samaria khuapui heh kulh tlang i.

²⁵ Ciatihin can raipui a kulh meng manin Samaria khua songah rong har diamdo ai laak lu pakhat heh ngun tangka sawmriat man ai suatper kilh khat ah ngun tangka fang nga man i.

²⁶ Nikhat ah Israel kumpibawi tu khuapui kulhhnak vingpui vumah lam a leng laitak ah nupang nu pakhat in, “Aw kumpibawi i bawm tu hram law,” tiin au i.

²⁷ Kumpibawi in, “Bawipa Pathian in na bawm hlah lekhaw kai in ziang na bawm thil tuh ing? Sangvut le cabit nai i vuah isim?

²⁸ Ziang na kul i?” tiin iti i. Nupang nu in, “Kin hnuaah he nupang nu in, ‘Na faniu ai kawm ngasing khaw, thangha fangin i faniu ai kawm leh tuh ising,’ tiin ti i.

²⁹ Ciamanin i faniu heh suang ai ai kawm sio i ing. A thangha fangin na faniu ai ngahang sing, ti napui thup lio i,” tiin ti i.

³⁰ Ciami thu tu kumpibawi in a za fangin a lungsia in a hnikpon zik sek i. Khuapui kulhhnak vingpui vumah a vak laitak ah a hiangai a umtute in a hnikpon songah buri a sil khiah hmu tlang i.

³¹ Cen kumpibawi in, “Tunnia rori ah Shaphat ai fapa Elisha hawng tan hlah lengkhaw Bawipa in kaimah i rek tuseh,” ti i.

³² Cen Elisha pom tuhin mi hlat i. Cia laitak ah Elisha tu a inn ah um ai upate hrekkhat in leng tlang i. Kumpibawi ai hlathnak minung a hleng hlan deuh ah Elisha in, “Khia mirek pa in kaimah rek tuhin mi hlat i,” tiin upate rel i. “A hlatmi pa a hleng fangin dawngkham kalh tu ilai inn songah lutruai mah ih. Kumpibawi amah khai hleng cing tuh i,” ti i.

³³ Ciatihin a pong rin a bo hlanah kumpibawi tu hleng ngaingai ai ani in, “Hetluk harsahnak a hlengruaitu heh Bawipa i. Akontih in amah ai bawmhnak heh ring thil tuh nawn ising?” ti i