2 Siangphahrang 5 - Zanniat Bible

Naaman Tu Cakruai I

¹ Naaman tu Syria ralkapte hotu ralbawipa pakhat i ai amah thawmin Syria ralkapte tu Bawipa in bawm ai ralte neh tlang ṭiode i. Ciamanin a kumpibawi in ralbawi Naaman heh uar ai upat fawn i. Ralbawi mak ngai i; ikhalselai phar ur nai ngelcel i.

² Vaikhat ah Israel mite a tawng laitak ah Syria ralkapte in Israel naupang nu pakhat pom tlang i. Fehpui ai Naaman nupui ai hnenum ah cang i.

³ Nikhat ah a bawinu hnenah, “I bawipa heh Samaria ai a ummi prophet hnenah feh selai i daih ngai napui i! A phar ur cakruai tuh rori napui i,” tiin ti i.

⁴ Ciami thu heh Naaman in a za fangin kumpibawi hnenah kawi ai rel i.

⁵ Ciafangin kumpibawi in, “Pha i, feh tulai hemi i lai kuathnak heh Israel kumpibawi pe kong tu,” tiin ti i. Naaman tu feh ai ngun tangka thawng sawmthum, sui tlep thawng ruk le hnikpon a pha pawl lam hra keng i.

⁶ A kenghnak laikuat songah, “Hemi laikuat na petu heh i ralbawi Naaman i ai na ling tuhhnak in hemi lai na kuat ing. A urhnak khiah cakruai tu hram law,” tiin ngan i.

⁷ Ciami laikuathnak tu Israel kumpibawi in a siar fangin a mangbang in a hnikpon zik sek ai, “Akontih in Syria kumpibawi in hemi pa heh cakruai tu iti ang menma i? Nunhnak le thihhnak huham nai Pathian i vuah ini im? Kaimah thawn tawngdunhnak si i tuh i,” tiin a multing in ti i.

⁸ Ciami thu khiah prophet Elisha in a za fangin kumpibawi hnenah, “Zaimanin lungsia in na hnikpon zik sek isi? Israel ram songah Pathian um i, ti na linghnak tuhin ciami pa khiah i hnenah kawiruai tu,” tiin thucah i.

⁹ Ciamanin Naaman tu a siphuh le a siphuhlengte thawn feh ai Elisha inn kotka ah ding i.

¹⁰ Elisha in a hnenum pakhat hlat ai Naaman hnenah, “Feh tulai Jordan Runpui ah vel sarih takhlu tu. Na taksa cer leh tuhai na cak tuh i,” tiin rel i.

¹¹ Ciafangin Naaman a thinraw ngai in let teu ai, “Ciabang hlaihlawr! i hnenah kawi in Bawipa a Pathian hnenah sawngen ai i urhnak vumah a kutsuan in i cakruai tuh khai vuah ing, tiin ruat napui ciabang zaikhai um lo i.

¹² Ciahlaiah Damascus ai a luanghnak Abana le Pharpar runpuite tu Israel ramai runpuiti tahin pha sawn lo im? Ciami runpui ah takhlu inglai i cak tuh sawn lo im?” tiin cam dekdo i. Ciatihin a thinraw in let i.

¹³ Ciatihin a hnenumte in nong ai, Bawipa, prophet in thil harsa deuh bawn tuhin na ruai selai bawn tuh pam isi. Zaimanin runpui songah takhlu in a cak tuh heh na nuam lo i?” tiin ti tlang i.

¹⁴ Ciamanin Naaman tu Jordan Runpui ah feh ai, ti songah Elisha ai a tihnak bangin vel sarih nim ai, ciaben fangin cak ngaingai i! A taksa tu cak sio ai nauniu bangin mam hlelhlo i. Ciatihin cak bul lio rori i.

¹⁵ Cen Elisha hnenah a minungte thawn let tlang ai, “Tun tu Israel ramai Pathian siar lo laivum a konteng ahkhai Pathian dang um lo i, ti ling zo ing. Ciamanin bawipa, i anghnak lehsawng heh i sang tu hram law,” ti i.

¹⁶ Elisha in, “I biahnak a nungmi Pathian hming sal in na rel ing: lehsawng zaikhai lang tuh lo ing,” tiin ti i. A lehsawng lang tuhin Naaman in pe belbo napui Elisha in daih lo i.

¹⁷ Cen Naaman in, “I lehsawng lang na nuam hlah lekhaw i khua ah phur tuhin laak pahnih phurh laipua i lang siang tu hram law; zaimantifangin tunai panin Bawipa hnen siar lo pathian dang aisu hnen ahkhai hibawlhnak le maitai hibawlhnak sel tuh nawn lo ing.

¹⁸ Syria khuavang Rimmon biakinn ah i kumpibawi feh ai hlun fangin ani in khuavang a bia fangin bia ve i kul tuhai ciafang ian in Bawipa in i ngaithiam tu hram seh. Bawipa in i ngaithiam tuh pam i,” tiin ti i.

¹⁹ Ciafangin Elisha in, “Cak niu in feh ta tuhang,” ti i. Cen Naaman khai feh i. Ikhalselai a nong niu lek feh man i.

²⁰ Elisha ai hnenum pa Gehazi in, “I bawipa in zaikhai lang loin Naaman tlungruai i. Syria ralbawi ai a pehnak heh sang tuhhnak napui i! A nungmi Bawipa ai hming sal in rel ing: hnawh tuhai pakhatkhat ngen tuh ing,” tiin ti i.

²¹ Ciamanin Naaman khiah hnawh teu i. Naaman in a hnua lamin a dawptu hnelhno mi pakhat a hmu fangin a siphuhleng vuman tolh vut ai a tawk dun fangin, “Thupoi um i awm? tiin zawt i.

²² Ciafangin Gehazi in, “Thupoi zaikhai um lo i. Ikhalselai Epharaim tlang vum ramai prophette lakin minungte pahnih hleng kawm ai anite hnenah ngun tangka thawng thum hnikpon lam hnih i bawipa in pe nuam ai ciami heh nangmah in pe thil nitur sim ti na rel tuhin i hlat i,” ti i.

²³ Naaman in, “Ngun tangka thawng ruk in lang tu,” ti i. Ngun tangka heh dip pahnih songah thun sah ai lang tuhin ruai i. Ciami le hnikpon lam hnih heh a hnenumte pahnih phurruai ai Naaman ai thupehnak bangin Gehazi ai hmaiah feh kawm i.

²⁴ Elisha umhnak mual a hleng tlang fangin Gehazi in dipte pahnih heh lang ai inn songah dah i. Cia hnuaah Naaman ai hnenumte pahnih tu letruai i.

²⁵ Inn songah a lut leh fangin Elisha in, “Kon feh isi?” tiin Gehazi heh zawt i. Gehazi in, “Kon khai feh hrimhrim lo ing,” tiin pheh i.

²⁶ Ikhalselai Elisha in, “Naaman tu a siphuhleng in tolh ai ning tawk dun laitak ah i rauhla in na hnenah a tel ve lo i vuah isim? Tun can heh paisa le hnikpon, olive vuan le cabit vuan, tuu le kawlpaw, sal nu le sal pa, lang can i lo i.

²⁷ Ikhalselai Naaman ai urhnak in na kai tuhai nangmah le na tesinfate tu ciami urhnak kumzangza in nai tata tuh ihang i si,” tiin ti i. Gehazi tu sumpua ah suak ai ciami urhnak tuar ngaingai i. A vun tu vur bangin ngo sio i.